Azərbaycan Respublikasının Baş naziri Artur Rasizadə Polşa Respublikasının Prezidenti Lex Kaçinskinin dəfn mərasimində iştirak etmişdir

Xəbər verildiyi kimi, aprelin 18-də Polşa Prezidenti Lex Kaçınskinin Krakov şəhərində dəfn mərasimi keçirilmişdir.

Mərasimdə Azərbaycanı Baş nazir Artur Rasizadənin rəhbərliyi ilə nümayəndə heyəti təmsil etmişdir.

Azərbaycanın Polşadakı səfirliyindən bildirmişlər ki, yerli vaxtla saat 14-də Krakovdakı Müqəddəs Mariya kilsəsində keçirilən dəfn mərasiminə Avropa hava məkanında yaranmış məlum problem üzündən dünyanın bir çox dövlətlərinin rəhbərləri gələ bilməmişlər.

Xatırladaq ki, aprelin 10-da Rusiyanın Smolensk vilayətinin "Severnı" hərbi aerodromunda baş vermiş təyyarə qəzasında faciəli surətdə həlak olmuş Prezident Lex Kaçinskinin, onu müşayiət edən dövlət və hökumət nümayəndələrinin, ictimai-siyasi xadimlərin xatirəsi aprelin 18-də Bakı vaxtı ilə saat 15-də Azərbaycanın bütün ərazisində bir dəqiqəlik sükutla yad edilmişdir.

Sükut dəqiqəsində ölkəmizdə insanların və avtomobillərin hərəkəti dayandırılmış, gəmi və qatarlar səs siqnalları vermişdir.

AzərTAc

Azərbaycan.- 2010.- 20 aprel.- S. 2.