Bilik yarışının qalibləri mükafatlandırıldı

Bakıdakı 46 nömrəli orta məktəbdə BMT-nin Uşaq Hüquqları Konvensiyasının 20-ci ildönümünə həsr olunmuş "Uşaqlara sevinc bəxş edək" layihəsi əsasında tədbir keçirildi.

Məktəbin direktoru Sevinc Budaqova "Uşaq ili" çərçivəsində keçirilən tədbirlərin uşaqların dünyagörüşlərinin artmasında, şəxsiyyətlərinin formalaşmasında,mənəvi dünyalarının zənginləşməsində,yaradıcılıq keyfiyyətlərinin aşkarlanmasında, həmçinin bilik və bacarıqlarının üzə çıxarılmasında mühüm rol oynadığından bəhs etdi. Xüsusilə vurğuladı ki, Heydər Əliyev Fondunun prezidenti, millət vəkili Mehriban xanım Əliyevanın uşaqlara göstərdiyi diqqət və qayğının nəticəsidir ki, bu gün idman,mədəniyyət və incəsənət sahəsində qazanılan uğurlara yeniyetmə və gənclərlə bərabər uşaqlar da imza atırlar.

Sonra paytaxtın 31,35,46,60,150,164 nömrəli məktəblərini təmsil edən II sinif şagirdləri arasında ingilis dilində bilik yarışına start verildi. Bu yarışmada ingiliscə dialoqlar,şeirlər,mahnılar,şəkil üzrə danışıqlar, qısahəcmli cümlələr və s. dinlənildi.

Sonda bilik yarışmasının nəticələri qiymətləndirildi. Qalib komanda 164 nömrəli məktəbin ikinciləri elan olundu. Onlara hədiyyələr paylandı.

Azərbaycan müəllimi.-2009.-4 dekabr.-S.8.