"Uşaq ili"nə həsr edilmiş xeyriyyə konserti və qaliblərin mükafatlandırılması

Noyabrın 19-da Azərbaycan Milli Konservatoriyasının nəzdində fəaliyyət göstərən Respublika İncəsənət Gimnaziyasının akt zalında 2009-cu ilin "Uşaq ili" elan edilməsi münasibətilə qaçqın və məcburi köçkün ailələrin uşaqları üçün xeyriyyə konserti verilib. Konsert Təhsil Nazirliyinin tabeliyində fəaliyyət göstərən uşaq yaradıcılığı mərkəzlərinin dərnək üzvlərinin iştirakı ilə həyata keçirilib.

Həmçinin tədbirin rəsmi hissəsində "Uşaq ili"nə həsr edilmiş inşa yazı müsabiqəsinin respublika turunda qalib gəlmiş 8 şagird diplomlar və müxtəlif hədiyyələrlə mükafatlandırılıblar.

Təhsil Nazirliyinin şöbə müdiri Ağababa İbrahimov çıxış edərək ümummilli lider Heydər Əliyevin uşaqlara göstərmiş olduğu qayğıdan söz açıb, hazırda həmin siyasəti uğurla davam etdirən Prezident İlham Əliyevin uşaqların və yeniyetmələrin firavan yaşamaları üçün imzaladığı bir sıra fərman və sərəncamların həyata keçirilməsindən danışıb.

Körpələrin və uşaqların yaxın dostu, Heydər Əliyev Fondunun prezidenti, millət vəkili Mehriban xanım Əliyevanın bu istiqamətdə apardığı xeyriyyə işlərinin gələcəyimizin layiqli davamçıları olacaq uşaqların xoşbəxt böyümələrinə xidmət etdiyini xüsusi vurğulayan A.İbrahimov iştirakçılar adından Prezident İlham Əliyevə və xanımı Mehriban xanım Əliyevaya səmimi minnətdarlığını bildirdi.

Rəsmi hissədən sonra şagirdlərin ifasında rəngarəng konsert nömrələri alqışlarla qarşılandı.

N.MİRZƏ

Azərbaycan müəllimi.-2009.-20 noyabr.-S.6.