Gənclər “Vətənin müdafiəsinə hazıram!”

ruhunda tərbiyyə olunur

Azərbaycan gənclərinin vətənpərvər ruhda tərbiyyə edilməsi istiqamətində işlər davam etdirilməkdədir. Olduqca müsbət haldır ki, bu işdə əsas aparıcı qüvvəni dövlət qurumları öz üzərlərinə götürüblər. Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti fəaliyyət istiqamətinə uyğun olaraq, Azərbaycan Respublikası vətəndaşlarının hərbi-vətənpərvərlik tərbiyəsinin, yeniyetmə və gənclərdə vətəndaşlıq hisslərinin yüksəldilməsi, onların Azərbaycanın müstəqilliyi və ərazi bütövlüyü uğrunda mübarizəyə hazırlıq ruhunda tərbiyə edilməsi məqsədi ilə mütəmadi olaraq ictimai tədbirlər həyata keçirir.

Xidmətin 2016-cı il üçün fəaliyyət planına əsasən, 27 may 2016-cı il tarixdə Goranboy Rayon İcra hakimiyyəti ilə birgə "Vətənin müdafiəsinə hazıram!" mövzusunda tədbir keçirilmişdir. Tədbirdə rayon İcra Hakimiyyətinin nümayəndələri, Səfərbərlik və Hərbi Xidmətə Çağırış üzrə Dövlət Xidmətinin Goranboy rayon şöbəsinin şəxsi heyəti, orta məktəblərin yuxarı sinif şagirdləri, şəhid ailələrinin üzvləri, Qarabağ müharibəsinin veteranları iştirak etmişlər. Tədbir Azərbaycan Respublikasının Dövlət Himninin səsləndirilməsi ilə başlanılmış, daha sonra Azərbaycan Respublikasının ərazi bütövlüyü və suverenliyi uğrunda şəhid olmuş vətəndaşlarımızın xatirəsi bir dəqiqəlik sükutla yad edilmişdir. Tədbiri giriş sözü ilə açan Goranboy rayon İcra Hakimiyyətinin başçısı Nizaməddin Quliyev bildirmişdir ki, gənclərin vətənpərvərlik ruhunda tərbiyə edilməsində belə tədbirlərin rolu böyükdür. Səfərbərlik və Hərbi Xidmətə Çağırış üzrə Dövlət Xidməti rəisinin müavini general-mayor Novruzəli Orucov çıxışında təmas xəttində aprel ayının əvvəllərində baş vermiş döyüşlərdə Azərbaycan ordusunun düşməni ağır məğlubiyyətə uğradaraq regionun ən güclü ordusu olduğunu sübut etdiyini vurğulamışdır.Tədbirdə şəhid ailəsinin nümayəndəsi, veteranların nümayəndəsi, çağırışaqədərki hazırlıq rəhbəri, eləcə də "Çağırışaqədərki hazırlıq" fənnində yüksək nailiyyət göstərən şagird mükafatlandırılmışdır.Tədbirin bədii hissəsində Goranboy rayonunun müxtəlif məktəblərinin şagidləri və vətənpərvərlik mahnılarının mahir ifaçısı Şəmistan Əlizamanlı vətənpərvərlik mövzusunda tərtib edilmiş proqramla çıxış etmişlər. Azərbaycanın Müdafiə Nazirliyi də vətənpərvərlik ideyalarının təbliği istiqamətində ardıcıl tədbirlər həyata keçirir. Belə tədbirlərdən biri də Silahlı Qüvvələrin Baş Qərargah rəisi komandirlərin şəxsi heyətlə iş üzrə müavinləri ilə görüşüdür. Silahlı Qüvvələrin Təlim və Tədris Mərkəzində Əlahiddə Ümumqoşun Ordu, birlik, birləşmə və hərbi hissə komandirlərinin, xüsusi təyinatlı təhsil müəssisələri rəislərinin şəxsi heyətlə iş üzrə müavinləri ilə keçirilən təlim-metodik toplantıda Silahlı Qüvvələrin Baş Qərargah rəisi general-polkovnik Nəcməddin Sadıkov iştirak edib. General-polkovnik N.Sadıkov iştirakçıları Müdafiə naziri general-polkovnik Zakir Həsənovun adından salamlayaraq mənəvi-psixoloji hazırlıq işinin yüksək səviyyədə təşkili, tabelikdə olan hərbi qulluqçuların milli-mənəvi dəyərlər, vətənpərvərlik ruhunda tərbiyə edilməsi, eləcə də şəxsi heyətin təhlükəsizlik qaydalarına əməl etməsi və digər vacib məsələlərlə bağlı fikirlərini onların diqqətinə çatdırıb. Azərbaycan Respublikasının Prezidenti, Ali Baş Komandan İlham Əliyevin orduya göstərdiyi diqqət və qayğıdan söz açan Baş Qəraragah rəisi xeyli sayda yeni hərbi şəhərciklərin istifadəyə verilməsini, ordunun arsenalına müasir döyüş vasitələri, silah-sursat və yeni avadanlıqların daxil edilməsini də xüsusi vurğulayıb.

Döyüş və mənəvi-psixoloji hazırlıq işinin daha da gücləndirilməsi ilə bağlı Müdafiə nazirinin tapşırıqlarını şəxsi heyətə çatdıran Baş Qərargah rəisi Silahlı Qüvvələrdə şəxsi heyətin rifahı naminə həyata keçirilən islahatlar və quruculuq işlərinin davam etdiriləcəyini də qeyd edib. Məhz bu kimi tədbirlərin nəticəsidir ki, gənclərin orduya çağırışı yüksək səviyyədə təmin olunur. Bayıl yaşayış sahəsindəki Sovet İttifaqı Qəhrəmanı Qafur Məmmədovun adını daşıyan parkda Səbail rayonundan olan çağırışçıların bir qrupunun həqiqi hərbi xidmətə yola salınmasına həsr olunmuş ənənəvi tədbir keçirilmişdir. Səbail Rayon rəhbərliyi, rayonun hüqüq-mühafizə orqanlarının, pedaqoji işçilərin, ağsaqqallar, gənclərin, müharibə veteranlarının, rayon ictimaiyyətinin, rayonda yerləşən hərbi hissələrin və Hərbi Dəniz Qüvvələrinin şəxsi heyətinin nümayəndələrinin Səfərbərlik və Hərbi Xidmətə Çağırış üzrə Dövlət Xidmətinin Səbail rayon idarəsinin zabit və əməkdaşlarının, çağırışçılar, onların valideynləri, həmçinin bu ay ordudan tərxis olunmuş səbailli gənclərin iştirakı ilə keçirilən tədbirin əvvəlində tədbir iştirakçıları Sovet İttifaqı Qəhrəmanı Qafur Məmmədovun parkda ucaldılmış büstünün önünə tər çiçəklər düzmüşlər. Hərbi Dəniz Qüvvələrinin orkestrin ifasında Azərbaycan Respublikasının Dövlət Himni səslənmişdir. Səbail Rayon İcra Hakimiyyəti Başçısının müavini Eldar Ağayev bu gün hərbi xidmətə yollanan çağırışçıları, onların valideynlərini təbrik etdi və bildirdi ki, vətənə xidmət etmək həm müqəddəs, şərəfli, həm də çox məsuliyyətli vəzifədir. Milli Ordumuzun bu ilin aprel ayında qazandığı qələbədən sonra ölkəmizin hər bir vətəndaşında, xüsusilə də gənclərdə böyük rüh yüksəkliyi yaranmışdır. Aprel qələbəsi ordumuzun gücünü, bacarığını bütün dünyaya nümayiş etdirdi. Bu Azərbaycan Prezidenti, Silahlı Qüvvələrin Ali Baş Komandanı cənab İlham Əliyevin ölkədə ordu quruculuğu sahəsində apardığı siyasət və həyata keçirdiyi işlərin düzgünlüyünü və vacibliyini bir daha sübüt etdi. Qeyd olundu ki, Prezident İlham Əliyev Ermənistan-Azərbaycan və Dağlıq Qarabağ münaqişəsinin həlli və ölkənin ərazi bütövlüyünün bərpa olunması istiqamətində qəti və prinsipial mövqe nümayiş etdirir. Onun yürütdüyü bu siyasət yeganə düzgün, alternativsiz və müvəffəqiyyət qazandıracaq siyasətdir və səbaillilər bu siyasəti yekdilliklə dəstəkləyirlər. Eldar Ağayev gəncləri hərb sənətinin sirlərinə dərindən yiyələnməyi, komandirlərin tapşırıq və əmrlərini vaxtında və dəqiq yerinə yetirilməyi, Azərbaycan əsgəri adını daima ucu tutmağı tövsiyə etdi. Səfərbərlik və Hərbi Xidmətə Çağırış üzrə Dövlət Xidmətinin Səbail rayon idarəsinin rəisi, polkovnik Polad İbrahimov qeyd etdi ki, ordu hər bir millətin qüruru, dövlətin güvənc yeridir. Ölkənin varlığı onun yenilməz və möhkəm ordusundan asılıdır. Azərbaycan Pezidenti, Ali Baş Komandan cənab İlham Əliyev tərəfindən ordu quruculuğu sahəsində görülən işlər, ordumuzun ən müasir silah, texnika və avadanlıqlarla təchiz olunması, ordudakı ruh yüksəkliyi bu gün hərbi xidmətə yollanan gənclərimizin qarşısında mühüm vəzifələr qoyur. Biz əminik ki, bu gün Azərbaycan ordusu öz Ali Baş Komandanının rəhbərliyi ilə işğalçı qüvvələri zəbt olunmuş torpaqlarımızdan çıxarmağa hər an hazırdır. Tədbirdə çıxış edən YAP Səbail rayon təşkilatının sədri, Milli Məclisin deputatı Şəmsəddin Hacıyev, II Dünya müharibəsi veteranı Əli Nəsirov, 51 saylı orta məktəbin direktoru Lətafət Səmədova, valideyn Ənvər Abdullayev çağırışçılara orduda xidmət kimi şərəfli missiyanın yerinə yetirilməsində uğurlar arzulayıb, tövsiyə və məsləhətlərini verdilər. Çağırışçı Qismət Süleymanov hamıya minnətdarlığını bildirərək öz ləyaqətli xidmətləri ilə Səbail rayonunun adını yüksək tutacaqlarına söz verdi. Sonra çağırışçılara və ordudan yenicə tərxis olan gənclərə xatirə hədiyyələri təqdim olundu. Çağırışçılar marş sədaları altında Azərbaycan Resublikasının Dövlət Bayrağını öpərək hərbi hissələrə yollandılar. YAP Gənclər Birliyinin sədri, partiyanın Siyasi Şurasının üzvü Seymur Orucov deyib ki, hər bir cəmiyyətin dinamikliyini qiymətləndirirəkən gənclərin potensialının necə səfərbər olunmasına, onların müasir qlobal çağırışlara hansı səviyyədə cavab verməsinə xüsusi diqqət yetirilir. S.Orucov bildirib ki, cəmiyyətin ən dinamik təbəqəsi olan gənclər siyasi, iqtisadi, humanitar, mədəni və digər çağırışlara cavab verməklə həm beynəlxalq inteqrasiya prosesinə mühüm töhfələr verirlər, həm də cəmiyyət daxilində sabitliyin, təhlükəsizliyin, ahəngdarlığın təmin olunmasına xüsusi rol oynayırlar. Onun sözlərinə görə, gənclərin qlobal çağırışlara adekvat cavab verməsi məsələsindən bəhs edərkən, ilk növbədə, müasir dövrdə qarşıya çıxan çağırışların xarakteristikasına, mahiyyətinə diqqət yetirmək lazımdır: "Müasir dövrdə, qloballaşma şəraitində hər bir cəmiyyətin qarşısında duran başlıca vəzifələrdən biri milli-mənəvi dəyərlərin qorunub saxlanması və müasir dəyərlərlə sintez olunmasıdır. Çünki qloballaşma prosesinin geniş vüsət aldığı indiki dövrdə milli-mənəvi dəyərlərin sıradan çıxması və ya "dəyərsizləşmə" sindromunun meydana çıxdığı müşahidə edilir. Belə olan halda, milli dəyərlərin qorunması və bunun əsasında gənclərin inkişafı və tərbiyəsinin təmin edilməsi strateji bir zərurətə çevrilir. Bu məsələnin Azərbaycan təcrübəsinə gəlincə, dövlətin yüksək səviyyəli diqqət və qayğısının fonunda mütəmadi olaraq inkişaf edən Azərbaycan gəncliyi həm milli-mənəvi dəyərlərin mənimsənilməsində, həm də təbliğində aktiv - dinamik təbəqə kimi çıxış edir. Əlbəttə, burada mədəniyyətin, tarixi dəyər və zənginliklərin beynəlxalq miqyasda təbliğ olunması da mühüm istiqamətlərdən biridir. Əsas məsələ isə budur ki, Azərbaycan gəncliyi bu kontekstdə dövrün tələb və reallıqlarına uyğun surətdə çevik və səmərəli fəaliyyət mexanizmi ilə milli inkişafa töhfələr verməlidir. Bu, ölkə gəncliyi qarşısında başlıca çağırış kimi çıxış edir".

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 20 iyul.- S.15.