Azərbaycanın Ukraynada yeni təyin edilmiş səfiri etimadnaməsini bu ölkənin Prezidenti Viktor Yanukoviçə təqdim etmişdir

Avqustun 27-də Azərbaycan Respublikasının Ukraynada yeni təyin edilmiş fövqəladə və səlahiyyətli səfiri Eynulla Mədətli Kiyevdəki Mariya sarayında etimadnaməsini bu ölkənin Prezidenti Viktor Yanukoviçə təqdim etmişdir.

Səfir Eynulla Mədətli Azərbaycan Prezidenti İlham Əliyevin səmimi salamlarını Ukrayna dövlətinin başçısına çatdırmışdır.

Viktor Yanukoviç də onun səmimi salamlarını Prezident İlham Əliyevə çatdırmağı xahiş etmişdir.

Prezident V.Yanukoviç vurğulamışdır ki, Azərbaycan Ukraynanın strateji tərəfdaşıdır. O, əmin olduğunu bildirmişdir ki, Azərbaycan ilə Ukrayna arasında dostluq və əməkdaşlıq münasibətləri bundan sonra da inkişaf edəcəkdir.

Görüşün sonunda Prezident Viktor Yanukoviç Eynulla Mədətliyə Ukraynada diplomatik fəaliyyətində uğurlar arzulamışdır.

Zeynal AĞAZADƏ,

AzərTAc-ın xüsusi müxbiri

Kiyev

Azərbaycan.- 2010.- 28 avqust.- S., 4.