Qərib Mehdi BMT-dən orden aldı

Uzaq eldən Gəncəyə xoş xəbər gəldi. Tanınmış yazıçı, əməkdar jurnalist Qərib Mehdi "Ədəbiyyat qarşısındakı böyük xidmətlərinə görə" Birləşmiş Millətlər Təşkilatının Beynəlxalq Mükafat Komitəsi tərəfindən "Şərəf və Vicdan" ordeninə layiq görülüb.

Ötən əsrin 60-cı illərinin əvvəllərində ədəbiyyata "İşıq" və "Qərib hey!.." adlı hekayələri ilə gələn Qərib Mehdi bu gün 33 kitabın müəllifidir. Onun əsərləri 18 xarici dilə tərcümə olunaraq dünyanın əllidən çox ölkəsinə yayılıb.

Əsasən lirik, epik və dramatik janrlara, habelə bədii publisistikaya üstünlük verir. Qərib Mehdinin "Rast", "Təmiz hava", "Çinar günü", "Müsabiqə", "Qəhqəhə", "Kentavr-lətifələr", "Oxşarlar", "Skripka üçün mi simi" adlı roman, povest və hekayələri oxucuların dərin rəğbətini qazanıb.

İncə yumorun, satirik gülüşün sarkazm dərəcəsinə qaldırıldığı hekayə və pamfletlər, müasirlərinin ciddi problemlərini müxtəlif aspektlərdən işıqlandıran bədii-publisistik əsərlər, ədəbi-tənqidi, lirik-fəlsəfi düşüncələrin orijinal ifadəsi olan müxtəlif janrlı yazılar oxucuların geniş marağına səbəb olur.

Orijinal ədəbi portret yaradıcılığı, Vətən və torpaq sevgisi, insanın mənəviyyatının ən dərin qatlarının araşdırılması, nadanlığın, nankorluğun ifşası, saflığın, sədaqətin tərənnümü Qərib Mehdinin əsərlərinin ana xəttini təşkil edir.

Ə.İSAYEV

Azərbaycan.- 2010.- 16 aprel.- S. 7.