İtaliyalı deputat parlament seçkiləri ilə əlaqədar Bakıda keçirilən beynəlxalq konfransın nəticələrini yüksək qiymətləndirmişdir

"Azərbaycanda 2010-cu il parlament seçkiləri: daha demokratik, daha şəffaf" mövzusunda Bakıda keçirilən beynəlxalq konfrans çox yüksək səviyyədə təşkil olunmuşdur. Düşünürəm ki, konfransın nəticələri də müsbət olacaqdır. Mən bunu Azərbaycan dövlətinin və hökumətinin ölkədə şəffaf, demokratik və azad seçkilər keçirmək əzmində olmasının bariz nümunəsi kimi qiymətləndirirəm".

Bu sözləri konfransda iştirak etmiş İtaliya parlamentinin ATƏT PA-dakı nümayəndə heyətinin rəhbəri Rikkardo Milyori demişdir.

İtaliya parlamentinin deputatı bu ilin noyabrında keçiriləcək parlament seçkilərinin tam demokratik və şəffaf keçiriləcəyinə inamını ifadə etmiş və bildirmişdir ki, ATƏT PA bu seçkiləri müşahidə edəcəkdir.

Rikkardo Milyori azərbaycanlı həmkarları ilə ATƏT PA çərçivəsində çox faydalı əməkdaşlıq etdiklərini bildirmişdir. O demişdir: "Azərbaycanlı deputatlar ATƏT PA-da çox fəaldırlar və biz bir çox məsələlərdə faydalı əməkdaşlıq edirik. ATƏT PA-nın bu ilin yayında keçiriləcək sessiyasında, eləcə də digər tədbirlərdə biz bir çox məsələləri müzakirə edəcəyik. Dünyada və regionda gedən proseslərə azərbaycanlı deputatların baxışı bizim üçün çox faydalıdır".

Azərbaycan.- 2010.- 17 aprel.- S. 3.