Bilik Fondu 150-dən çox təhsil

müəssisəsində mühazirələr təşkil edib

Fondun icraçı direktoru Oktay Səmədov

Şuşa və Qubadlının qaçqın məktəblərində

Azərbaycan Respublikasının Prezidenti yanında Bilik Fondu 15 sentyabr - Bilik günü münasibətilə 150-dən çox təhsil ocağında mühazirələr təşkil edib.

Bilik Fondundan AZƏRTAC-a bildirilib ki, qurumun "İlboyu bilik" proqramı çərçivəsində Bakıda və Azərbaycanın bütün rayonlarında ali və orta məktəblərdə "Heydər Əliyev Azərbaycan multikulturalizminin siyasi banisidir" mövzusunda dərslər keçilib, mühazirələr oxunub. Ümumilikdə, 158 yerdə - 142 orta məktəbdə, 16 ali məktəbdə tanınmış ziyalılar - akademiklər, professorlar, diplomatik korpus və media nümayəndələri məktəblilər, tələbələr və yerli sakinlərlə görüşüblər, onlara Azərbaycanda multikultural ənənələr, artıq formalaşmış tolerantlıq mühiti barədə ətraflı məlumat veriblər.

Bilik Fondunun mühazirəçiləri şəhər məktəbləri ilə yanaşı, kənd məktəblərində, qaçqın və məcburi köçkün, eləcə də sərhədyanı bölgələrin məktəblərində şagirdlərə maraqlı mühazirələr deyiblər.

Azərbaycan Respublikasının millətlərarası, multikulturalizm və dini məsələlər üzrə dövlət müşaviri, akademik Kamal Abdullayev Şamaxı rayonundakı Sabir qəsəbə tam orta məktəbində, Milli Məclisin deputatı Aydın Mirzəzadə Mingəçevirdə, Respublika Təhsil Şurasının sədri Əjdər Ağayev Neftçalada, Alban-udi xristian icmasının sədri Robert Mobilim Qəbələdə, ATV şirkətinin Bədii Şurasının sədri Etibar Babayev Siyəzəndə, professor Rüstəm Kamal Qazaxda, AMEA Şərqşünaslıq İnstitutunun direktoru, AMEA-nın müxbir üzvü Gövhər Baxşəliyeva Bərdədə, folklorşünas Ağaverdi Xəlilov İsmayıllıda, Bilik Fondunun icraçı direktoru Oktay Səmədov Şuşa və Qubadlının qaçqın məktəblərində, akademik Vaqif Abbasov, AMEA-nın Dilçilik İnstitutunun direktoru Möhsün Nağısoylu və başqaları ölkəmizin ali və orta məktəblərində mühazirələr oxuyublar.

Bakıda və bölgələrdə ölkə ziyalılarının, diplomatik korpus və KİV nümayəndələrinin mühazirələri yüksək qiymətləndirilib və təşkilatçılara minnətdarlıq ifadə olunub.

Millətlərarası, multikulturalizm və dini məsələlər üzrə

Dövlət müşaviri, akademik Kamal Abdullayev Şamaxıda

Millətlərarası, multikulturalizm və dini məsələlər üzrə Dövlət müşaviri, akademik Kamal Abdullayev Fondun "İlboyu bilik" proqramı çərçivəsində Şamaxı rayonundakı Sabir qəsəbə tam orta məktəbində "Heydər Əliyev Azərbaycan multikulturalizminin siyasi banisidir" mövzusunda mühazirə deyib. Mühazirədə Şamaxı Rayon İcra Hakimiyyətinin başçısı Asif Ağayev, rayon təhsil şöbəsinin müdiri Eyvaz Eminalıyev, Şamaxı Rayon İcra Hakimiyyəti başçısının ictimai-siyasi və humanitar məsələlər üzrə müavini Gülnisə Ələkbərova, Mədəniyyət və Turizm Şöbəsinin müdiri Məleykə Kamilova, Bilik Fondunun Şamaxı rayonu üzrə nümayəndəsi, Sabir qəsəbə tam orta məktəbinin direktoru Gülnur Babaşova, rayon məktəbliləri və müəllimlər, yerli ziyalıların nümayəndələri iştirak ediblər.

Məktəbliləri yeni dərs ilinin başlanması münasibətilə təbrik edən akademik K.Abdullayev bildirib ki, çoxmədəniyyətlilik Azərbaycanın dövlət siyasətində prioritet istiqamətdir. Multikulturalizmin Azərbaycanda əsrlərdən bəri formalaşan, eyni zamanda ictimai-bədii, psixoloji-mənəvi müstəvidən kənara çıxmayan dəyərlər toplusu olduğunu deyən akademik bu kimi xüsusiyyətlərin Azərbaycan ədəbi-bədii düşüncə müstəvisində həm tarixən, həm də bu gün kifayət qədər görümlü və təsiredici olduğunu vurğulayıb. Azərbaycanda multikultural dəyərlərin tarixi köklərinə toxunan dövlət müşaviri "Kitabi-Dədə Qorqud" dastanından, şifahi və yazılı ədəbiyyatımızdan keçən bariz nümunələrin uzaq keçmişdən bu günümüzədək multikultural ənənələrin mövcudluğunu aşkar şəkildə sübut etdiyini bildirib.

"Bunun fonunda müasir dövrdə həllini tapası yalnız bir əsas məsələ qalırdı: hüquqi və siyasi müstəvidə multikulturalizmin yerini müəyyən etmək. Bunu ulu öndər Heydər Əliyev etdi. O, Azərbaycanın gələcək uğurlu inkişafı üçün dəqiq ideoloji hədəf seçdi və öz uzaqgörən, müdrik siyasəti ilə əsrlər boyu formalaşmış çoxmədəniyyətlilik ənənəsini inkişaf etdirərək, onu keyfiyyətcə yeni mərhələyə qaldırdı. Bu mərhələ siyasi mərhələ idi. Əslində, ulu öndər Azərbaycan multikulturalizminin siyasi banisi oldu", - deyən akademik onu da əlavə edib ki, Azərbaycanda dini və milli zəmində ayrı-seçkiliyin izi belə yoxdur.

Dövlət müşaviri Kamal Abdullayev məktəbliləri maraqlandıran sualları da ətraflı cavablandırıb, şagirdlərə kitablar hədiyyə edib.

İtaliyanın səfiri Azərbaycan Dövlət

Mədəniyyət və İncəsənət Universitetində

Sentyabrın 15-də Azərbaycan Dövlət Mədəniyyət və İncəsənət Universitetində Azərbaycan Respublikasının Prezidenti yanında Bilik Fondunun təşkilatçılığı ilə "Heydər Əliyev Azərbaycan multikulturalizminin siyasi banisidir" mövzusunda İtaliya Respublikasının ölkəmizdəki səfiri Ciampaolo Kutillonun mühazirəsi dinlənildi. Tədbirdə universitetin professor-müəllim heyəti, tələbələr iştirak edirdilər.

Tədbiri giriş sözü ilə açan universitetin rektoru, professor Fərəh Əliyeva qeyd etdi ki, multikulturalizm siyasəti Azərbaycan dövlətinin tarixi nailiyyətidir və ölkəmizdə bütün xalqlar mehriban və tolerant şəraitdə yaşayır. Bildirildi ki, əsası ulu öndər Heydər Əliyev tərəfindən qoyulmuş və müasir dövrdə Prezident İlham Əliyev tərəfindən uğurla inkişaf etdirilən multikulturalizm siyasətinin mahiyyəti barədə gənc nəslin maarifləndirilməsi mühüm əhəmiyyət kəsb edir. Azərbaycan tarixən müxtəlif xalqların və dinlərin nümayəndələrinin sülh, dostluq şəraitində yaşadığı məkan olub. Bu gün Azərbaycan dünyada təkcə enerji resursları ilə zəngin olan ölkə kimi deyil, həm də humanizm prinsiplərinə sadiq, tolerant və multikultural ölkə kimi tanınır.

Tədbirdə çıxış edən İtaliya Respublikasının ölkəmizdəki səfiri Ciampaolo Kutillo iki ölkə arasındakı əməkdaşlıqdan söz açdı, Azərbaycanın tolerant ölkə olduğunu bildirdi. Səfir qeyd etdi ki, ona bir neçə təhsil ocağında mühazirə oxumaq təklif edilsə də, o məhz ADMİU-nu seçib. Buna səbəb isə öz ölkəsində mədəniyyətin hər sahədən daha üstün sayılmasıdır. Qeyd etdi ki, incəsənətin hər hansı bir sahəsini seçən bu tələbələrin qədim mədəniyyətə malik İtaliyaya marağı böyük olmalıdır. Bu səbəbdən də mühazirəsinin tələbələr üçün maraqlı olacağını diqqətə çatdırdı. Daha sonra Azərbaycan və İtaliya mədəniyyətləri, insanları arasında oxşarlığın olduğunu, burada səfir kimi çalışmaqdan məmnunluq hissi keçirdiyini bildirdi. Səfir Azərbaycanla İtaliya arasında siyasi, iqtisadi və mədəni əlaqələrdən də danışdı və bu əlaqələrin daha da genişlənməsinin onun səfir kimi əsas missiyalarından birini təşkil etdiyini vurğuladı. Bu əlaqələrin nəticəsi olaraq Expo Milan 2015-də Azərbaycanın çox möhtəşəm şəkildə təmsil edilməsini və ölkələr arasında ən gözəl pavilyonun məhz Azərbaycana aid olduğunu söylədi.

Görüş müəllim və tələbələrlə səfir arasında səmimi fikir mübadiləsi ilə davam etdi. Universitetin tələbələri də ilk dərs gününün belə maraqlı qonaq və məlumatlarla başlamasının onlar üçün bir stimul olduğunu qeyd etdilər, səfirə onları maraqlandıran suallar və təkliflərini verdilər. Səfir də öz növbəsində tələbələrin suallarını cavablandıraraq, ölkələrinə olan bu marağa və görüşün belə keçirilməsi üçün rəhbərliyə təşəkkürünü bildirdi.

Sonda səfir görüş iştirakçıları ilə xatirə şəkli çəkdirdi.

Niyazi RƏHİMOV

"Azərbaycan müəllimi" qəzetinin baş

redaktoru Bakı Slavyan Universitetində

15 sentyabr -Bilik günü münasibətilə Azərbaycan Respublikasının Prezidenti yanında Bilik Fondunun paytaxtımızda, eləcə də ölkəmizin bütün bölgələrində "İlboyu bilik" proqramı çərçivəsində "Heydər Əliyev Azərbaycan multikulturalizminin siyasi banisidir" mövzusunda təşkil olunan mühazirələrdən birini də Bakı Slavyan Universitetində "Azərbaycan müəllimi" qəzetinin baş redaktoru, əməkdar jurnalist, siyasi elmlər üzrə fəlsəfə doktoru Bayram Hüseynzadə deyib. Ali təhsil ocağının müxtəlif fakültələr üzrə təhsil alan tələbələrinin iştirak etdiyi tədbiri universitetin rektoru, professor Asif Hacıyev açaraq Bilik günü münasibətilə tələbələri təbrik edib, onlara uğurlar arzulayıb və mühazirə oxumaq üçün sözü Bayram Hüseynzadəyə verib.

Tələbələr qarşısında "Heydər Əliyev Azərbaycan multikulturalizminin siyasi banisidir" mövzusunda danışan mühazirəçi Azərbaycanın çoxmillətli bir ölkə olduğunu, burada tarixən birgə yaşayan müxtəlif xalqların, toplumların özlərini azad və xoşbəxt hiss etdiklərini, mədəniyyətlərini yaşatdıqlarını qeyd edib. Bildirilib ki, ölkəmizdə başqa xalqların nümayəndələri öz ana dillərində, ibtidai sinif səviyyəsində olsa da təhsil alır, öz dini inanclarına uyğun ibadət edir, heç bir ögey münasibətlə üzləşmədən müxtəlif sahələrdə çalışa bilirlər. Bu da Azərbaycanın multikulturalizmin yarandığı əsas tarixi məkanlardan biri olduğunu deməyə imkan verir.

Mültikulturalizmin əsasını tolerantlıq, qanunlara, bir-birinin azadlığına hörmət hissi təşkil etdiyini söyləyən Bayram Hüseynzadə bir sıra Qərb ölkələrində multikulturalizmin siyasi xətt kimi iflasa uğramasının bəyan edildiyi bir dövrdə respublikamızda multikulturalizmin dövlət siyasətinə çevrilməsində, onun möhkəmləndirilməsi və saxlanmasında məhz ümummilli lider Heydər Əliyevin əvəzsiz rol oynadığını xüsusi vurğulayıb. Qeyd olunub ki, əsası ulu öndər Heydər Əliyev tərəfindən qoyulmuş multikulturalizm siyasəti hazırda Azərbaycan Respublikasının Prezidenti İlham Əliyev tərəfindən uğurla inkişaf etdirilir.

Mühazirəçi sonra dini dözümlülük, tolerantlıq, multikultural dəyərlərimizin Avropa multikultural dəyərləri ilə müqayisəlı təhlilini aparıb. ABS-a və bir sıra Avropa ölkələrinə səfərləri zamanı şahidi olduğu hadisələrlə bağlı müəyyən məqamları diqqətə çatdırıb. Bir sıra dünya dövlətlərinin ölkəmizə qarşı ədalətsiz münasibət sərgilədiyini deyən B.Hüseynzadə onu da bildirib ki, son illər müstəqil respublikamızın uğurlu inkişafına qısqanclıqla yanaşan ölkələr belə, Azərbaycan multikulturalizminin dünyaya nümunə olduğunu etiraf edirlər.

Bayram Hüseynzadə dahi şəxsiyyət Heydər Əliyevin fikirlərini tələbələrə çatdırıb. Ulu öndər deyirdi: "Dövlət, ölkə nə qədər çox xalqı birləşdirsə, bir o qədər zəngin olur, çünki onların hər biri ümumdünya mədəniyyətinə və sivilizasiyasına öz töhfəsini verir".

Mühazirəçi daha sonra Təhsil Nazirliyi tərəfindən ölkəmizdə təhsilin inkişafi ilə bağlı reallaşdırılan tədbirlərdən danışıb, tələbələri maraqlandıran çoxsaylı sualları cavablandırıb.

Samirə KƏRİMOVA

Birləşmiş Ərəb Əmirlikləri səfirinin

müavini Bakıdakı 158 nömrəli məktəbdə

Azərbaycan Respublikasının Prezidenti yanında Bilik Fondunun "İlboyu bilik" proqramı çərçivəsində həyata keçirdiyi layihəyə uyğun olaraq sentyabrın 15-də Birləşmiş Ərəb Əmirliklərinin ölkəmizdəki fövqəladə və səlahiyyətli səfirinin müavini cənab Abdullah Casim Al-Şamsi Bakıdakı 158 nömrəli məktəbi ziyarət edib, bu təhsil ocağının yuxarı sinif şagirdləri ilə görüşüb.

Məktəbin böyük akt zalında keçirilən tədbiri tədris ocağının direktoru Mehriban Ələkbərova açaraq zala toplaşanları yeni dərs ilinin başlanması münasibətilə təbrik edib, onlara uğurlar arzulayıb və hörmətli qonağı şagirdlərə təqdim edib.

Sonra Abdullah Casim Al-Şamsi şagirdlər qarşısında çıxış edib. Çıxışına Allahın adı və müqəddəs Quran ayələri ilə başlayan səfir müavini də öncə tədbir iştirakçılarını salamlayıb, biliyin insan həyatında böyük rol oynadığını qeyd edərək yeni dərs ilinin başlanması münasibəti ilə şagird və müəllimlərə təbriklərini çatdırıb. Biliyin insanların yalnız ümumi dünyagörüşünü deyil, həm də mənəvi keyfiyyətlərini inkişaf etdirdiyini deyən Abdullah Casim Al-Şamsi bunlardan birinin də dini əqidəsindən, milli mənsubiyyətindən asılı olmayaraq insanlar arasında mehriban münasibətlərin yaranması olduğunu vurğulayıb. Qeyd edib ki, bu baxımdan Azərbaycan kimi Birləşmiş Ərəb Əmirlikləri də burada yaşayan müxtəlif xalqların nümayəndələri üçün tolerant bir mühit yaratmışdır. Millətlər arasında harmoniyanın əsasını mədəniyyət, müxtəlif insanların dini inanclarına sayğılı münasibət təşkil edir.

"Biz müsəlmanıq, dinimiz İslamdır. İslam isə dini ekstremizmi qəbul etmir. Əksinə, başqalarını da əməkdaşlığa dəvət edir. Bütün bu dəyərlər Ərəb Əmirlikləri dövlətinin qurucusu mərhum Şeyx Zahid bin - Sultan əl- Nahyanın siyasəti idi. Onun davamçıları olan hazırkı rəhbərliyimiz də ölkəmizin qapılarını yeni proqressiv ideyalar üçün müxtəlif insanların üzünə açmışdır. Belə nümunəvi tolerant siyasət ölkələrin inkişafına, xalqlar arasında dostluq münasibətlərinə xidmət edir", - deyən səfir müavini çıxışının sonunda fürsətdən istifadə edərək Azərbaycan xalqına sülh və əmin-amanlıq, davamlı tərəqqi arzulayıb.

Tədbirdə iştirak edən Bilik Fondunun beynəlxalq layihələr sektorunun müdiri Ziyad Məmmədzadə çıxışında Fondun məram və məqsədlərindən, reallaşdırdığı və dəstək verdiyi layihələrdən söz açıb.

Sonda 158 nömrəli məktəbin direktoru Mehriban Ələkbərdova təhsil işçiləri üçün əziz bir gündə məhz onların məktəbini seçdiyinə, şagirdlər qarşısında maraqlı çıxışına görə BƏƏ səfirinin müavini Abdullah Casim Al-Şamsiyə minnətdarlığını bildirib. Dost ölkənin təhsil müəssisələri ilə əlaqə yaratmaq arzusunu dilə gətirən direktor bu işdə yardımçı olmasını səfir müavinindən xahiş edib.

Tədbirdən sonra cənab Abdullah Casim Al-Şamsi 158 nömrəli məktəblə tanış olub, bir neçə I sinfə baş çəkərək şagirdlərə yenicə başladıqları təhsil yolunda uğurlar arzulayıb.

Tədbirdə Yasamal Rayon İcra Hakimiyyəti başçısının müavini Təravət Muradova iştirak edib.

Yusif ƏLİYEV

Azərbaycan müəllimi.- 2015.- 19 sentyabr.- S.7.