Rabitə və informasiya texnologiyaları sahəsi işçilərinin peşə bayramı qeyd edilmişdir

Dekabrın 6-da Rabitə və İnformasiya Texnologiyaları Nazirliyində rabitə və informasiya texnologiyaları sahəsi işçilərinin peşə bayramına həsr edilmiş mərasim keçirilmişdir.

Nazirliyin, eləcə də RİTN-in birlik və müəssisələrinin əməkdaşları, dövlət strukturlarının və kütləvi informasiya vasitələri nümayəndələrinin iştirak etdiyi tədbirdə Azərbaycanda rabitə sektorunun yaranması, bu sahənin tarixi və inkişaf mərhələləri haqqında danışılmışdır.

Mərasim çərçivəsində, həmçinin rabitə və informasiya texnologiyaları sahəsinin işçilərinə fəxri adların verilməsi, eləcə də RİTN və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən elan olunmuş "İKT-nin mediada rolu" müsabiqəsi qaliblərinin mükafatlandırılması keçirilmişdir. Müsabiqədə qalib olmuş jurnalistlərə diplomlar və hədiyyələr təqdim edilmişdir.

Fondun icraçı direktoru Vüqar Səfərli kütləvi informasiya vasitələrinin adından sahə işçilərini peşə bayramı münasibətilə təbrik etmiş və gələcək fəaliyyətlərində uğurlar arzulamışdır.

Tədbirdə, həmçinin Yeni Azərbaycan Partiyasına üzv qəbul olunmuş RİTN əməkdaşlarına vəsiqələr təqdim edilmişdir.

Mərasimdə rabitə və informasiya texnologiyaları naziri Əli Abbasov çıxış edərək son illər ölkədə informasiya-kommunikasiya texnologiyaları (İKT) sahəsində əldə olunmuş nailiyyətləri diqqətə çatdırmışdır. Bildirmişdir ki, Azərbaycanda rabitə və İKT sektorunun sürətli inkişafı ümummilli lider Heydər Əliyevin kursunu uğurla davam etdirən Prezident İlham Əliyevin diqqəti və qayğısı nəticəsində əldə olunmuşdur. Rabitə və informasiya texnologiyaları sahəsi işçilərinin peşə bayramı günü də məhz dövlətimizin başçısı İlham Əliyevin 2006-cı il 2 dekabr tarixli sərəncamı ilə təsis olunmuşdur.

AzərTAc

Azərbaycan.- 2010.- 7 dekabr.- S.5.