Xalqın etimadının parlaq ifadəsi

Müstəqil Azərbaycanın demokratik əsaslarla seçilmiş IV çağırış Milli Məclisinin fəaliyyətə başlaması ölkəmizin parlament tarixində yeni mərhələnin başlanğıcına çevrildi. Prezident İlham Əliyev dördüncü çağırış Milli Məclisin ilk iclasında çıxış edərək bildirmişdir: "Parlament seçkiləri Azərbaycanda demokratik inkişaf istiqamətində atılmış növbəti mühüm addımdır. Bildiyinz kimi, seçkilər çox azad, ədalətli, şəffaf şəkildə, rəqabət şəraitində keçirildi. Bütün namizədlər üçün bərabər imkanlar yaradılmışdır və seçkilərin nəticələri Azərbaycan xalqının iradəsini tam şəkildə əks etdirir. Mən əminəm ki, yeni tərkibdə Milli Məclis ölkəmizin gələcək inkişafı üçün dəyərli töhfələrini verəcək və Milli Məclis tərəfindən qəbul ediləcək qanunlar ölkəmizin demokratik inkişafı üçün gözəl şərait yaradacaqdır".

Parlamentin yeni tərkibinə diqqət yetirdikdə görürük ki, Azərbaycanın siyasi arenasında mövcud olan qüvvələr nisbəti ali qanunvericilik orqanında da öz əksini tapmışdır. Milli Məclis ötən dövrdə qüvvədə olan qanunvericiliyə əsaslanaraq öz fəaliyyətini demokratiya, plüralizm, qanunun aliliyi prinsipləri üzərində qurmuşdur. Ötən dövrdə parlament səmərəli fəaliyyət göstərmişdir. Milli Məclisin 150 iclası keçirilmiş, ümumən 1115 akt, 956 qanun və 159 qərar qəbul edilmişdir.

Son 5 ildə parlamentin beynəlxalq əlaqələrinin inkişafı sahəsində mühüm işlər görülmüşdür. Parlament nümayəndə heyətinin 70-dən çox ölkəyə 820-dən artıq səfəri həyata keçirilmişdir. 60-dan çox xarici dövlətin və beynəlxalq təşkilatların 550-yə yaxın nümayəndə heyəti Milli Məclisdə olmuşdur.

Bu dövrdə Milli Məclisin fəaliyyətinin əsas prinsipləri təməli ulu öndər Heydər Əliyev tərəfindən qoyulmuş hüquqi, demokratik və dünyəvi dövlətin yaradılması prosesini davam etdirmək, həyata keçirilən islahatların qanunvericilik bazasının yaradılması və təkmilləşdirilməsi olmuşdur. Parlament dünyanın qabaqcıl ölkələrinin təcrübəsindən bəhrələnərək bu sahədə bir sıra mühüm nailiyyətlər qazanmışdır. Hazırda Milli Məclis Avropa Şurası Parlament Assambleyasının, MDB Parlamentlərarası Assambleyasının, ATƏT Parlament Assambleyasının, Qara dəniz İqtisadi Əməkdaşlıq Təşkilatı Parlament Məclisinin, İslam Konfransı Təşkilatı Parlament Məclisinin tamhüquqlu, NATO Parlament Assambleyasının isə assosiativ üzvüdür. Milli Məclis Avropa Parlamenti və digər mötəbər beynəlxalq qurumlarla da sıx əməkdaşlıq edir. Deputatlarımız mütəmadi olaraq bu təşkilatların işində yaxından iştirak edir, Ermənistan-Azərbaycan, Dağlıq Qarabağ münaqişəsi barədə həqiqətləri dünya ictimaiyyətinə çatdırırlar.

Ölkəmizin Avropa Şurası Parlament Assambleyası ilə əməkdaşlığı çox yüksək səviyyədədir. Azərbaycan həqiqətlərinin Avropa və dünya ictimaiyyətinə olduğu kimi çatdırılması, milli və dövlət maraqlarımızın qorunması məqsədilə nümayəndə heyətimizin üzvləri AŞ PA-da ölkəmiz üçün çox vacib problemlərin qaldırılmasına, onlarca sənədin yayılmasına nail olublar. Dağlıq Qarabağın və onun ətrafındakı yeddi rayonun Ermənistan silahlı qüvvələrinin işğalı altında olması, bu ərazilərin beynəlxalq ictimaiyyətin nəzarətindən kənarda qalması və müxtəlif beynəlxalq terror təşkilatlarının fəaliyyət zonasına çevrilməsi, habelə qaçqın və məcburi köçkün soydaşlarımızın vəziyyəti ilə bağlı Azərbaycan dövlətinin və parlamentinin narahatlığı avropalı deputatların nəzərinə çatdırılıb.

2008-ci ildə Azərbaycan parlamentinin yaranmasının 90-cı ildönümü təntənəli şəkildə qeyd olunmuşdur. Bu əlamətdar tədbirdə dərin nitq söyləyən dövlət başçısı İlham Əliyev Azərbaycan Respublikası Milli Məclisinin hüquqi, demokratik dövlət quruculuğu sahəsindəki fəaliyyətini yüksək qiymətləndirmişdir.

Üçüncü çağırış Azərbaycan Respublikası Milli Məclisinin sessiyalarının yekunları göstərir ki, bu gün parlamentdə həyata vəsiqə alan qanunlar hüquqi bazanı möhkəmləndirməklə yanaşı, ölkə hakimiyyətinin kompleks inkişafa dair həyata keçirdiyi siyasi kursa dəstək verir. Lakin ölkəmizin sürətli sosial-iqtisadi inkişaf mərhələsinə qədəm qoyması, bütövlükdə cəmiyyətin kompleks inkişafı, Azərbaycanın beynəlxalq aləmə inteqrasiyasının sürətlənməsi, bir sıra yeni qanunvericilik aktlarının qəbulunu, əvvəllər qəbul olunmuş qanunlara əlavələrin və dəyişikliklərin edilməsini zəruri etmişdir. Bu baxımdan qətiyyətlə demək olar ki, üçüncü çağırış Azərbaycan Milli Məclisinin fəaliyyəti birinci və ikinci çağırış parlamentlərin fəaliyyəti kimi uğurlu olmuşdur.

Dövlət başçısının qanunvericilik təşəbbüsü əsasında son illərdə Milli Məclisdə qəbul edilmiş qanunlar ictimai həyatın bütün sahələrini əhatə etməklə yanaşı, vətəndaşa həssas və qayğıkeş münasibəti təşviq edir. Bu sırada Azərbaycan Respublikasının İnzibati Xətalar Məcəlləsində və Cinayət-Prosessual Məcəlləsində dəyişikliklər edilməsi haqqında 28 oktyabr 2008-ci il tarixli, "Azərbaycan Respublikasının İnzibati Xətalar Məcəlləsinə dəyişiklik və əlavələr edilməsi barədə" 2008-ci il 16 dekabr tarixli, "Məhkəmələr və hakimlər haqqında", "Əhalinin sağlamlığının qorunması haqqında", "Vətən uğrunda həlak olanların xatirəsinin əbədiləşdirilməsi haqqında", "Kütləvi informasiya vasitələri haqqında" Azərbaycan Respublikasının Qanununa əlavə edilməsi barədə" 2009-cu il 6 mart tarixli, "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" 2009-cu il 2 fevral tarixli, "Məişət zorakılığının qarşısının alınması haqqında" 2010-cu il 22 iyun tarixli, "Məhkəmələr və hakimlər haqqında" və "Məhkəmə-Hüquq Şurası haqqında" Azərbaycan Respublikasının qanunlarına dəyişikliklər və əlavələr edilməsi barədə" 2010-cu il 22 iyun tarixli və digər qanunların qəbulunu xüsusi xatırlatmaq lazımdır.

Ötən müddətdə diqqəti cəlb edən əsas məqamlardan biri də Milli Məclisin fəaliyyətinin dünya standartları səviyyəsinə çatdırılması, deputatların daha rahat şəkildə qanun yaradıcılığı ilə məşğul ola bilmələri üçün həyata keçirilən genişmiqyaslı işlərdir. Dövlət başçısının xüsusi tapşırığı və qayğısı ilə Azərbaycan Respublikası Milli Məclisinin inzibati binası müasir tələblər səviyyəsində əsaslı təmir olunmuş, yeni korpusu inşa edilmiş, eksteryeri və interyeri əsaslı şəkildə müasirləşmiş, ətraf ərazidə abadlıq-quruculuq işləri aparılmışdır. Ulu öndər Heydər Əliyevin dövlət və xalq qarşısında misilsiz xidmətlərinin obyektiv dəyərləndirilməsi, xatirəsinin əbədiləşdirilməsi məqsədilə Milli Məclisin foyesində büstü qoyulmuş, parlamentdə "Heydər Əliyev Muzeyi" yaradılmışdır.

Azərbaycan parlamenti ötən 5 ildə dövlət büdcəsinin qəbulunu və icrasına nəzarəti də uğurla həyata keçirmişdir. Konstitusiyanın 95-ci maddəsinə görə, "Azərbaycan Respublikası Prezidentinin təqdimatına əsasən Azərbaycan Respublikası dövlət büdcəsinin təsdiq edilməsi və onun icrasına nəzarət" Milli Məclisin səlahiyyətinə aid məsələlərdəndir. Bir qayda olaraq hər il payız aylarında büdcə layihəsi Milli Məclisin müzakirəsinə çıxarılır, hökumət üzvlərinin iştirakı ilə geniş müzakirə və təhlil olunur, təkmilləşdirilir. Milli Məclis üzvlərinin büdcə gəlirlərinin daha məqsədyönlü istifadə olunması, ayrı-ayrı sahələrə ayrılan vəsaitlərin bölgüsü ilə bağlı dəyərli təklifləri əsasən nəzərə alınır. Bu şəffaf mexanizm nəticəsində büdcənin formalaşmasında bilavasitə iştirak edən hər bir vətəndaş maliyyə vəsaitlərinin bölgüsü və xərclənməsi ilə bağlı aydın və dolğun təsəvvürə malik olur. Milli Məclisdə təsdiq edilmiş "Azərbaycan Respublikasının 2011-ci il dövlət büdcəsi haqqında" Azərbaycan Respublikasının Qanunu da qlobal böhran şəraitində respublikamızın qarşıya qoyduğu hədəflərə doğru inamla irəliləyən ölkələr sırasında olduğunu bir daha təsdiqləyir.

Milli Məclis Prezident İlham Əliyevin rəhbərliyi ilə Azərbaycanın qabaqcıl dünya dövlətləri sırasına çıxması, ölkənin milli maraqlarının təmin edilməsi üçün görülən işlərə həmişə dəstək vermişdir. Ölkə başçısı parlamentdəki çıxışında demişdir: "Hesab edirəm ki, yeni tərkibdə Milli Məclis həm peşəkarlıq, həm inellektual baxımdan Azərbaycanın inkişafına töhfəsini verməyə qadirdir. Mən çox şadam ki, Azərbaycan xalqının seçimi düzgün olmuşdur. İstənilən seçim düzgün seçimdir, çünki bu, xalq tərəfindən edilən seçimdir. Amma mən çox şadam ki, Azərbaycan cəmiyyəti artıq elə yüksək pilləyə qalxıb ki, ən dəyərli nümayəndələrini seçməyə qadirdir.

Mən ümid edirəm ki, növbəti beş ildə yeni Milli Məclis və əlbəttə, onun aparıcı qüvvəsi olan Yeni Azərbaycan Patriyası ölkəmizin gələcək inkişafına töhfəsini verəcək, ölkəmizin dayanıqlı, uzunmüddətli inkişafını Azərbaycan xalqının maraqlarını tam şəkildə təmin edəcəkdir".

Hazırda müstəqil Azərbaycanın bütün sahələr üzrə qanunvericilik bazası mövcuddur. Qəbul olunmuş konstitusiya qanunları, məcəllələr, qanunlar, təsdiq edilmiş konvensiyalar və sazişlər cəmiyyət və dövlət həyatında yaranan münasibətləri tənzimləməyə xidmət edir. Ölkədə uğurla davam etdirilən siyasi, hüquqi, iqtisadi, sosial islahatların, demokratikləşdirmə prosesinin mexanizmi daha da inkişaf etdirilir və Azərbaycan Respublikasının Milli Məclisi də islahatların hüquqi bazasının formalaşdırılmasında öz əməyini sərf edərək xalq, dövlət, cəmiyyət qarşısında üzərinə götürdüyü missiyanı uğurla yerinə yetirməyə çalışır.

Tahir SÜLEYMANOV

Milli Məclisin deputatı

Azərbaycan.-2010.-7 dekabr.- S. 4.