Təhsil Nazirliyi ilə
"Microsoft" şirkəti arasında
Anlaşma Memorandumu imzalandı
Dekabrın 10-da Təhsil
Nazirliyində Azərbaycan
Respublikasının Təhsil
Nazirliyi ilə
"Microsoft" şirkəti arasında "Təhsildə
əməkdaşlıq" proqramı üzrə Anlaşma Memorandumu imzalandı. İmzalanma mərasimində "Microsoft" şirkətinin Orta və Qərbi Avropa üzrə "Təhsildə əməkdaşlıq"
proqramının rəhbəri
Teodor Milev,
"Microsoft Azərbaycan" şirkətinin baş direktoru Teymur Axundov, həmin şirkətin təhsil proqramları rəhbəri
Emin Axundov, nazirliyin rəhbərliyi və əməkdaşları,
bu sahədə nazirliklə əməkdaşlıq
edən şirkətlərin
rəhbərləri, İKT ilə bağlı layihənin həyata keçirilməsində xüsusi yeri olan məktəblərin
rəhbərləri, müəllimlər
və KİV nümayəndələri
iştirak edirdilər.
Mərasimi açan təhsil naziri Misir Mərdanov zala toplaşanları salamlıyıb Təhsil Nazirliyi ilə
"Microsoft" şirkəti arasında əməkdaşlıq
və bu əməkdaşlıq əsasında
görülmüş birgə iş haqqında qısa məlumat verdi. Nazir qeyd
etdi ki, hələ üç il öncə
"Microsoft" şirkəti ilə "Təhsildə
əməkdaşlıq" proqramı çərçivəsində
2006-2009-cu illəri əhatə
edən Memorandum imzalanmışdır.
Onun vaxtı qurtardığı
üçün növbəti belə bir sənədin
imzalanması zərurətə
çevrilmişdir. Yeni memorandum 2010-2013-cu illəri əhatə edir.
Misir Mərdanov bildirdi ki, proqram üzrə
birgə əməkdaşlıqda
əsas məqsəd təhsildə İKT-nin tətbiqidir. "Təhsildə
əməkdaşlıq" proqramı "İnnovativ
məktəblər", "İnnovativ müəllimlər",
"İnnovativ şagirdlər"
kimi 3 istiqaməti əhatə edir.
"İnnovativ müəllimlər"
istiqaməti çərçivəsində
indiyədək "Uşaqların
İnternetdə təhlükəsizliyi"
mövzusunda müvafiq tədris vəsaiti hazırlanaraq dərc olunub və bu mövzuya həsr
olunmuş tədbirlər
reallaşdırılıb.
"İnnovativ şagirdlər"
istiqaməti üzrə bir sıra ölkəmiqyaslı
şagird informasiya texnologiyaları müsabiqələrinə
("Gənc Kompüter İstedadları", "Gənc
İnformatik", "Skilis
Vork") dəstək
göstərilib.
Dünya üzrə həyata keçirilən "İnnovativ
məktəblər" proqramında
ilk Azərbaycan məktəbinin
iştirakına imkan yaradılıb. Bu proqramda iştirak üçün 110-dan artıq ölkədən ərizə göndərilsə
də, onların arasından 31 məktəb
seçilib və Bakının 7 nömrəli orta məktəbi Braziliyanın Salvador şəhərində
keçirilən "İnnovativ
məktəblər" Forumunda
iştirak edib.
Nazir onu da vurğuladı ki, Təhsil Nazirliyi ilə
"Microsoft" şirkəti arasında imzalanmış
"Məktəb sazişi"
çərçivəsində məktəblərə
paylanan kompüterlər güzəştli qiymətlə
lisenziyalı "Microsoft Vindovs"
əməliyyat sistemi
və "Microsoft Office" proqram dəsti ilə təchiz olunub. Nazir bütün bunların
Azərbaycan hökumətinin,
ölkə Prezidentinin diqqət mərkəzində
duran məsələlər
olduğunu və onlara xüsusi əhəmiyyət
verildiyini diqqətə
çatdırdı. Bildirdi ki,
son bir neçə ildə bu istiqamətdə
çox böyük addımlar atılıb,
DATA mərkəzi yaradılaraq
500-dən çox məktəb
İnternet şəbəkəsinə
qoşulub. Gələn
il bu
işin başa çatdırılması nəzərdə
tutulur.
"Microsoft" şirkətinin Orta və Qərbi Avropa üzrə "Təhsildə əməkdaşlıq"
proqramının rəhbəri
Teodor Milev mərasimdə söz alaraq birgə əməkdaşlığa və
onun davam etdirilməsinə göstərdiyi
marağa görə Təhsil Nazirliyinə minnətdarlıq etdi, şirkətlərinin bu əməkdaşlıqdan məmnun
olduğunu, imzalanacaq sənəddən çox şey gözlədiklərini
bildirdi.
Sonra təhsil
naziri Misir Mərdanov və
"Microsoft" şirkətinin Orta və Qərbi
Avropa üzrə "Təhsildə əməkdaşlıq"
proqramının rəhbəri
Teodor Milev Anlaşma Memorandumunu imzaladılar.
Yusif ƏLİYEV
Azərbaycan müəllimi.-2009.-11 dekabr.-S.4.