TÜRK PA-nın internet saytının təqdimatı oldu

Dünən Türkdilli Ölkələrin Parlament Assambleyasının (TÜRK PA) internet saytının (www.turk-ra.org) təqdimatı oldu. Bu münasibətlə Milli Məclisdə keçirilən tədbirdə çıxış edən TÜRK PA-nın baş katibi Ramil Həsənov öncə təşkilatın yaranma tarixi və fəaliyyəti barədə məlumat verdi.

Bildirdi ki, TÜRK PA 21 noyabr 2008-ci ildə Türkiyənin İstanbul şəhərində Azərbaycan, Qazaxıstan, Qırğızıstan və Türkiyə respublikalarının parlament rəhbərlərinin imzaladığı sazişlə təsis olunmuşdur. 29 sentyabr 2009-cu ildə Bakı şəhərində TÜRK PA-nın birinci plenar sessiyası keçirilmişdir. Bu sessiyada parlament assambleyasının Reqlamenti, Katibliyin Əsasnaməsi və Bakı Bəyannaməsi, eləcə də Katibliyin daimi əsasla Bakı şəhərində yerləşməsi haqqında qərarı qəbul edilmişdir.

TÜRK PA-nın əsas məqsədləri parlamentlərarası əməkdaşlığın keyfiyyətcə yeni mərhələsi olan parlament diplomatiyası vasitələrinin köməyi ilə türkdilli dövlətlər arasında siyasi dialoqun daha da inkişaf etdirilməsinə kömək göstərmək, tarixi, mədəniyyət və dil ümumiliyinə əsaslanaraq milli qanunvericiliklərin yaxınlaşdırılması və parlamentlərarası əməkdaşlığa dair digər məsələlərdə qarşılıqlı fəaliyyətin daha da sıxlaşdırılması, türkdilli ölkələrlə digər region ölkələr arasında faydalı və bərabərhüquqlu əməkdaşlığın genişləndirilməsinə nail olmaqdır.

TÜRK PA-nın Parlamentlərarası İttifaq, MDB PA, İKT PA, NATO PA, ATƏT PA və digər beynəlxalq təşkilatlarla əməkdaşlığını uğurla inkişaf etdirdiyini deyən Ramil Həsənov TÜRK PA-nın həyata keçirdiyi və planlaşdırdığı tədbirlər, proqram və layihələr barədə də ətraflı məlumat verdi.

Tədbirin yekununda qurumun internet saytı jurnalistlərə təqdim olundu. Bildirildi ki, sayt hələlik iki dildə - Azərbaycan və ingilis dillərində fəaliyyət göstərir. Yaxın gələcəkdə isə internet saytının qazax, qırğız, türk və rus dillərində də versiyaları olacaq. Saytda TÜRK PA-nın yaranma tarixi, bu istiqamətdə qəbul edilmiş hüquqi sənədlər, TÜRK PA-nın fəaliyyətdə olan rəhbərinin, milli nümayəndə heyətlərinin fəaliyyəti, Baş Katiblik haqqında informasiyalar və sair məlumatlar yerləşdirilmişdir.

Qeyd edək ki, tədbirdə TÜRK PA-nın fəaliyyətinin işıqlandırılmasında yaxından iştirak edən kütləvi informasiya vasitələrinin nümayəndələrinə mükafatlar təqdim olundu.

Rəşad CƏFƏRLİ

Azərbaycan.- 2010.- 26 avqust.- S. 5.