Tarixin yaradıcılarından biri
- Uzun Həsən
Qüdrətli
Ağqoyunlu dövlətinin banisi
Azərbaycan
tarixində əfsanəvi şəxsiyyətlərdən biri sayılan Uzun Həsən
Ağqoyunlu dövlətinin banisi, görkəmli sərkərdə və
dövlət xadimi olmuşdur.
Mənşəcə Oğuz türklərindən
olan sərkərdə boyunun
ucalığına görə “Uzun Həsən”
ləqəbini almışdır.
Tarixdə
silinməz iz qoyan Həsən bəy Bayandur 1423-cü ildə
anadan olmuşdur. Qara Yuluq Osman Bəyin nəvəsidir.
Tarixçilərin yazdığına görə, Uzun Həsənin
uşaqlıq və gənclik illəri barədə heç
nə məlum deyil. Bircə o ehtimal edilir ki, Uzun Həsən
yaxşı təhsil almış və yenicə yaranan
Ağqoyunlu dövlətinin hərbi təlimlərində
iştirak etmişdir.
O,
güclü bir sərkərdə kimi Ağqoyunlu
tayfalarını birləşdirib,
Dəclə və Fərat çaylarının
yuxarı axarı boyunca paytaxtı
Diyarbəkirdə yerləşən kiçik bir ərazidə
öz hakimiyyətini qurur və o vaxtdan da adı tarixə
düşür.
Uzun Həsən
Osmanlı imperiyası, Venesiya
Respublikası, Böyük Moskva Knyazlığı, Qızıl
Orda, Polşa, Avstriya, Macarıstan, Çexiya, Almaniya,
Papalıq, Burqundiya, Neopolitan Krallığı, Rodos, Kipr,
Qaraman bəyliyi, Misir, Hindistan və başqa dövlətlərlə
diplomatik münasibətlər saxlamışdır. Amma hər
tərəfdən düşmənlərlə əhatə
olunmuş bu kiçik dövlətin başçısı
öz müttəfiqlərini Osmanlı
imperiyasının Avropaya doğru genişlənməsindən
qorxuya düşən qərb dövlətləri arasında
axtarır. Beləliklə, o, öz müşavirləri vasitəsilə
bir neçə Avropa ölkəsi ilə ona odlu silah
yardımı göstərilməsi barədə
danışıqlar aparır. Nəzərdə tutulan bu
yardım Qara dənizÿ və
Aralıq dənizi vasitəsilə
Uzun Həsənin müttəfiqi, Ağqoyunlu tayfaları ilə
qədimdən əməkdaşlıq edən yunan Trapezund
imperiyası üzərindən keçib gəlməli idi.
Amma
Osmanlılar buna imkan vermək istəmir və 1453-cü ildə
Fateh II Mehmet tərəfindən Konstantinopol işğal olunduqdan sonra Trapezund
imperiyasını məhv etmək qərarına gəlirlər.
Uzun Həsən buna mane olmaq istəsə də, Osmanlı
qoşunlarının Ağqoyunlu ərazisinə müdaxiləsi
onu məcbur edir ki, sülh xahişi ilə onlara müraciət
etsin. Bununla, Osmanlıların Yastıçəmən yaylağında
yerləşən düşərgəsinə Uzun Həsənin
anası Sara xatunun başçılığı ilə
elçilər yollanır. Sara xatun mahir bir diplomat kimi öz
ölkəsindən çox-çox uzaqlarda da
tanınmışdı. O, bu dəfə də öz vəzifəsinin
öhdəsindən gəlir - sülh bağlanır. Bu
sülhün şərtlərinə görə, Uzun Həsən
osmanlıların Trapezundu işğal etməsinə mane
olmamalı, osmanlılar isə onun dövlətinin ərazisindən
çıxmalı idilər.
Danışıqlara
əməl etmək üçün II Mehmet Trapezund üzərinə
hücuma keçərkən Sara xatunu və onun
başçılıq etdiyi heyəti də özü ilə
götürür. 1461-ci il oktyabrın 26-da Trapezundun
mühasirəsi qələbə ilə nəticələnir.
Sara xatun sultanı inandıra bilir ki, Trapezund
çarlığının xəzinəsindəki sərvətin
bir hissəsi onun gəlini Dəspinə xatuna
çatmalıdır və həmin iri məbləği də
götürüb, özü ilə vətənə
aparır.
“Padşah Həsənin qanunları”...
Amma bundan
sonra Ağqoyunlu dövləti Qara dənizdən keçən
ənənəvi ticarət yolunu itirmiş olur. Bundan sonra
osmanlılar Uzun Həsənin digər bir müttəfiqini -
Qaraman bəyliyini də tutub, onu faktiki olaraq Aralıq dənizinə
çıxışdan da məhrum edirlər. Osmanlı ilə
münasibətlərdə gərginlik artır. Osmanlılar
Qaraqoyunlu Cahanşah Həqiqini və teymurilərdən olan Əbu
Səidi Uzun Həsənlə mübarizəyə təhrik
edirlər. 1467-ci ildə Uzun Həsən gərgin savaş
sonunda Cahanşah Həqiqini məğlub edir, onun
başını kəsib, müttəfiqi Əbu Səidə, Həsənəlinin
başını isə Sultan II Mehmetə göndərir.
Bundan sonra
da teymuri Əbu Səid Azərbaycan üzərinə
hücuma keçmək planından
daşınmamışdı. Keçmiş müttəfiqi
şirvanşahın köməyinə bel bağlayan Əbu Səid
Şirvana doğru hərəkət edir. Lakin
Şirvanşah Fərrux Yasar Ərdəbil hakimi Şeyx Heydərlə
birlikdə Uzun Həsənin tərəfinə keçir və
Əbu Səidin qoşunları tamamilə mühasirəyə
alınır. Bu döyüş tarixə Mahmudabad
döyüşü kimi daxil olmuşdur. Əbu Səid
qaçmağa cəhd göstərsə də, onu tutub edam
edirlər. Həsənəli isə Uzun Həsənin oğlu
Uğurlu Məhəmmədin əlində ölür.
Bununla,
Qaraqoyunlular dövləti süqut edir, Teymurilər dövləti isə həddən artıq zəifləyir.
Uzun Həsən Azərbaycanın əsasında Qərbi İranın,
İraqın, Ermənistanın, Kürdüstanın, Diyarbəkirin,
Şərqi Gürcüstanın və digər kiçik
dövlətlərin də daxil olduğu möhtəşəm
bir dövlət qurur. Həmin dövlətin paytaxtı isə
Azərbaycanın paytaxtı Təbriz olur.
Beləliklə,
Ağqoyunlu dövlətinin tarixində yeni bir dönəm
başlayır. Amma ən güclü rəqib qalırdı,
bu, Osmanlı dövləti idi. Ölkə
iqtisadiyyatını inkişaf etdirmək üçün Uzun
Həsən bir sıra islahatlar aparır. Bunlar öz əksini
onun Qanunnaməsində tapmışdır. Sonralar bu toplu
“Padşah Həsənin qanunları” adı ilə məşhurlaşır.
Həmin qanunların həyata keçirilməsi nəticəsində
vergilərin yığılması qanuniləşir və
sistem şəklini alır, sənətkarlıq və ticarət
inkişaf edir. Uzun Həsənin xəzinəsi dolur və Azərbaycanda
möhtəşəm bir mərkəzləşdirilmiş
dövlət yaranır.
“Vikipedia”
bu tarixlə bağlı faktlara geniş yer verərək
yazır ki, ordusunun təkmilləşdirilməsi haqqında
çox düşünən Uzun Həsən bu məqsədlə
Avropadan mütəxəssislər
çağırır və nizami ordu yaratmaq istəyir. Venesiya
və başqa ölkələrdən gəlmiş mütəxəssislər
odlu silah istehsal etmək üçün ona kömək
göstərirlər. Ölkədə top istehsalına
başlanılır, topçu kadrlar hazırlanmasının əsası
qoyulur. Lakin lazımi qədər top istehsal etmək Uzun Həsənə
müyəssər olmur, topların qərbdən gətirilməsi
işi isə müxtəlif səbəblər üzündən
tez-tez pozulur.
Bundan
başqa, Uzun Həsən böyük tikinti işləri də
aparır. Onun sarayında alimlər məclisi fəaliyyət
göstərir və zəngin kitabxana yaradılır.
Kitabxanada çoxlu alim çalışır, onun nəzdindəki
emalatxanalarda isə o dövrün ən görkəmli xəttat
və rəssam-miniatürçüləri fəaliyyət
göstərirdi. Sonralar, Səfəvi şahlarından İsmayıl
və Təhmasibin zamanında həmin kitabxana genişlənir
və daha da zənginləşdirilir. Sarayda saz çalanlar
ansamblı yaradılmışdı ki, buraya da 98 aşıq
daxil idi.
Osmanlıya qarşı bir savaşlar
Uzun Həsənə
böyük ümidlər bəsləyən Avropa
düşünürdü ki, indi yalnız o, Osmanlı
imperiyasının fikrini yayındıra və onu Avropaya
doğru irəliləməkdən saxlaya bilər.
Uzun Həsən
1472-ci ilin baharında öz qoşunlarını Qaramana yeridir. Bir neçə parlaq qələbə
qazandıqdan sonra məşhur Ağqoyunlu süvariləri
Qaramanı osmanlılardan xilas edərək, Aralıq dənizinə
çıxış əldə edir. Lakin müttəfiqləri
Uzun Həsəni aldadır, nəinki ikinci cəbhəni
açmır, hətta razılaşdıqları kimi, odlu
silahı sahilə də çıxarmırlar.
Sərkərdə
Mirzə Yusif xanın başçılıq etdiyi arxa cəbhədən
aralanmış Ağqoyunlu qoşunları yeni və artilleriya
ilə təchiz olunmuş güclü Osmanlı ordusu ilə
üz-üzə qalır. Ağqoyunlu ordusu məğlubiyyətə
uğrayır və Qaraman yenidən osmanlıların əlinə
keçir. 1473-cü ilin ortalarında Venesiya ilə odlu silah təminatı
barədə yeni razılığa gələn Uzun Həsən
qoşunlarını təzədən Aralıq dənizi
sahillərinə yeridir. Bu dəfə II Mehmet
Ağqoyunluları yolda qarşılayır. Avqustun 1-də Malatya yaxınlığında
çoxdan gözlənilən döyüş
başlayır. Bu gərgin döyüş üç saata qədər
davam edir və Uzun Həsənin tam qələbəsi ilə
başa çatır. II Mehmet
sülh müqaviləsi bağlamağı təklif etsə
də, Uzun Həsən hərbi əməliyyatları davam
etdirmək qərarına gəlir. Osmanlıların qüvvələri
tükənməmiş Fərat çayının sağ
sahilləri ilə geri çəkilirlər.
Uzun Həsənin
öz qüvvələrinə arxayın olan sərkərdələri
döyüşdən on gün sonra onu inandırıb,
çayı keçmək və osmanlıları biryolluq əzmək
fikrinə gətirirlər. Bu döyüş tarixə Otluq beli vuruşu kimi daxil olub. Həmin
qələbə osmanlılara ağır başa gəlir.
Sultan hərbi əməliyyatları davam etdirmədən
İstanbula yola düşür.
Amma
onların vəd olunmuş silahları alıb, ordunu
lazımınca silahlandırmaq imkanları yenə həyata
keçmir.
1477-ci ildə
Uzun Həsən özünün son yürüşünə
- Gürcüstan üzərinə yürüşə gedir.
Oradan zəngin qənimət və 5 min nəfərlik əsirlə
qayıdır. Həmin əsirləri də öz
yaxınlarına paylayır. Elə həmin vaxtlarda Uzun Həsənin
oğlu, istedadlı sərkərdə və qalibiyyətli
yürüşlərin iştirakçısı olan
Uğurlu Məhəmməd atasına qarşı qiyam
qaldırır. Qardaşı Sultan Xəlil tərəfindən
təqib olunduqdan sonra isə Türkiyəyə
qaçır. Sultan II Mehmet orada onu ədəb-ərkanla qəbul
edir və öz qızı Kövhərxan sultanı da ona ərə
verir. Uğurlu Məhəmməd atasına qarşı
mübarizəsini davam etdirir, lakin onu tezliklə tutub edam edirlər.
Bundan az sonra - 1478-ci ilin 5 yanvarında Uzun Həsənin
özü də həyatla vidalaşır. Onu
özünün tikdirdiyi Nəsriyyə məscid kompleksində
dəfn edirlər. Bundan sonra həmin məscid “Həsən
padşahın məscidi” adlanır.
“Azadlıq”ın
Araşdırmaçı Jurnalistlər Qrupu KİV-ə
Dövlət Dəstəyi Fondunun maliyyə dəstəyilə
çap edilir
Azadlıq.- 2013.- 21 may.- S.14.