Gələcəkdə peşəkar rəssam olacağam”

 

Güldanə Pənahova: “Bütün rəsmlərimə öz fantaziyamı əlavə edirəm”

 

Onun adı Güldanə, soyadı isə   Pənahovadır. Yaşı az olmasına baxmayaraq o, yaradıcılıq potensialı ilə məşğul olduğu rəsm dərnəyində həmyaşıdlarından çox fərqlənir. Bu yaşda  rəssamlıq sənəti sahəsində qazandığı  kifayət qədər uğurlar barədə onun öz dilindən eşitdiklərimiz əminlik yaradır  ki, əsl istedad özünü elə erkən yaşlarında  büruzə verir...   Mənim 10 yaşım var. Bakıdakı 160 nömrəli Klassik Gimnaziyanın IV sinfində təhsil alıram. Dərs əlaçısıyam.  Məktəbimizdə keçirilən  bütün tədbirlərdə  fəal iştirak edirəm. 5 yaşımdan  3 nömrəli Uşaq-Gənclər İnkişaf Mərkəzinin rəsm  dərnəyinin üzvüyəm. Müəllimim  Nərmin  Abdullayevadan rəngkarlıq sənətinin  sirlərini dərindən öyrənməyə çalışıram. Rəsm çəkərkən çox   sərbəst oluram, fantaziyamdan məharətlə istifadə edirəm. Artıq 50-yə yaxın rəsm əsərlərim  mövcuddur.

 

İsti rənglərdən daha çox istifadə edirəm. Təbiət vurğunuyam.  Gəzintiyə  çıxmazdan əvvəl  həmişə hansı tablonu yaradacağımı ölçüb-biçirəm. Dağ, ağac, dağ-dərə mənzərəsi  gördükdə fırçamı əlimə alıb qaralama edirəm ki, sonra onu canlı tabloya çevirə bilim. “Meşədə”, “Bulaq başında”, “Dağlar”, “Gəzinti”, “Təbiətin qoynunda”, “Yaz fəslində”, “Novruz atributları”, “Balıqlar” və sair rəsmlərimi çəkərkən rəngli  boyalara daha çox  üstünlük verirəm. Canlı təbiəti təsvir edərkən parlaq rənglərin effekti daha yaxşı olur. Bu illər ərzində respublika  və beynəlxalq rəsm yarışmalarında iştirak edərək çoxlu sayda diplom və fəxri fərmanlar qazanmışam. İşlədiyim  rəsmlər  tamaşaçılar və  müəllimlərim tərəfindən  bəyənilib. Dostluqdan bəhs edən “Dostluğun sehri” adlı rəsmimi isə məktəbimizə hədiyyə  etmişəm. Sonuncu  dərsimiz  rəssam Qustav Klimtinin “Ana və uşaq” rəsm əsərlərinə həsr olunmuşdu. Həmin rəssamın əsərlərinə baxdıqca baxmaq istəyirsən. Mən onları köçürüb evdə başımın üstündən asmışam. Hər gün  bu canlı tabloların qarşısında dayanıb ana-övlad münasibətlərinin incəlikləri  təzahür olunan rəsmlərin sehrinə düşürəm və bu rəsmlərdəki fantaziyanı, dərin fəlsəfəni dərk etməyə çalışıram. 

 

Arzum fərdi sərgimi keçirməkdir

 

 Ən böyük arzum fərdi sərgimi təşkil etməkdir. Bunun üçünsə   gecə-gündüz  əzmkarlıqla  çalışıram. İnanıram ki, yaxın vaxtlarda  istəyimə nail olacağam. Çünki təvazökarlıqdan uzaq olsa da özümə çox güvənirəm, bilirəm ki, yalnız çalışqanlıqla bunlara nail olmaq olar. Mən  hər hansı bir rəsmi çəkib qurtardıqdan sonra ona tamaşaçı gözü ilə baxıram, əgər zövqümü oxşamırsa cırıb tullayıram, ya da rənglərində dəyişiklik edib normal hala salıram. Rəsmlərim arasında  “Orkestr” adlı bir rəsmim var. Çox maraqlı bir rəsmdir. Müxtəlif millətlərin uşaqlarını öz  milli geyimində birgə rəqs edən təsvir etmişəm. ATV Qalereyada keçirilən “İstedadlı gənclərimiz” sərgisində də bir-birindən rəngarəng rəsmlərim nümayiş olunub.  1 iyun - Uşaqları Beynəlxalq  Müdafiə Günü  “Tolerantlığımızın gələcəyi, 6-16 yaşlı uşaqları” adlı uşaq və yeniyetmələrin yaradıcılıq sərgisində, “Mənim düşüncəm” adlı uşaq rəsm sərgi-müsabiqəsinin yekun sərgisində rəsmlərim sərgilənib. “Dostluğun sehri” I Beynəlxalq Uşaq Rəsm Müsabiqəsində I, “Ölkəmizin adət və ənənələri” yarışmasında isə II yerləri tutmuşam.  

 

Həyatımda ən əlamətdar gün

 

Əgər mənə sual versələr ki, həyatında ən əlamətdar gün  nə vaxt olub,  məmnuniyyətlə 2017-ci ilin yanvarın 29-da mərkəzimizin uşaqlarının beynəlxalq  müsabiqədə nailiyyət qazandıqları günü deyərəm. Ümumiyyətlə, mərkəzimizin nailiyyətləri çoxdur. Dərnək üzvləri  nəinki şəhər, respublika  əhəmiyyətli tədbirlərdə, hətta beynəlxalq müsabiqə və sərgilərdə, festival və  bayramlarda  fəal iştirak edirlər. Yeniyetmə və gənc rəssamlar   uğurlarını artırmaqda davam edirlər. Onlar ABŞ, İngiltərə,Yaponiya,Türkiyə, İordaniya, Norveç, Yunanıstan, Polşa, Çexiya, Rusiya, Ukrayna, Belarus, Sloveniya, Hindistan, Finlandiya və digər ölkələrdə keçirilən beynəlxalq rəsm müsabiqə və sərgilərdə yüksək nailiyyətlər əldə edərək qızıl, gümüş, bürünc medallar, diplom və fəxri fərmanlar qazanıblar.

 

Hər iki müsabiqənin qalibi oldum

 

Dostlarıma fəxarətlə söyləyərdim ki, beynəlxalq müsabiqələrdə qaliblərin sırasında mənim də adım var.  Belə ki, Hindistanda  keçirilən  beynəlxalq gənclər və uşaqların rəsm sərgisində çəkdiyim rəsmlər  münsiflər heyəti tərəfindən bəyənilib və xüsusi diploma layiq görülüb. Yaponiyada  keçirilən “Planetimizi qoruyaq” adlı 18-ci beynəlxalq rəsm müsabiqəsində isə rəsmlərim I yerə və qızıl medala layiq  görülüb. Bax, beləcə hər iki beynəlxalq müsabiqədə qələbə qazanaraq ikili sevinc yaşadım.

 

Mükafatlandırma mərasimində

 

Mərasimdə çoxlu qonaqlar vardı.  Onlar da qazandığımız uğurlardan söz açır, gələcəkdə  daha gözəl rəsmlər çəkməyimizi, sərgilərimizin  keçirilməsini arzulayırdılar. Mərkəzin direktoru Lalə Qəti isə məzunları ilə qürur duyduğunu,  beynəlxalq müsabiqə və  festivallarda əldə etdikləri nailiyyətlərdə mərkəzin müəllimlərinin əməyinin çox olduğunu vurğuladı.  Bildirdi  ki, sənət yarışmasında  qazanılan hər bir uğur dərnək üzvlərini daha fəal olmağa, gözəl sənət əsərləri yaratmağa ruhlandırır. Qazanılan hər bir uğur mərkəzin fəaliyyətinə verilən qiymət kimi dəyərləndirilir.

 

Vaxtımı səmərəli istifadə edirəm

 

Anam  Azərbaycan Dillər Universitetində  italyan dili üzrə tərcüməçi və müəllim işləyir. Qardaşım  Rasim mənim təhsil aldığım məktəbin 1-ci sinfində oxuyur. Anamın vaxtı az olduğundan  dərslərini hazırlamaqda ona  köməklik edirəm. Qardaşım  pianoda  ifa etməyi də çox xoşlayır. ARB telekanalında “Günəş” verilişinə dəvət almışdım. Mən özüm haqda, çəkdiyim rəsmlər barədə  danışdım. Gələcəkdə peşəkar rəssam olacağıma söz  verdim. Mədəniyyət kanalında da “Dərsdən sonra” verilişində 3-4 dəfə  çıxış  etmişəm. Sosial şəbəkələrdən istifadə etmirəm. Vaxtımdan səmərəli istifadə etməyə çalışıram. Məktəb kitabxanasının üzvüyəm. Çoxlu bədii ədəbiyyat oxuyuram. Sonuncu oxuduğum kitablardan biri “Balaca şahzadə”dir. İngilis dilini də öyrənirəm.

Rəsm müəllimi Nərmin Abdullayevanın dediklərindən: - Güldanə ilə 5 yaşından  məşğul oluram.  Hələ balaca bir qız ikən o, çalışqanlığı ilə mənim hədsiz sevgimi qazandı. Ozünə inamı artırmaq üçün mən ona öz karandaşlarımı verib deyirdim ki, bunlar sehrlidir, çəkdiyin rəsmlər daha gözəl olacaq. O da bundan ilhamlanıb daha gözəl rəsmlər çəkərdi. Artıq Güldanənin 10 yaşı var. Ötən bu illər ərzində  böyuk uğurlara imza atıb. Bir çox sərgi və müsabiqələrin  iştirakçısı və diplomantıdır.  2016-cı ildə keçirilən “Dostluğun sehri” adlı sərgi müsabiqəsində  I yerə,  2017-ci ildə isə  “Vətənimin adət və ənənələri” adlı sərgi müsabiqəsində  II yerə layiq görülüb.

...Bizə isə  yeniyetmə rəssama gələcək fəaliyyətində bol-bol uğurlar diləmək qalır. Uğurlar isə bir-birini əvəz etməkdə, davam etməkdədir.

 

Sifai SƏFƏROVA

 

Azərbaycan müəllimi.- 2018.- 16 mart.- S.14.