Meksika Universitetində Xocalı faciəsinə həsr edilmiş konfrans keçirilib

Latın Amerikasının ən böyük ali təhsil ocağı hesab olunan Meksika Milli Muxtar Universitetində Xocalı faciəsinə həsr olunmuş "Onların yeganə günahı azərbaycanlı olmaq idi" mövzusunda konfrans kecirilib. AzərTAc-ın məlumatına görə, universitetin siyasi və sosial elmlər fakültəsində təşkil edilən tədbirə professor və tələbə heyəti üzvləri, Meksika Xarici islər Nazirliyi və Senatının nümayəndələri qatılıblar. Universitetin Beynəlxalq Münasibətlər Mərkəzinin elmi katibi Marko Lopategi giriş sözündə Azərbaycan xalqı və hökümətinə Xocalı faciəsinin ildönümü ilə bağlı başsağlığı verib. O bildirib ki, bütün beynəlxalq ictimaiyyət kimi Meksika da Dağlıq Qarabağ münaqişəsinin tezliklə həll edilməsini arzulayır. Azərbaycanın Meksikadakı diplomatik nümayəndəliyinin müvəqqəti işlər vəkili İlqar Muxtarov geniş məruzə edib. İ.Muxtarov 1992-ci il fevralın 25-26-da Xocalı şəhərində baş verən faciənin ermənilərin işğalçı və cinayətkar siyasətinin bir hissəsi olduğunu xatırladıb: "Xocalıda həyata kecirilənlər qəddarlıq erməni terrorunun əsas xüsusiyyətinə uyğun idi. Ermənilər adətən qurbanlarına həddən-artıq əzab vermək məqsədilə onları müxtəlif işgəncələrlə öldürürlər. Erməni rəsmiləri, Xocalı faciəsi də daxil olmaqla, münaqişə zamanı etdiyi cinayətlərə görə məsuliyyəti danır və beynəlxalq ictimaiyyətə hadisələri öz yozumlarında çatdırmağa çalışırlar. Lakin hec bir uydurma təbliğat faktlar qarşısında dayana bilməz. Ermənilərin azərbaycanlılara qarşı törətdiyi vəhşiliklərin hər biri xalqımızın ürəyinə sancılan bir tikandır. Bu hadisələr heç zaman unudulmayacaq. Azərbaycan münaqişənin sülh yolu ilə həllini axtarsa da, Xocalıdakı dəhşətli cinayətləri həyata kecirənləri ədalət mühakiməsi qarşısına gətirməkdə qətiyyətlidir".

Toplantı zamanı Xocalı faciəsi haqda Heydər Əliyev Fondunun hazırladığı sənədli film və Xocalı qurbanlarını əks etdirən fotosərgi nümayiş etdirilib.

Yeni Azərbaycan.- 2009.- 17 fevral.- S.5.