İtaliya Dağlıq Qarabağ münaqişəsində Azərbaycanın konstruktiv mövqeyini dəstəkləyir

Aprelin 16-da Milli Məclis Sədrinin müavini, ATƏT Parlament Assambleyasında Azərbaycan nümayəndə heyətinin rəhbəri Bahar Muradova ölkəmizdə səfərdə olan İtaliyanın ATƏT PA-dakı nümayəndə heyətinin rəhbəri Rikkardo Milyori ilə görüşmüşdür.

Bahar Muradova xalqlarımız arasındakı dostluq əlaqələrinin tarixindən, oxşar mədəniyyətlərimizdən söhbət açmış, dövlətlərimizin başçılarının səyləri nəticəsində münasibətlərimizin strateji tərəfdaşlıq səviyyəsinə yüksəldiyini bildirmişdir. O, əlaqələrimizin inkişafında parlamentlərin xüsusi rolu olduğunu diqqətə çatdırmışdır. Milli Məclis Sədrinin müavini Azərbaycanın dinamik inkişafı, regionda və dünyada oynadığı aktiv rolu, regionun inkişafına ciddi mane olan Dağlıq Qarabağ münaqişəsi barədə ətraflı məlumat vermiş, bu problemin həlli ilə bağlı nümayiş etdirdiyi mövqeyinə görə İtaliya dövlətinə və parlamentinə minnətdarlığını bildirmişdir.

B.Muradova Azərbaycan parlamentinin fəaliyyəti, qanunvericilik bazası, beynəlxalq təşkilatlar, eləcə də ATƏT PA çərçivəsində əməkdaşlıqdan söz açmışdır.

Ətraflı məlumat və göstərilən qonaqpərvərliyə görə minnətdarlığını bildirən Rikkardo Milyori səfər proqramının zəngin və maraqlı olduğunu diqqətə çatdırmışdır. O demişdir ki, Azərbaycana ilk gəlişidir və Bakının dinamik inkişafı onların çox xoşuna gəlmişdir. Qonaq "Azərbaycanda 2010-cu il parlament seçkiləri: daha demokratik, daha şəffaf" mövzusunda Bakıda beynəlxalq konfransın təşkilini yüksək qiymətləndirmiş, bunu Azərbaycan dövlətinin və hökumətinin ölkədə şəffaf, demokratik və azad seçkilər keçirmək əzmində olmasının bariz nümunəsi kimi dəyərləndirmişdir.

Dünyada, eləcə də Cənubi Qafqazda mövcud olan münaqişələrin beynəlxalq təhlükəsizliyə ciddi təhdid olduğunu vurğulayan İtaliya parlamentinin deputatı demişdir ki, o və onun ölkəsi Dağlıq Qarabağ münaqişəsinin həllində Azərbaycanın konstruktiv mövqeyini dəstəkləyir. Rikkardo Milyori münaqişənin ədalətli həllinə nail olmaq üçün parlament diplomatiyasının inkişafının vacibliyini vurğulamışdır.

Görüşdə İtaliyanın Azərbaycandakı səfiri Mario Corcostefano Baldi iştirak etmişdir.

Azərbaycan.- 2010.- 17 aprel.- S. 3.