ADNSU-da Milli Mətbuat Günü qeyd olunub

İyulun 18-də Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı 22 iyul - Milli Mətbuat Günü münasibətilə kütləvi informasiya vasitələrinin (KİV) nümayəndələri ilə görüşüb.

Jurnalistləri rəhbərlik etdiyi ali məktəbdə görməkdən məmnunluğunu bildirən rektor medianın cəmiyyətin inkişafı üçün müəyyən lokomotiv funksiyasını daşıdığını qeyd edib. Jurnalistikanın mahiyyətində də bu faktorun durduğunu vurğulayan M.Babanlı medianın gələcəyi barədə fikirlərini bölüşüb. Onun sözlərinə görə, dünyanın sürətlə dəyişdiyi indiki dövrdə jurnalistlər bu sahənin peşəkarları olmalıdır. Ona görə də mövcud reallıqlar şəraitində adi jurnalist olmaq kifayət etmir. Rektor M.Babanlı hesab edir ki, buna görə də ali məktəblərdə müvafiq ixtisas sahələrində həm də peşəkar jurnalist bacarıqlarına yiyələnmiş media nümayəndələrinin yetişdirilməsi də faydalı olardı.

Rektor əlavə edib ki, Azərbaycanın bugünkü uğurlarında jurnalistlərin də böyük əməyi var. “Mən hesab edirəm ki, istənilən cəmiyyətin dəyişilməyə ehtiyacı olan birinci sahəsi təhsildir. Əgər cəmiyyət təhsilini daim dəyişdirib inkişaf etdirirsə, o cəmiyyətin gələcəyi var” deyən rektor Azərbaycan təhsil sistemində aparılan islahatlardan, əldə olunan uğurlardan söz açıb, Prezident İlham Əliyevin təhsilə və mətbuata daim xüsusi önəm verdiyini vurğulayıb.

Rektor son illərdə ADNSU-da aparılan islahatlardan, yeniləşən tədris mühitindən, elmin, təhsilin inkişafı istiqamətində həyata keçirilən tədbirlərdən, əldə olunan uğurlardan danışıb. Professor M.Babanlı ölkəmizdə medianın azad, demokratik şəraitdə fəaliyyətinə geniş imkanlar yaradıldığını söyləyərək Milli Mətbuat Günü münasibətilə jurnalistləri təbrik edib. Tədbirdə iştirak edən media nümayəndələri işgüzar universitet - media münasibətlərinin, əməkdaşlığının qurulmasına görə ADNSU rəhbərliyinə minnətdarlıq edərək Milli Mətbuat Günü münasibətilə təşkil olunmuş görüş üçün təşəkkürlərini bildiriblər.

Sonra jurnalistlərə hədiyyələr təqdim olunub.

Azərbaycan müəllimi.- 2019.-19 iyul.- S.3.