Bakıda "Bədbəxt hadisələrdən sığortalanma: inkişaf tarixi, islahatlar, mövcud problemlər" mövzusunda beynəlxalq seminar keçirilir

Aprelin 28-də Bakıda "Bədbəxt hadisələrdən sığortalanma: inkişaf tarixi, islahatlar, mövcud problemlər" mövzusunda beynəlxalq texniki seminar işə başlamışdır.

Seminar iştirakçıları əvvəlcə Fəxri xiyabana gələrək xalqımızın ümummilli lideri, müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üstünə güllər düzülmüşdür.

Beynəlxalq Sosial Təminat Assosiasiyasının (BSTA) və Dövlət Sosial Müdafiə Fondunun (DSMF) birgə təşkilatçılığı ilə keçirilən 2 günlük beynəlxalq seminarın açılışında DSMF-nın sədri Səlim Müslümov, Milli Məclisin Sosial siyasət komitəsinin sədri Hadi Rəcəbli, BSTA-nın komissiya sədri, Almaniyanın Bədbəxt Hadisələrdən Sosial Sığorta Təşkilatının icraçı direktoru Coakim Bröyer, əmək və əhalinin sosial müdafiəsi nazirinin müavini Natiq Məmmədov, BSTA-nın nümayəndəsi Bernd Treichel və digərləri çıxış etmişlər.

Almaniya, Rusiya, Türkiyə, Qazaxıstan və bir sıra digər Avropa ölkələrinin də təmsil olunduqları beynəlxalq seminarın əsas məqsədi bədbəxt hadisələrdən sığortalanma sahəsində beynəlxalq təcrübə və bu istiqamətdə cari problemlərin müzakirəsidir.

Bildirilmişdir ki, sosial müdafiə sistemi daim transformasiyaya uğrayır. Sovetlər dönəmindəki sosial siyasətlə liberal iqtisadiyyatı olan dövlətin sosial müdafiəsində ciddi fərqlər vardır. Azərbaycan müstəqillik qazandıqdan sonra sosial sistemdə dəyişikliklər aparılmışdır. Ümummilli lider Heydər Əliyevin böyük səyləri nəticəsində sosial sahənin inkişafı başlamış, bir sıra qanunlar qəbul olunmuş, sürətli islahatlar həyata keçirilmişdir. Hazırda bu siyasət Prezident İlham Əliyev tərəfindən uğurla davam etdirilir.

Vurğulanmışdır ki, əməyin mühafizəsi məsələsi mühüm əhəmiyyət kəsb edir. Ölkəmizdə işçilərin sosial rifahının daha da yüksəldilməsi üçün ciddi işlər görülür. Azərbaycanda istehsalat xəsarəti və peşə xəstəliklərindən sığortalanma sisteminin yaradılması istiqamətində tədbirlər həyata keçirilməkdədir. Artıq bununla bağlı qanun layihəsi hazırlanmışdır. Bu baxımdan sözügedən sahədə müxtəlif ölkələrin təcrübəsinin öyrənilməsi müsbət nəticələrin əldə olunmasına öz töhfəsini verəcəkdir.

Diqqətə çatdırılmışdır ki, hər bir ölkənin sosial müdafiə sistemində müəyyən problemlər vardır. Problemlərin aradan qaldırılması üçün belə seminarların keçirilməsi vacibdir. İstehsalatın olduğu yerdə təhlükə də vardır. Ona görə də qabaqlayıcı tədbirlər görülməlidir. Almaniyada istehsalatda qabaqlayıcı tədbirlərin görülməsi üçün dövlət tərəfindən müəyyən vəsait ayrılır.

Tədbirdə həmçinin Beynəlxalq Əmək Təşkilatının, Beynəlxalq Pensiya və Sosial Fondlar Assosiasiyasının, Dünya Bankının və digər qurumların rəhbər şəxsləri iştirak edirlər.

Seminarda demoqrafiyanın bədbəxt hadisələrdən sığortalanmaya təsiri, maşınqayırma, elektrik, tekstil və digər sahələrdə bədbəxt hadisələrdən sığortalanma mövzularında məruzələr dinləniləcəkdir.

Beynəlxalq seminar aprelin 29-da başa çatacaqdır.

AzərTAc

Azərbaycan.- 2010.- 29 aprel.- S. 6.