YAP Qadınlar Şurasının təşəbbüsü ilə Milli Məclisə seçilmiş qadın deputatlarla görüş keçirilmişdir

Dekabrın 15-də Yeni Azərbaycan Partiyası Qadınlar Şurasının təşəbbüsü ilə Milli Məclisə seçilmiş qadın deputatlarla görüş keçirilmişdir.

Tədbir iştirakçıları əvvəlcə Fəxri xiyabanda ümummilli lider, müasir müstəqil Azərbaycan dövlətinin və Yeni Azərbaycan Partiyasının banisi Heydər Əliyevin xatirəsini anmış, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi anılmış, məzarı üzərinə tər çiçəklər düzülmüşdür.

YAP Sabunçu rayon təşkilatının qərargahında keçirilən görüşdə partiyanın Qadınlar Şurasının sədri Nurlana Əliyeva, YAP İdarə Heyətinin üzvü, Milli Məclis Sədrinin müavini Bahar Muradova, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Milli Məclisin İnsan hüquqları komitəsinin sədri Rəbiyyət Aslanova və başqaları çıxış etmişlər.

Çıxışlarda vurğulanmışdır ki, Milli Məclis ölkəmizin inkişafı naminə vacib qanunlar qəbul edir və onların hazırlanmasında qadın deputatlar da fəal iştirak edirlər. Bildirilmişdir ki, 4-cü çağırış Milli Məclisdə 20 qadın deputat təmsil olunur ki, onların da 14-ü YAP-ın üzvləridir.

Müstəqil Azərbaycanda ulu öndər Heydər Əliyev tərəfindən əsası qoyulmuş qadın siyasətinin Prezident, YAP sədri İlham Əliyev tərəfindən uğurla davam etdirildiyini vurğulayan natiqlər, qadın deputatların öz fəaliyyətləri ilə ölkəmizin inkişafına töhfə verəcəklərinə əminliklərini bildirmişlər. Azərbaycan dövlətinin qazandığı nailiyyətlərin təbliği üçün qadın deputatların iştirakı ilə müxtəlif tədbirlərin təşkili barədə təklif iştirakçılar tərəfindən yüksək qiymətləndirilmişdir.

Azərbaycan.-2010.-16 dekabr.-S.2.