Dünyanın ən nüfuzlu universitetləri

Onların arasında Bakı Dövlət Universiteti də yer alıb

Məlum olduğu kimi, qəzetimizin 8 iyun tarixli sayında Böyük Britaniyanın “Times Higher Education” (THE) jurnalının tərtib etdiyi dünyanın ən yaxşı universitetlərinin reytinq sıralaması dərc olunub. THE-nin ardınca Böyük Britaniyanın “QS World University Rankings” nəşri də dünyanın ən nüfuzlu ali məktəblərinin 2019-cu il üzrə növbəti reytinqini açıqlayıb. Bütövlükdə QS reytinqinə 1000 ali məktəb daxil olub, onlar ümumi qiymətləndirmədə xüsusi çəkisi olan altı meyar üzrə qiymətləndirilib: akademik mühitdə nüfuz (40%), müəllim-tələbə nisbəti (20%), sitatgətirilmə indeksi (20%), işəgötürənlər arasında nüfuzu (10%), əcnəbi müəllimlərin sayı (5%) və əcnəbi tələbələrin sayı (5%). Reytinq tərtib olunarkən 85 ölkədən 4000 -dən artıq ali məktəbə aid məlumatlar təhlil olunub. Tərtibçilər 14 milyondan artıq elmi məqaləni təhlil edib və 97 milyon sitatgətirilməni nəzərə alıb, 43 min işəgötürən və akademik cəmiyyətin 83 min üzvü arasında sorğu aparıblar.

Qlobal reytinqə artıq 7 ildir ki, ABŞ-ın Massaçusets Texnologiya İnstitutu liderlik edir. Asiyanın ən nüfuzlu ali məktəbi 11-ci yerdə olan Sinqapurun Milli Universitetidir. Reytinqin top 400-lüyünə Çinin 40 ali məktəbi daxil olub.

M.V.Lomonosov adına Moskva Dövlət Universiteti ən yaxşı 100 universitet arasında 90-cı yeri tutub. Onun rəqibləri olan ali məktəblər sıralamanın top-250-liyinin sonlarında yerləşib. Məlumata görə, MDU əvvəlki illə müqayisədə öz mövqeyini 5 sıra yaxşılaşdırıb. Beləliklə, MDU ilk 100-lükdə yer alan yeganə Rusiya ali məktəbidir. Bütövlükdə reytinqə Rusiyadan 27 universitet daxil olub. Moskva Dövlət Universitetinin ən yaxın rəqibi olan Sankt-Peterburq Dövlət Universiteti 235-ci, Novosibirsk Dövlət Universiteti 244-cü, Tomsk Dövlət Universiteti 244-cü, Bauman adına Moskva Dövlət Texniki Universiteti 299-cu yerlərdədir. QS-in nümayəndəsi Zoya Zaytsevanın sözlərinə görə, Rusiya ali məktəbləri üçün yeganə “Axilles dabanı” elmi məqalələrdən sitatgətirmə indeksidir. “Bu indikator üzrə Rusiya universitetlərindən heç biri top-800-lüyə daxil ola bilməyib, bu isə olduqca kədərli haldır. Digər tərəfdən, bu, yaxın gələcəkdə Rusiya üçün strateji prioriteti göstərir”, - deyə Z.Zaytseva qeyd edib. Qeyd edək ki, dünyanın nüfuzlu ali məktəblərinin siyahısında ölkəmizi Bakı Dövlət Universiteti təmsil edib. BDU reytinqdə 801-1000 arasında yer alıb.

Oruc MUSTAFAYEV

Azərbaycan müəllimi.- 2018.- 22 iyun.- S.6.