Culfanın
Nəhəcir abidələr kompleksi
Eramızdan
əvvələ aid qədim qala
Nəhəcir
Culfa rayonunun yaxınlığında eyni adlı kəndin ərazisində
yerləşən abidələr kompleksidir. Tədqiqatçılar
kəndin ərazisində qədim insan məskəni, qədim
qəbiristan və bu qəbiristanda daşdan təbii qoç
fiqurları aşkar etmişlər. Bu kənd eyni zamanda toponim
baxımından da diqqəti çəkir.
Bəzi tədqiqatçılara
görə, kəndin əsl adı Nuhəcərdir. Oykonim Nuh
və fars dilindəki cir (yamac, maili yer) sözlərindən
ibarət olub, “Nuhun yamacı” mənasındadır. Bu
mülahizəni irəli sürən tədqiqatçılar
Naxçıvan zonasında geniş yayılmış Nuh
haqqında əfsanəyə əsaslanırlar. Kəndin
yaxınlığındakı Nəhəcir qayasının məşhur
Gəmiqaya dağının yaxınlığında
olması da buna əsas verir. Naxçıvanda Nuh
mağarası, Nuhdaban, Nuh gəmisinin qayası və s. adlar
da Nuhəcir toponimi ilə əlaqələndirilir. Amma tədqiqatçıların
bir qismi bu fikirdədir ki, oykonim Nəxcir adının təhrif
olunmuş formasıdır. Ərəb dilində nəxcir “vəhşi
keçi, ov heyvanı, şikar” deməkdir. Həmin fərziyyəyə
əsaslanan tədqiqatçılar bu mənanı kəndin ərazisindəki
təbii qoç fiqurları ilə əlaqələndirirlər.
Nəhəcir
abidələr kompleksi Nəhəcir dağının ətəyi
boyunca uzanır. Burada aşkara çıxarılmış
yerüstü tapıntılara Orta Tunc dövrünə aid
boz və çəhrayı rəngli keramika, bu dövrə
aid boyalı qablar, o cümlədən Orta əsr
materialları aiddir. Təbiət hadisələri nəticəsində
baş verən aşınmada Sahədə meydana gələn
kəsiklərdə daşdan hörülmüş tikinti
qalıqları, boyalı qablar, əmək alətləri və
osteoloji qalıqlar da aşkara çıxmışdır.
Buradakı
mədəni təbəqənin qalınlığı 3 metrdən
artıqdır. Qədim abidə sahəsindən toplanan
materiallar həvənglər, dəstələr, dən
daşları, oraq dişləri, monoxrom boyalı qablardan ibarətdir.
Kompleksin ən
maraqlı abidələrindən biri qədim Nəhəcir
qalasıdır. Bu, Nəhəcir dağının coğrafi
- strateji cəhətdən əlverişli olan hündür və
sıldırım qayalı cənub hissəsi üzərində
yerləşən qaladır. Tarixi e.ə.
II minilliyə-I minilliyin əvvəllərinə aid edilir. Qədim
qala 2001-ci ildə
Naxçıvan arxeoloji ekspedisiyası tərəfindən
aşkar edilmişdir.
Qala ərazisində
həmin dövrə aid bazalt daşından
hazırlanmış balta, kiçik həcmli daş həvəng
- dibək, qara, boz və çəhrayı rəngli qab
qırıqları tapılmışdır. Burada həmçinin
Nəhəcir qalası ilə eyni dövrə aid olan
dağıdılmış kurqandan e.ə. II minilliyin əvvəllərinə
aid monoxrom boyalı gil qablar aşkar edilmişdir. Dağın
cənub və şərq ətəklərindəki terraslarda
iri qaya parçalarından siklop tipli müdafiə sədləri
tikilmişdir. Bu müdafiə divarlarının eni 2-2,5 m-dir.
Qalanı Nəhəcir dağının cənub ətəyindəki
düzən sahədə yaşamış və iqtisadi, mədəni
cəhətdən inkişaf etmiş qədim tayfalar
düşmən basqınlarından müdafiə məqsədi
ilə tikmişlər.
Gəmiqaya rəsmləri ilə eyni təsvirli
tapıntı
Burada tədqiqatçı
alimlər araşdırma aparılan sahələri mövqe
baxımından müəyyən hissələrə
ayırmışlar. I Nəhəcir
Nəhəcir kəndinin şimal-şərqində yerləşən
Tunc dövrünə aid yaşayış yeridir. Tarixi ərazi
şimaldan Nəhəcir dağı, cənubdan Nəhəcir
kəndi ilə dövrələnir. Qeydə alınan sahə
10 ha, buradakı mədəni təbəqənin qalınlığı
3 m-dir. Yaşayış yerindən axtarış nəticəsində
monoxrom boyalı boz, qara rəngli gil qab qırıqları, dən
daşları sürtgəclər, həvəngdəstələr
və sair aşkara çıxarılmışdır.
O cümlədən,
buradan tapılmış şirli monoxrom boyalı qablardan
birinin üzərində maraqlı təsvir nəzərə
çarpır. Qara boya ilə əks olunmuş təsvir
xırdabuynuzlu heyvanın boğazına bağlanmış
ipdən tutan kişini canlandırır. Rəsmdəki
adamın duruşu elədir ki, burada bəsit təsərrüfat
- məişət səhnəsini təsəvvür etmək
çətindir. Amma ən maraqlısı odur ki, kişinin əlləri
yuxarıya - səmaya doğru qalxmışdır. Alimlərin
fikrincə, bu ayin, çox güman ki, Azərbaycanın orta
Tunc dövrü tayfalarının etiqadını göstərir.
O cümlədən, bu ayin səhnəsi Gəmiqayadakı rəsmlərlə
tam eyniyyət təşkil edir. Tapıntıların təhlilinə
əsaslanan mütəxəssislər, əlverişli
coğrafi və strateji mövqedə olan bu yaşayış
yerinin ərazisində insanların e.ə. III minilliyin
sonlarından məskunlaşmağa
başladığını ehtimal edirlər. Abidələr kompleksinə daxil
olan daha bir obyekt də I Nəhəcir nekropoludur. Bu, I Nəhəcir
yaşayış yerinin şimal qurtaracağında yerləşən
Tunc dövrünə aid arxeoloji abidədir.
Nekropol ərazisində
daş və torpaq kurqanlardan Azərbaycanın Boyalı Qablar
mədəniyyətinin ilk mərhələsi (e.ə. 22-18-ci əsrlər)
üçün səciyyəvi olan monoxrom boyalı küplər,
cızma və basma naxışlı boz və qara rəngli
saxsı qablar və s. əldə edilmişdir.
Aşkar
edilmiş monoxrom qabların üzəri dalğalı və
sınıq xətlər, həndəsi fiqurlar
(üçbucaq, dairə vəs.) insan və heyvan rəsmləri
ilə bəzədilmişdir. Tapıntılar
arasındakı boyalı qabların üzərində rast gəlinən
heyvan, quş və adam rəsmləri motivinə,
ölçülərinə və sxematikliyinə görə
Gəmiqaya rəsmləri ilə eyniyyət təşkil edir.
II Nəhəcir və III Nəhəcir
II Nəhəcir Culfa rayonunun Nəhəcir kəndinin qərbində
yerləşən orta əsrlərə aid arxeoloji abidədir.
Abidə şimaldan Nəhəcir dağı ilə məhdudlaşır
və onun yamacı boyunca ensiz zolaq şəklində
şimaldan şərqə doğru uzanır. Bu abidədə
1991-ci ildə AMEA-nın Naxçıvan Regional Elmi Mərkəzinin
arxeoloji ekspedisiyası tərəfindən kəşfiyyat
xarakterli tədqiqatlar aparılmış və çoxlu
materiallar toplanmışdır.
Burada qədim
tikinti qalıqlarına, iki yerdə böyük kül təpəsinə
təsadüf edilmiş, çəhrayı rəngli küpə
tipli şirsiz və şirli saxsı qab qırıqları
tapılmışdır ki, onlar həndəsi və nəbati
naxışlarla bəzədilmiş formadadır.
II Nəhəcir
nekropolu da II Nəhəcir yaşayış yerinin qərb tərəfində
uzunsov təpənin üzərində yerləşir. Orta əsrlərə
aid olan bu nekropoldakı qəbirlər qərb-şərq
istiqamətindədir. Tədqiq olunan nekropolda daşdan təbii
böyüklükdə çoxlu qoç fiqurları (XV-XVI əsrlər)
aşkara çıxarılmışdır. Qəbirüstü
abidələr olan bu fiqurların üzəri müxtəlif rəsm
və işarələrlə bəzədilmişdir.
III Nəhəcir
isə Nəhəcir kəndindən qərbdə, Qahab kəndi
yaxınlığında yerləşən Dəmir
dövrünə aid yaşayış yeridir. Bu abidə də
1990-cı ildə AMEA-nın Elmi Mərkəzinin arxeoloji
ekspedisiyası tərəfindən qeydə alınmış
və sahədə kəşfiyyat xarakterli tədqiqatlar
aparılmışdır. Hazırda yaşayış yerində
yonulmamış qaya parçalarından iki cərgə
düzbucaqlı planda inşa edilmiş böyük binanın
qalıqları saxlanmışdır. Tapılan yerüstü
materiallar çəhrayı və boz rəngli gil qab
qırıqlarından ibarətdir. Alimlər III Nəhəcir
yaşayış yerinin e.ə. VI-IV əsrlərə aid
olduğunu ehtimal edirlər.
“Azadlıq”ın
Araşdırmaçı Jurnalistlər Qrupu KİV-ə
Dövlət Dəstəyi Fondunun maliyyə dəstəyilə
çap edilir
Azadlıq.- 2012.- 1 sentyabr.- S.14.