Sosial sığorta-pensiya sahəsindəki nailiyyətlər vətəndaşların etibarlı sosial müdafiəsindən xəbər verir

Əsası ulu öndər Heydər Əliyev tərəfindən qoyulmuş Azərbaycanın hərtərəfli sosial-iqtisadi inkişaf strategiyası bu gün Prezident İlham Əliyevin rəhbərliyi ilə uğurla davam etdirilir. Respublikamızda aparılan sosial-iqtisadi siyasətin prioritet xəttini bütün sahələrin inkişafına nail olunması, əhalinin sosial müdafiəsinin, maddi rifahının yüksəldilməsi tədbirlərinin gücləndirilməsi təşkil edir. Həyata keçirilən islahatlar digər sahələrdə olduğu kimi, sığorta-pensiya sistemində də cox böyük nailiyyətlərlə nəticələnmişdir.

Həyata keçirilən sürətli islahatlar Azərbaycanın müasir və beynəlxalq standartlara tam cavab verən sığorta-pensiya modelinin qurulmasına da imkan vermişdir. Azərbaycanın sosial sığorta-pensiya sahəsində atdığı inamlı addımlar və əldə etdiyi nailiyyətlər ölkəmizin bu sahədə dünyanın ən nüfuzlu və bütün ölkələri əhatə edən Beynəlxalq Sosial Təminat Assosiasiyasının üzvü, sonra büro üzvü və nəhayət, Avropa ölkələri sosial sığorta-pensiya sistemləri şəbəkəsinin rəhbər komitəsinə üzv seçilməsinə gətirib çıxarmışdır. Əldə edilmiş uğurların sayəsində Azərbaycanın pensiya və sosial təminat layihəsinin icrasına nəzarət etmək məqsədilə 2009-cu ilin noyabrında ölkəmizdə olmuş Dünya Bankı missiyasının rəsmi məlumatında ölkəmizin sığorta-pensiya sisteminin beynəlxalq model olaraq çıxış etdiyi və Dövlət Sosial Müdafiə Fondunun beynəlxalq sosial təminat aləmində nüfuzlu bir quruma çevrildiyi əksini tapmışdır. Hazırda Dünya Bankının layihələrinin tətbiq olunduğu keçid dövrü ölkələrinin müvafiq nümayəndə heyətlərinin Azərbaycan təcrübəsinin öyrənilməsi məqsədilə respublikamıza səfərləri həyata keçirilir.

Prezident İlham Əliyevin tapşırığı ilə həyata keçirilən sığorta-pensiya sistemi üzrə genişmiqyaslı islahatların mühüm istiqamətlərindən biri də əhaliyə yüksək səviyyədə xidmət göstərilməsi üçün şəraitin yaradılması, yerlərdə mövcud infrastrukturun yenidən qurulmasıdır. Artıq son illər bu istiqamətdə görülən işlərin nəticəsidir ki, ayrı-ayrı rayonlar üzrə Dövlət Sosial Müdafiə Fondunun 70-dən artıq şöbəsinin maddi texniki bazası möhkəmləndirilmiş, əksəriyyəti yeni müasir standartlı inzibati binalarla təmin edilmişlər. Dövlət Sosial Müdafiə Fondunun bütün şöbələri müxtəlif növ proqram təminatı ilə təmin edilmişlər və hazırda əksər işlər kompüter sistemləri vasitəsilə aparılır. Görülən işlərin nəticəsində Dövlət Sosial Müdafiə Fondunun serverlərində unikal elektron məlumat bazaları yaradılmışdır ki, bu da fondun işini keyfiyyətcə daha yüksək səviyyəyə qaldırır.

Dövlət Sosial Müdafiə Fondunun Naftalan söbəsi də şəhərin mərkəzində yeni istifadəyə verilmiş inzibati binada yerləşir. Burada xüsusilə əmək pensiyaçılarına, ahıl vətəndaşlara xidmət imkanları genişləndirilmiş, binada müasir avadanlıqlar quraşdırılmışdır.

Dövlət Sosial Müdafiə Fondunun Naftalan şəhər şöbəsinin müdiri Ruslan Əliyevin sözlərinə görə, şöbənin kollektivi tərəfindən əhaliyə yüksək səviyyədə xidmət göstərilir, pensiyaçıların problemlərinə qayğı ilə yanaşılır. Şöbəyə daxil olan bütün ərizə və şikayətlər dərhal araşdırılaraq müvafiq tədbirlər görülür. Naftalan şəhər şöbəsində qeydiyyatda olan əmək pensiyaçıları hər ay üzrə öz pensiyalarını vaxtında alırlar. Şöbədə vətəndaşlarla iş, onların qəbulu və müraciətlərinə baxılması günün tələblərinə uyğun qurulmuşdur. Sektorlar üzrə vətəndaşların qəbulu qrafikə əsasən aparılır. Şöbənin hər bir əməkdaşının yaxşı iş şəraitinə, kompüterlərə malik olması, inzibati binanın müasir tələblərə cavab verməsi xidməti işi xeyli asanlaşdırır.

R.Əliyev bildirdi ki, Naftalan şəhər şöbəsində əmək pensiyaçılarının ümumi sayı 1424 nəfər olmuşdur. Onlardan 843 nəfər yaşa görə, 439 nəfər əlilliyə görə, 142 nəfər ailə başçısını itirdiyinə görə əmək pensiyası alır. Şöbədə pensiyaların hamısı plastik kart vasitəsilə ödənilir. Pensiyaların ödənilməsində şəffaflığın təmin olunması əhali tərəfindən yüksək qiymətləndirilir.

"Əmək pensiyalarının baza hissəsinin artırılması haqqında" Azərbaycan Respublikası Prezidentinin 2010-cu il 31 avqust tarixli sərəncamına əsasən, pensiyaçıların sosial müdafiəsini gücləndirmək məqsədilə əmək pensiyasının baza hissəsinin məbləği bu il sentyabrın 1-dən artırılaraq 85 manat müəyyən edilmişdir. R.Əliyevin sözlərinə görə, Naftalan şəhər şöbəsi tərəfindən sərəncamdan irəli gələn məsələlər vaxtında icra olunmuşdur. Vətəndaşlar sentyabr ayından etibarən pensiyalarını artımla alırlar. Bundan sonra şəhər üzrə tələb olunan aylıq məbləğ artaraq 146 070 manat təşkil etmişdir.

2010-cu ilin 1 oktyabr tarixinə şöbədə 95 hüquqi və 291 fiziki şəxs qeydiyyatda olmuşdur. Şəhər üzrə fəaliyyət göstərən sığorta edənlərin uçota alınması sahəsində olan problemlər demək olar ki, aradan qaldırılmışdır. Sığortaedənlərdən 2010-cu ilin ilk 9 ayı ərzində faktiki daxilolma 313 059 manat təşkil etmişdir ki, məbləğin 196488 manatı büdcədən, 116570 manatı isə qeyri-büdcədən daxil olmuşdur. 2010-cu ilin ilk üç rübündə fiziki şəxslərdən yığılan sosial sığorta haqqı 32166 manat təşkil etmişdir. Proqnoza qeyri-büdcə təşkilatları üzrə 101.5 faiz əməl edilmişdir. Debitor borclarının yığılması yönümündə borcu olan təşkilatlardan bildirişlər göndərilmiş, müvafiq hüquqi prosedurlar yerinə yetirilmişdir.

Fərdi uçotun təşkili ilə bağlı da Dövlət Sosial Müdafiə Fondunun Naftalan şəhər şöbəsində xeyli iş görülmüşdür. Belə ki, 1540 sosial sığorta şəhadətnaməsi alınaraq sahiblərinə paylanmışdır. Bunlardan 1339 nəfəri hüquqi şəxs, 201 nəfəri isə fiziki şəxslərdir. 144 nəfərə sosial sığorta şəhadətnaməsi alınaraq sifariş verilib.

Yuxarıda sadalanan faktlar və rəqəmlər bunu deməyə əsas verir ki, fondun Naftalan şəhər şöbəsində əhalinin sosial müdafiəsinin təmin olunması istiqamətində qəbul edilən qərarların icrası ilə bağlı zəruri tədbirlər vaxtında və dərhal yerinə yetirilir. Sığortaedənlərin uçota alınması, debitor borcların minimuma endirilməsi, sığortaolunanların fərdi uçotunun təşkil edilməsi, aztəminatlı ailələrə pensiya və müavinətlərın vaxtında çatdırılması, Dövlət Sosial Müdafiə Fondunun Naftalan şəhər şöbəsinin rəhbərliyi və əməkdaşları tərəfindən daim diqqət mərkəzində saxlanılır.

R.Əliyev dedi ki, bundan sonra da sığortaedənlərin uçota alınması, debitor borcların minimuma endirilməsi, sığortaolunanların fərdi uçotunun təşkili, aztəminatlı ailələrə pensiya və müavinətlərin vaxtında çatdırılması üçün şöbənin kollektivi var qüvvəsiylə çalışacaq və ona nail olacaqdır ki, cari ildə qarşıya qoyulmiş vəzifələr zamanında, tam yerinə yetirilsin: "Sonda qeyd etmək istəyirəm ki, yaşadığımız Naftalan şəhərində son aylar ərzində görülən işləri - stilik xəttinin çəkilişi, qaz, işıq xətlərinin, kanalizasiya sisteminin yenidən qurulması, on illərlə işləməyən liftlərin işə düşməsi, doqquzmərtəbəli binaların fasadına yeni üzlük çəkilməsi onu deməyə əsas verir ki, yaxın gələcəkdə Naftalan ən gözəl kurort şəhərlərindən biri olacaqdır. Cənab Prezidentin rəhbərliyi ilə görülən bütün bu işlər Naftalan şəhərində yaşayan əhalinin sosial durumuna da böyük kömək göstərəcəkdir".

R. BAYRAMOV

Azərbaycan.- 2010.- 2 dekabr.- S. 7.