Türkiyədə Zəfər Bayramı qeyd olunur

Türkiyədə Zəfər Bayramı və Silahlı Qüvvələr Günü geniş şəkildə qeyd olunur.

İlk bayram mərasimi paytaxt Ankarada olmuşdur. Silahlı Qüvvələrin Baş Qərargahının rəisi, ordu generalı İşık Koşaner və digər generallar Türkiyə Respublikasının banisi Mustafa kamal Atatürkün mavzoleyinə əklil qoymuşlar.

Sonra ordu generalı İşık Koşaner Silahlı Qüvvələrin Baş Qərargahındakı "Şərəf" salonunda bayram təbriklərini qəbul etmişdir. Türkiyə Prezidenti Abdullah Gül, Türkiyə Böyük Millət Məclisinin sədri Məhmət Əli Şahin, nazirlər və millət vəkilləri öz təbriklərini çatdırmışlar.

İstanbulda keçirilən bayram mərasimində vali Hüseyn Avni Mutlu, Birinci ordu komandanı, ordu generalı Hayri Kıvrıkoğlu və digər rəsmi şəxslər iştirak etmişlər. Onlar Taksim meydanında Atatürkün abidəsinin önünə əklil qoymuşlar.

Türkiyədə Zəfər Bayramı 88 il əvvəl Mustafa Kamal Atatürkün "Meydan savaşı" adlanan döyüşdə parlaq qələbəsinin ildönümüdür.

Azərbaycan.- 2010.-31 avqust.- S. 3.