Təhsil Nazirliyində "Azərbaycan Milli Valideyn-Müəllim Assosiasiyasının strateji inkişafı" mövzusunda konfrans keçirilib

Dekabrın 19-da Təhsil Nazirliyində nazirlik, Milli Valideyn-Müəllim Assosiasiyası, YUNİSEF və "ümidli gələcək" Gənclər Təşkilatının "Azərbaycan Milli Valideyn-Müəllim Assosiasiyasının strateji inkişafı" mövzusunda birgə konfransı keçirilib.

Konfransı giriş sözü ilə açan təhsil naziri Misir Mərdanov qonaqları və toplantı iştirakçılarını salamladıqdan sonra tədbirin əlaqədar təşkilatlarla birgə keçirilməsinin vacibliyini və bunun ümumi işə xeyir gətirəcəyini diqqətə çatdırıb. Son zamanlar silsilə tədbirlərin keçirildiyini və bu konfransın da həmin tədbirlər sırasında olduğunu vurğulayan nazir bütün bunların Azərbaycan təhsilinin inkişafına xidmət etdiyini bildirib.

Müstəqil Azərbaycan Respublikasına layiq gənclərin yetişməsi və tərbiyə olunması üçün beynəxalq təcrübələri öyrənmək məqsədilə Azərbaycanın təhsil işçilərinin dünyanın inkişaf etmiş ölkələrinin öyrətmə kurslarında iştirak etdiyini qeyd edən nazir, bununla dünyada gedən prosesləri görmək və yaxşı nəticə çıxararaq onları Azərbaycanda tətbiq etmək məqsədinin güdüldüyünü diqqətə çatdırıb. Beynəlxalq təcrübələrdən daha önəmlisi sayılan Valideyn-Müəllim Assosiasiyalarının yaradılması hələ 2000-ci ildən məqsəd kimi qarşıya qoyulsa da, müəyyən səbəblər üzündən prosesin ləngiməsini qeyd edən Misir Mərdanov VMA-nın təhsilə gətirəcəyi xeyiri tədbir iştirakçılarına açıqlayıb. O, tədrisin keyfiyyətini yüksəldən əsas şərtlərdən birinin valideynlərin təhsilə marağını artırmaqdan ibarət olduğunu bildirib. Həmçinin valideyn-müəllim münasibətinin tənzimlənməsinin təhsildə keyfiyyətin təmin edilməsində əsas amillərdən biri olduğunu qeyd edən nazir deyib:

Son illərin təcrübəsi göstərir ki, harada valideynlərin məktəbin idarəolunmasında iştirakı, təhsilin məzmununa müdaxiləsi, məktəbin rəhbərliyi və müəllimlə sıx əlaqəsi varsa, həmin təhsil ocağında tədris yüksək səviyyədə aparılır, şagirdlərin mənimsəmə faizi artır, təhsil inkişaf edir, heç bir söz-söhbətə, neqativ hallara yer qalmır.

Bu baxımdan bu gün konfransına yığışdığımız Milli VMA-nın əhəmiyyəti böyükdür. Biz bu işə Təhsil Nazirliyi ilə YUNİSEF-in birgə layihəsi əsasında başlamış və YUNİSEF-in o zamankı rəhbərliyinin bizə ayırdığı maliyyə hesabına bu işə marağı olan insanları müxtəlif ölkələrin təlim kurslarına göndərmiş və nəhayət, az sayda olsa da, məktəblərdə belə birlikləri yaratmağa müyəssər olmuşuq.

Natiq ötən müddət ərzində 1000-ə qədər məktəbin Milli Valideyn-Müəllim Assosiasiyasına üzv olduğunu və təhsil ocağında VMA-nı yaratdığını qeyd edib, bunu son 4-5 il ərzində görülən işlərin ən ciddi nəticəsi kimi qiymətləndirib. Bu sayın respublikada fəaliyyət göstərən məktəblərin 25 faizini təşkil etdiyini və qalan məktəblərin də VMA-nın işinə qoşulacağına əminliyini bildirən nazir, yaxın zamanda ali və orta ixtisas təhsili ocaqlarının müəllimlərinin də bu xeyirxah işdə yaxından iştirak edəcəklərinə ümidvar olduğunu bildirib.

Qarşıdan gələn "31 Dekabr Dünya Azərbaycanlılarının Həmrəyliyi Günü" və Yeni il münasibətilə qonaqları və konfrans iştirakçılarını təbrik edən Misir Mərdanov Milli VMA-nın təqdimatı ilə qurumun fəaliyyətində yaxından iştirak edən fəal təhsil işçilərindən 7 nəfərə Təhsil Nazirliyinin Fəxri fərmanını, 13 nəfərə isə "Qabaqcıl təhsil işçisi" döş nişanını təqdim edib.

Konfransda çıxış edən YUNİSEF-in Azərbaycandakı nümayəndəliyinin rəhbəri Mark Herevart övladlarından birinin hazırda Bakı şəhər orta məktəblərinin birində təhsil aldığını və bu təhsil ocağında, ümumiyyətlə Azərbaycanda təhsilin inkişafına verilən önəmdən razı qaldığını bildirib. O, həmçinin Azərbaycanda Milli VMA-nın daha geniş yayılacağını və inkişaf edəcəyinə əmin olduğunu qeyd edib.

Tədbirdə qurumun işindən və gələcək planlarından məlumat verən Milli VMA-nın icraçı direktoru Təranə Şərifova onunla birgə dəyərli iş fəaliyyəti quran təhsil işçilərindən Quba şəhər 1 nömrəli orta məktəbin direktoru Yavər Musayevanın, Masallı rayonunun Musaküçə kənd orta məktəbinin müəllimi Firuzə Babayevanın, Bakı şəhərindəki 28 və 46 nömrəli orta məktəblərin direktorları Gülarə Verdiyevanın, Sevinc Budaqovanın və başqalarının işindən razılıq edib, göstərilən köməkliyə görə şəxsən təhsil naziri Misir Mərdanova təşəkkürünü bildirib.

"Ümidli gələcək" Gənclər Təşkilatın prezidenti Nabil Seyidov monitor vasitəsilə Milli VMA-nın həyata keçirdiyi işləri və gələcək planları haqqında konfrans iştirakçılarını məlumatlandırıb.

Tədbirdə çıxış edən digər natiqlər Milli VMA-nın təhsilin inkişafında mühüm rol oynayacağından danışıb, qurumun fəaliyyətinə lazımi köməkliyin göstərilməsinin vacibliyini vurğulayıblar.

Təhsil Nazirliyi ilə Azərbaycan Milli Valideyn-Müəllim Assosiasiyasının birgə fəaliyyəti barədə memorandum imzalanıb. Memorandumu təhsil naziri Misir Mərdanov və Milli VMA-nın icraçı direktoru Təranə Şərifova imzalayıblar.

Nizami MİRZƏ

Azərbaycan müəllimi.-2009.-25 dekabr.-S.2.