Görkəmli oftalmoloq
alimin
xatirəsinə musiqi
çələngi
Onu Milli
Konservatoriyanın nəzdində Musiqi Kollecinin tələbələri ərməğan
edib
Bəzən deyirlər ki, bizim həyatdan gedən müqtədir ifaçılarımızı, tar, kaman, qarmon, qaboy ustalarımızı əvəz edən, onlar kimi sənətinin zirvəsinə ucalanlar daha çətin ola. Habillər, əhsənlər, zakirlər bir də çətin yetişə. Əlbəttə, belə deyil. Və bunun belə olmadığına əminlik üçün elə bircə dəfə Milli Konservatoriya nəzdində Musiqi Kolleci tələbələrinin konsertində iştirak etmək kifayətdir. Kollecin müxtəlif kurslarında oxuyan istedadlı tələbələrin ifalarını elə bircə dəfə dinləmək bəs edər ki, onların gələcəkdə sənətimizin habilləri, əhsənləri, zakirləri olacağına inanasan. Əminəm ki, kollecin say-seçmə tələbələrinin aprelin 26-da Rəşid Behbudov adına Azərbaycan Dövlət Mahnı Teatrında verdikləri növbəti konsertin zaldolusu dinləyici - tamaşaçıları da elə bu fikirdə olarlar.
Nəsimi Rayon İcra Hakimiyyəti ilə Musiqi Kollecinin birgə təşəbbüs və təşkilatçılığı ilə keçirilən konsert görkəmli oftalmoloq alim, akademik Zərifə Əliyevanın xatirəsinə həsr olunmuşdu. Konsertdən öncə təşkilatçı qurumların rəhbərləri söz söylədilər.
Nəsimi Rayon İcra Hakimiyyətinin başçısı Asif Əsgərov akademik Zərifə Əliyevanın həyat yolundan, alim, həkim kimi xalqımız, dövlətimiz qarşısındakı xidmətlərindən, tibb elmimizə verdiyi töhfələrdən danışdı, ulu öndərimizə sədaqətli həyat yoldaşı və sirdaş olduğunu xatırlatdı. Dedi ki, xalqımız özünün görkəmli alim qızının xatirəsini daim əziz tutur, anadan olmasının ildönümlərində ölkənin hər yerində, eləcə də rəhbəri olduğu rayonda silsilə tədbirlərlə yad edilir. Asif Əsgərov son günlər rayonun bir neçə tədris müəssisəsində Zərifə xanım Əliyevanın xatirəsinə həsr olunmuş maraqlı tədbirlərdə iştirak etdiyini, həmin tədbirlərin təşkili və məzmunundan razı qaldığını vurğuladı. Musiqi Kolleci tələbələrinin hazırladıqları konsert proqramını da bu tədbirlər silsiləsində dəyərli halqa olduğunu qeyd etdi.
Musiqi Kollecinin direktoru, əməkdar incəsənət xadimi, professor Nazim Kazımov konsert iştirakçılarını salamladı, qonaqları təqdim etdi. Keçirdikləri bir çox tədbirlərə rayon icra hakimiyyətindən dəstək aldıqlarını deyən Nazim müəllim kollecin beynəlxalq musiqi tədbirlərində uğur qazanmış tələbələrinin icra hakimiyyəti tərəfindən mükafatlandırıldığını da diqqətə çatdırdı. Professor Nazim Kazımov kolleclərinin təxminən 200 tələbəsinin qatıldığı bu konsert proqramının insanlara nur bəxş edən görkəmli oftalmoloq-alim, akademik Zərifə Əliyevanın doğum gününə həsr olunduğunu, tələbələrin tədbirə hazırlaşmasında, ümumiyyətlə, onların böyük ənənələri olan kollecdə sevib-seçdikləri sənətlərinin incəliklərinə yiyələnməsində müəllimlərin böyük rolu olduğunu bildirdi. Nəzərə çatdırdı ki, son illər kollecin məzunlarından 50 nəfərdən çoxu beynəlxalq və respublika müsabiqələrinin laureatı olmuş və hazırda kollecdə öz müəllimləri ilə çiyin-çiyinə çalışır.
Konsert kollecin
simli alətlər orkestrinin
çıxışı ilə başladı. Soltan Hacıbəyovun
“Skertso” əsəri ifa olundu. Ardınca beynəlxalq
müsabiqələr laureatı,
IV kurs tələbəsi
Günel Ələkbərli
Asəf Zeynallının
“Muğamsayağı”sını tamaşaçılara təqdim
etdi. Digər bir beynəlxalq
müsabiqə laureatı
Kazım Nicat Fəxri əməkdar incəsənət xadimi Əlibala Rzayevin müşayiəti ilə
Sevil Əliyevanın
“Ana” mahnısını oxudu.
Akademik Zərifə Əliyevaya həsr olunmuş mahnıda mehriban, qayğıkeş, övladları
üçün günəş
kimi yanan ana tərənnüm olunur. “Muğam-2017” televiziya müsabiqəsinin
iştirakçısı, III kurs tələbəsi Nərgiz Nuriyevanın ifa etdiyi “Qatar təsnifi” alqışlarla
qiymətləndirildi.
Konsertdə daha sonra proqrama
uyğun olaraq kollecin nəfəs və zərb alətləri orkestrinin, xalq çalğı alətləri ansamblının,
xor kollektivinin ifalarında bir-birindən
maraqlı nömrələr
tamaşaçılara təqdim
olundu. Tələbələr Azərbaycan və
dünya bəstəkarlarının
əsərlərini özlərinə
məxsus ustalıqla və məharətlə ifa etdilər. Çoxunun böyük səhnədə
ilk çıxışı olan tələbələrin
ifaları tamaşaçı
auditoriyası tərəfindən
hər dəfə alqışlarla qarşılandı.
Beləcə kollec daha bir uğurlu konsert layihəsini öz tarixinə yazdı.
Sonda onu da qeyd
edək ki, konsertdə kollecin müəllim və tələbə heyəti
ilə yanaşı çoxlu sayda qonaq - Təhsil Nazirliyinin Elm, ali və orta ixtisas
təhsili şöbəsinin
müdir müavini Kərim Mikayılov, Azərbaycan Dövlət İqtisad Universitetinin prorektoru Şaiq Əsgərov, Azərbaycan
Dövlət Pedaqoji Universitetinin prorektoru Asəf Zamanov, Nəsimi Rayon İcra Hakimiyyəti başçısının
birinci müavini Gülarə Verdiyeva, tanınmış incəsənət
ustaları, media təmsilçiləri
iştirak edirdilər.
Yusif ƏLİYEV
Azərbaycan müəllimi.-
2017.- 29 aprel.- S.10.