Azərbaycan və Avstriya arasında İKT sahəsində əməkdaşlıq üçün potensial imkanlar vardır

Rabitə və informasiya texnologiyaları naziri Əli Abbasov Avstriya-Azərbaycan Ticarət Palatasının (ATAZ) sədri Alon Şklarek ilə görüşmüşdür.

Nazirlikdən bildirmişlər ki, Ə.Abbasov yarandığı qısa müddətdə Avstriya-Azərbaycan Ticarət Palatasının çoxşaxəli fəaliyyətini yüksək qiymətləndirmiş, iki ölkə arasında informasiya-kommunikasiya texnologiyaları (İKT) sahəsində əməkdaşlıq üçün potensial imkanların olduğunu vurğulamış, bu istiqamətdə Avstriya şirkətlərini maraqlandıracaq milli və beynəlxalq proqramlar barədə məlumat vermişdir.

Nazir Azərbaycanda yaradılması nəzərdə tutulan regional innovasiya zonaları, Şərq-Qərb super informasiya magistralı, Azərbaycanın telekommunikasiya peykinin buraxılması layihələrini diqqətə çatdırmışdır.

ATAZ-ın sədri Alon Şklarek iki ölkə arasında İKT sahəsində işbirliyi qurulması üçün mümkün variantlar barədə danışmışdır.

Görüşdə birgə müəssisələrin yaradılması üçün investisiya qoyulması imkanları barədə təkliflər hazırlanmasının məqsədəuyğunluğu qeyd edilmişdir.

AzərTAc

Azərbaycan.- 2010.- 3 aprel.- S. 4.