Avstriyanın Qratz Universitetində təhsil alacaq tələbələrlə görüş keçirilib

Dekabrın 28-də Azərbaycan Dillər Universitetində Avstryanın Qratz Universitetində təhsil alacaq tələbələrlə görüş keçirildi.

Tədbirdə ADU-nun rektoru, professor Səməd Seyidov öncə tələbələri və valideynləri Yeni il ərəfəsində bu əlamətdar bayram münasibətilə təbrik etdi. Azərbaycan-Avstriya əlaqələrinin yüksələn xətt üzrə inkişaf etdiyini deyən natiq əlavə etdi ki, ADU-nun Avstriya universitetləri ilə sıx əlaqələri mövcuddur. Avstriya Avropanın mədəniyyət mərkəzi olduğu kimi, Qratz da Avropanın dillər mərkəzidir. Bizim tələbələrimizin belə bir ölkədə və bu cür universitetdə təhsil alması cox sevindirici bir haldır. ümid edirəm ki, bu əməkdaşlıq davam edəcək və gələcəkdə Avstriya universitetləri ilə daha da sıx əlaqələr quracağıq.

Təhsil nazirinin müavini Elmar Qasımov tələbələri və universitetin əməkdaşlarını təbrik etdi və qeyd etdi ki, Qratz Avstriyanın dillər mərkəzi olduğu kimi, ADU da Azərbaycanın dillər mərkəzidir. Daha sonra nazir müavini Elmar Qasımov Azərbaycanda alman dilini bilən kadrlara ehtiyacın olduğunu söylədi və bu ehtiyacın ödənilməsi üçün mütəmadi olaraq belə layihələrin həyata keçirilməsini təqdirəlayiq bir hal kimi qiymətləndirdi.

Sonra Avstriyanın Azərbaycandakı müvəqqəti işlər vəkili xanım Ziqlinde Şpanland bu cür əlamətdar hadisələrin ölkələrarası mədəni və digər əlaqələrin genişlənməsinə təkan verəcəyinə inandığını dedi və ADU-nun əlaqələrinin gələcəkdə Avstriyanın digər universitetləri ilə də qurulmasını vacib hesab etdi.

Tədbrin sonunda Qratz Universitetində təhsil alacaq tələbələr və onların valideynləri çıxış edərək öz ürək sözlərini və minnətdarlıqlarını bildirdilər.

Şakir CƏFƏROV

Azərbaycan müəllimi.-2009.-31 dekabr.-S.5.