Azərbaycanın dəniz nəqliyyatı sahəsindəki uğurları beynəlxalq miqyasda tanınır

2010-cu il noyabrın 20-dən dekabrın 2-dək London şəhərində Beynəlxalq Dəniz Təşkilatının Dəniz Təhlükəsizliyi Komitəsinin 88-ci sessiyasının iclası keçirilmişdir. 168 üzv dövlətin və müxtəlif beynəlxalq təşkilatların iştirak etdiyi sessiyada Azərbaycan Respublikasını Dövlət Dəniz Administrasiyasının rəisi Qüdrət Qurbanovun rəhbərliyi ilə nümayəndə heyəti təmsil etmişdir.

Sessiya zamanı Beynəlxalq Dəniz Təşkilatına üzv dövlətlərdə dəniz nəqliyyatı sahəsinə dair beynəlxalq konvensiyaların tələblərinə əməl olunması səviyyəsinin yoxlanılması məqsədilə icbari audit yoxlamalarının keçirilməsi, dəniz ətraf mühitinin qorunması, həyata keçirilən axtarış və xilasetmə əməliyyatlarının təkmilləşdirilməsi, son dövrlərdə beynəlxalq ictimaiyyəti dərindən narahat edən dəniz quldurluğu hallarının qarşısının alınması, bu istiqamətdə beynəlxalq təşkilatlar tərəfindən hərbi qüvvələrin səfərbər edilməsi ilə bağlı görülmüş işlər, təsnifat cəmiyyətlərinin fəaliyyətinə nəzarət mexanizminin gücləndirilməsi metodları barədə müzakirələr aparılmışdır.

Dəniz Təhlükəsizliyi Komitəsinin sessiyasının keçirildiyi dövr ərzində Dövlət Dəniz Administrasiyasının rəisi Qüdrət Qurbanovun dəniz nəqliyyatı sahəsində qabaqcıl dünya dövlətlərinin dəniz administrasiyalarının başçıları ilə görüşləri zamanı Azərbaycan Respublikasının Prezidenti cənab İlham Əliyevin birbaşa diqqət və qayğısı ilə iqtisadiyyatın digər sahələri ilə yanaşı, dəniz nəqliyyatı sahəsində respublikada görülmüş işlər barədə müfəssəl məlumat verilmiş, habelə dəniz təhlükəsizliyi sahəsində qarşılıqlı əməkdaşlıq məsələləri üzrə fikir mübadiləsi aparılmışdır. Görüşlər zamanı Azərbaycan Respublikasının Dövlət Dəniz Administrasiyasının yaradıldığı dövrdən keçmiş qısa müddət ərzində əldə olunmuş nailiyyətlərin və Azərbaycan Respublikasında dəniz nəqliyyatı sahəsində görülmüş işlərin müsbət qiymətləndirildiyi xarici mütəxəssislər tərəfindən xüsusilə qeyd olunmuşdur.

Həmçinin nümayəndə heyəti tərəfindən Azərbaycan Respublikası Uzaq Məsafədən Tanınma və İzləmə (UMTİ/LRİT) Milli Mərkəzinin fəaliyyətinin təmin edilməsi üçün ən son tələblərə cavab verən avadanlıqların alınaraq respublikamıza gətirilməsi və qısa müddətdə tamamlama işləri başa çatdıqdan sonra adıçəkilən Milli Mərkəzin tam fəaliyyətə başlayacağı barədə Dəniz Təhlükəsizliyi Komitəsinə və üzv dövlətlərə geniş məlumat verilmişdir.

Komitənin iclasında son vaxtlar beynəlxalq ictimaiyyəti dərindən narahat edən dəniz quldurluğu hallarının qarşısının alınması, bu istiqamətdə beynəlxalq təşkilatlar tərəfindən hərbi qüvvələrin səfərbər edilməsi ilə görülmüş işlər və həyata keçirilən tədbirlər barədə Beynəlxalq Dəniz Təşkilatının baş katibi, admiral Eftimios Mitropoulosun geniş nitqi dinlənilmişdir.

Dəniz Təhlükəsizliyi Komitəsinin 88-ci sessiyasının sonuncu günü gələn il üçün komitənin sədrinin seçilməsi məsələsi səsə qoyulmuş və Neil Ferrer yekdilliklə Dəniz Təhlükəsizliyi Komitəsinin sədri seçilmişdir.

Azərbaycan.-2010.-7 dekabr.- S. 5.