Rafiq Salmanovun 60 illik yubileyi qeyd edilmişdir

Aprelin 20-də R.Behbudov adına Dövlət Mahnı Teatrında Azərbaycan Jurnalistlər Birliyinin üzvü, YUNİSEF və "Qızıl qələm" mükafatları laureatı, "Xalq qəzeti"nin əməkdaşı Rafiq Salmanovun anadan olmasının 60 illik yubileyinə və "Mənim könlüm deyir ki..." kitabının təqdimatına həsr olunmuş tədbir keçirilmişdir.

Mədəniyyət və Turizm Nazirliyinin dəstəyi ilə təşkil edilmiş tədbirdə Rafiq Salmanovun 60 illik ömür yolundan, həyat və yaradıcılığından geniş söhbət açılmışdır.

Tədbirdə Milli Konservatoriyanın rektoru, xalq artisti Səyavuş Kərimi, Mədəniyyət və Turizm Nazirliyinin sektor müdiri Lətifə Məmmədova, "Xalq qəzeti"nin baş redaktoru Həsən Həsənov, BDU-nun dosenti Əli Eyvazov və başqaları çıxış edərək bildirmişlər ki, R.Salmanov hələ gənclik illərindən ədəbiyyata, musiqiyə, incəsənətin digər sahələrinə bələdçilik və məhəbbət ruhunda köklənmişdir. Söz və foto sənətinə bağlılığı isə onun həyat yolunu mətbuata yönəltmişdir. "Azərbaycan pioneri" və "Vışka" qəzetlərində, "Azərbaycan qadını" jurnalında fotomüxbir işləmiş Rafiq Salmanov 1991-ci ildən həyatını respublikanın öncül nəşrlərindən olan "Xalq qəzeti"nə bağlamışdır.

R.Salmanovun 60 illik həyatının bir növ hesabatı sayılan "Mənim könlüm deyir ki..." kitabında onun ayrı-ayrı vaxtlarda muğam ustaları, xalq və bəstəkar mahnılarının gözəl ifaçıları olan 80-dən çox sənətkar haqqında qələmə aldığı məqalə, müsahibə və oçerklər toplanmışdır.

Bildirilmişdir ki, müəllifin "Səni məndən soruşsalar", "El sevsə sənətkarı" kitablarından sonra sayca üçüncü olan bu nəşrdə həm də müasirlərinin onun haqqında düşüncələri dərc olunmuşdur.

Vurğulanmışdır ki, "MBM-R" nəşriyyatında yüksək poliqrafik üslubda işıq üzü görmüş 546 səhifəlik kitaba Azərbaycanın musiqi həyatını əks etdirən bir sıra nadir şəkillər də daxil edilmişdir.

Tədbirdə yubilyara Mədəniyyət və Turizm Nazirliyinin Fəxri fərmanı təqdim edilmişdir.

Gecədə gənc ifaçılar geniş konsert proqramı ilə çıxış etmişlər.

AzərTAc

Azərbaycan.- 2010.- 21 aprel.- S. 6.