Moskvada Azərbaycan muğamı gecəsi keçirilmişdir

Moskvada, Qlinka adına Dövlət Mərkəzi Musiqi Mədəniyyəti Muzeyində Azərbaycan səfirliyinin və Heydər Əliyev Fondunun Rusiya nümayəndəliyinin təşkilatçılığı ilə Azərbaycan muğamı gecəsi keçirilmişdir.

Azərbaycanın Rusiyadakı səfiri Polad Bülbüloğlu, Heydər Əliyev Fondunun RF nümayəndəliyinin başçısı Leyla Əliyeva, habelə çoxsaylı qonaqlar rəngarəng xalılardan, milli geyimlərdən, musiqi alətlərindən, Azərbaycan muğamının tarixini və müasir vəziyyətini əks etdirən kitab və vəsaitlərdən ibarət sərgiyə maraqla tamaşa etmişlər.

Rusiya mədəniyyət nazirinin müavini Andrey Busıgin təşkilatçıları və qonaqları salamlayaraq demişdir ki, Azərbaycanın musiqi mədəniyyəti incilərini Moskvada təqdim edən bu tədbir olduqca maraqlı hadisədir. O demişdir: "Hər bir xalqın özünəməxsus nadir mədəniyyəti vardır. Məhz bu mədəniyyət insanın bu və ya digər cəmiyyətə məxsus olduğunu, onun identikliyini müəyyənləşdirməyə imkan verir. Xalqlar bir-birinə ümumi cəhətlərinə görə deyil, fərqli cəhətlərinə görə maraq göstərir. Rusiya üçün də Azərbaycan mədəniyyəti olduqca maraqlıdır".

Heydər Əliyev Fondunun Moskva nümayəndəliyinin başçısı Leyla Əliyeva tədbirin təşkilatçılarına, qonaqlara, habelə Dövlət Mərkəzi Musiqi Mədəniyyəti Muzeyinin rəhbərliyinə minnətdarlığını bildirərək demişdir ki, muğam Azərbaycan xalqının sərvətidir, onun kökləri çoxəsrlik bir tarixə gedib çıxır. O demişdir: "Muğam həmişə Azərbaycanın incisi olmuşdur. Azərbaycan xalqı muğamı həmişə sevmiş və qiymətləndirmişdir. Bizim üçün muğam bir növ genetik koddur. O, dilimiz, incəsənətimiz və ədəbiyyatımızla yanaşı durur. Muğam özündə bir çox yeni musiqi janrlarını - muğam operasını, caz muğamı və s. təcəssüm etdirir. Azərbaycan mədəniyyətinin Üzeyir Hacıbəyli, Niyazi, Vaqif Mustafazadə kimi böyük xadimlərinin adları muğamla bağlıdır. Sevindirici haldır ki, son illər getdikcə daha çox gənc muğamı öyrənməyə meyil edir, yeni-yeni istedadlı muğam ifaçıları ortaya çıxır.

Bu yaxınlarda Bakıda Beynəlxalq Muğam Mərkəzinin açıldığını, elmi simpoziumun və Beynəlxalq muğam festivalının keçirildiyini xatırladan L.Əliyeva demişdir: "Çox xoşdur ki, bu tədbir Qlinka adına Dövlət Muzeyində keçirilir, çünki musiqi xalqları və millətləri birləşdirməyə qadirdir və onun üçün heç bir sərhəd yoxdur".

L.Əliyeva tədbirin ev sahiblərinə minnətdarlığını bildirərək Azərbaycanın milli musiqi alətləri olan ud və sazı Qlinka adına muzeyə hədiyyə etmişdir.

Muğam gecəsinin təşkilatçılarına və şəxsən Leyla Əliyevaya minnətdarlığını bildirən Qlinka adına Dövlət Mərkəzi Musiqi Mədəniyyəti Muzeyinin direktoru Mixail Brızqalov bu hadisəni Rusiya paytaxtının musiqi və mədəni həyatında əlamətdar hadisə adlandıraraq vurğulamışdır ki, Heydər Əliyev Fondunun hədiyyəsi olan Azərbaycanın milli musiqi alətləri muzeyin zəngin kolleksiyasında layiqli yer tutacaqdır.

Azərbaycanın Rusiyadakı səfiri Polad Bülbüloğlu Rusiya Mədəniyyət Nazirliyinə, Qlinka adına Dövlət Mərkəzi Musiqi Mədəniyyəti Muzeyinin və Heydər Əliyev Fondunun rəhbərliyinə minnətdarlığını bildirərək diqqətə çatdırmışdır ki, Leyla Əliyeva əsası ulu öndər Heydər Əliyev tərəfindən qoyulmuş ənənələri davam etdirir. Səfir bildirmişdir ki, məhz Heydər Əliyevin hakimiyyəti dövründə muğam YUNESKO-nun Qeyri-maddi mədəni irs siyahısına salınmışdır. Prezident İlham Əliyev də bu gözəl ənənəni davam etdirir. Azərbaycanın birinci xanımı, Heydər Əliyev Fondunun prezidenti Mehriban Əliyeva muğamın təbliğində böyük rol oynayır. Səfir demişdir: "Məhz onun təşəbbüsü ilə Bakıda YUNESKO-nun baş direktorunun iştirakı ilə Beynəlxalq Muğam Mərkəzinin təməli qoyulmuşdur. İki il ərzində inşa edilən mərkəzdə yüksək səviyyədə Beynəlxalq muğam müsabiqəsi və elmi simpozium keçirilmişdir. Bu, muğamın təbliğinin və onun yeni beynəlxalq üfüqlərə çıxmasının əsasını qoymuşdur. Bu, heç şübhəsiz, Mehriban xanım Əliyevanın xidmətidir".

Sonra Azərbaycan muğamının tarixi və müasir vəziyyəti haqqında sənədli film nümayiş etdirilmiş, Bakıda keçirilmiş Beynəlxalq muğam müsabiqəsinin qaliblərinin və laureatlarının iştirakı ilə konsert olmuşdur.

Asya Hacızadə,

AzərTAc-ın xüsusi müxbiri

Moskva

Azərbaycan.- 2010.- 8 aprel.- S. 4.