Paytaxtın yol infrastrukturu təzələnir

Başa vurmaqda olduğumuz 2010-cu ildə də Bakıda nəqliyyatın hərəkətində tıxacların aradan qaldırılması və piyadaların təhlükəsizliyini təmin etmək məqsədilə müasir tələblərə cavab verən yeni yollar, yol qovşaqları, yeraltı keçidlər, körpülər istifadəyə verilib, bəzi küçə və prospektlər genişləndirilib, bəziləri tamamilə yenidən qurulub. Ölkə başçısının sərəncamı ilə "Bakı şəhərində nəqliyyat sisteminin təkmilləşdirilməsi üzrə 2008-2013-cü illər üçün əlavə Tədbirlər Planı"na əsasən şəhərin əsas magistrallarından olan Heydər Əliyev prospekti ilə Ziya Bünyadov prospektinin ("Əzizbəyov" metrostansiyası dairəsi) və Ziya Bünyadov prospekti ilə "Azadlıq" prospektinin kəsişmələrindəki yol qovşaqlarının tikintisi yüksək səviyyədə başa çatdırılaraq istifadəyə verilib. Heydər Əliyev Hava Limanı - Mərdəkan dairəsi - Bilgəh avtomobil yolu yenidən qurulub. Bilgəh - Sumqayıt yeni avtomobil yolunun inşası başa çatdırılıb.

Bakının qədim məhəllələrindən olan Beşmərtəbə ərazisində - Füzuli meydanında əsaslı yenidənqurmadan sonra, cari ilin may ayında istifadəyə verilən yeraltı piyada keçidi indi əraziyə estetik görkəm verir, insanlarda xoş əhval yaradır. Ümumi uzunluğu 175, eni 6, hündürlüyü 2,2 metrə çatan keçidin dörd çıxışı var. Pilləkənlərdə əlil arabaları üçün panduslar quraşdırılıb. Qranit və mərmər plitələrlə üzlənmiş döşəmə göz oxşayır. Keçiddə havalandırma, yanğınsöndürmə, müasir işıqlandırma sistemi, müşahidə kameraları, mobil telefon rabitəsi üçün xüsusi cihazlar quraşdırılmışdır. Burada kitab və məktəbli ləvazimatları satılan köşklər də fəaliyyət göstərir.

Ölkə başçısının sərəncamına əsasən əsaslı təmir və yenidənqurmadan sonra paytaxtın Hüseyn Cavid prospektində, Azərbaycan Texniki Universitetinin binası qarşısında istifadəyə verilən yeraltı piyada keçid Füzuli meydanındakından geri qalmır. Bu keçidin divarları, döşəməsi, işıq sistemi tamamilə yenidən qurulub. Dörd giriş-çıxışı olan keçiddə əlillər üçün ayrıca yol düzəldilib, müşahidə kameraları quraşdırılıb.

Binəqədi rayonunun ərazisində, metronun "Azadlıq prospekti" stansiyası yaxınlığında inşa edilmiş və açılışında ölkə Prezidentinin iştirak etdiyi yerüstü piyada keçiddə insanların, nəqliyyatın təhlükəsiz hərəkətinə rahatlıq gətirib. Ümumi uzunluğu 63 metr, yolun hərəkət hissəsindən hündürlüyü beş metrdən çox olan keçid üç aşırımdan ibarətdir. Müasir standartlar səviyyəsində qurulmuş bu keçiddə də fotosellə işləyən dörd müasir eskalator quraşdırılıb. Eskalator piyada yaxınlaşanda işə düşür. Bu isə təhlükəsiz hərəkətlə yanaşı, elektrik enerjisinə qənaət etməyə imkan verir. Xüsusi qurğu vasitəsilə işıqlandırma sistemi axşam saatlarında avtomatik olaraq işə düşür...

İyul ayının əvvəllərində paytaxtın Heydər Əliyev və Ziya Bünyadov prospektlərinin kəsişməsindəki müxtəlif səviyyəli Böyükşor yol qovşağının ikinci kompleksinin istifadəyə verilməsi də yaddaqalan olmuşdur. Kompleks Heydər Əliyev, Ziya Bünyadov və Qara Qarayev prospektlərini hava limanı və Bakıxanov qəsəbəsi istiqamətində yollarla birləşdirən, ümumi uzunluğu 1194 metrə çatan beş xüsusi yolötürücüdən və digər yollardan ibarətdir. Kompleksdəki yolötürücülərin hündürlüyü 6,5, eni 27,5 metrdir. Aşırımının uzunluğu 56 metr olan bu yolötürücünün tağları metaldandır. Hazırda bu yol qovşağının üçüncü kompleksinin inşası davam etdirilir. 665 metr uzunluğunda yolötürücü və onun yanaşmalarından ibarət olacaq üçüncü kompleks hava limanı avtomobil yolunu Qara Qarayev prospekti ilə birləşdirəcəkdir. Regionda ilk dəfə inşa olunan vant konstruksiyalı ikiaşırımlı bu yolötürücünün uzunluğu 360 metr olacaq. Yolötürücü hava limanı istiqamətindən gələn nəqliyyat vasitələrinin 8-ci kilometr, Əhmədli, Günəşli yaşayış massivi və Zığ dairəsi - hava limanı magistral avtomobil yoluna birbaşa hərəkətini təmin edəcəkdir. Noyabrın 30-da körpünün "Azadlıq" və Ziya Bünyadov prospektlərinin kəsişməsində yerləşən yol qovşağının üçüncü mərhələsi istifadəyə verilib. Yol qovşağının kommunikasiya xətlərinin olduğu ərazidən keçməsi ilə əlaqədar işlər davam etdirilir. Kompleks tam halda gələn ilin may ayında istifadəyə veriləcəkdir.

Böyükşor yol qovşağı respublikamızda yol-nəqliyyat sisteminin ən müasir standartlar səviyyəsində yenidən qurulmasının əyani nümunələrindəndir. Ümumi uzunluğu 3245 metr təşkil edəcək 9 körpü, körpü girişləri və qovşağın tərkib hissəsi olan avtomobil yollarını özündə birləşdirən Böyükşor yol qovşağı üç kompleksdən ibarətdir.

Gündən-günə böyüyən və müasirləşən Bakının yol xəritəsinə cari ildə çox möhtəşəm bir yolun da adı əlavə olunub. Bu, Bakı dairəvi avtomobil yoludur. Paytaxtda nəqliyyatın tıxac probleminin aradan qaldırılması, ağır yük avtomobillərinin şəhərə daxil olmadan hərəkətinin təmin edilməsi baxımından bu yolun xüsusi əhəmiyyəti var. Birinci dərəcəli olan əsas yolun uzunluğu 21,5 kilometr, iki istiqamətli yerli yolun uzunluğu 4,8 kilometrdir. Əhalinin rahatlığı üçün yollara səsboğucu baryerlər quraşdırılıb. Dairəvi yol hər iki istiqamətdə üç hərəkət zolağı olmaqla, altı hərəkət zolağından ibarətdir. Yol boyu iki elektron istiqamətverici lövhə quraşdırılıb. Ümumilikdə yolda beş qovşaq, səkkiz ötürücü və üç piyada keçidi inşa edilib. Dairəvi yol paytaxt küçələrində tıxacların azalmasına, ekoloji vəziyyətin yaxşılaşmasına imkan verəcəkdir. Yol boyu tikilmiş nəqliyyat qovşaqlarının hər birinin xüsusi təyinatı var.

Birinci qovşaq Bakı dairəvi avtomobil yolunu Bakı-Rusiya Federasiyası avtomagistralı ilə əlaqələndirərək Şimal-Cənub beynəlxalq nəqliyyat dəhlizi ilə tranzit yük maşınlarının hərəkətini şəhərə girmədən cənuba və qərbə təmin edir.

İkinci qovşaq Bakı şəhərinin "Qurd Qapısı" ərazisində avtonəqliyyat vasitələrinin hərəkətini şəhərlə əlaqələndirmək məqsədi daşıyır. Qovşaqda inşa edilən iki yolötürücü nəqliyyatın bütün istiqamətlərdə hərəkətini təmin edir. Eyni zamanda, şimal və cənub istiqamətlərində hərəkət edən nəqliyyat vasitələri üçün Bakı şəhərinə əlavə giriş-çıxış imkanı yaradır.

Üçüncü qovşaq Bakı dairəvi avtomobil yolunu Lökbatan-Xocasən avtomobil yoluyla, dəmiryolunun Heybət stansiyası, sənaye və ticarət obyektləri ilə əlaqələndirir. Dördüncü qovşaq Bakı-Astara atomobil yolu ilə Lökbatan dairəsini birləşdirir. Beşinci qovşaq isə nəqliyyat vasitələrinin Bakı dairəvi avtomobil yolunun altından tunel vasitəsilə "Sədərək", "Binə" və digər ticarət mərkəzlərinə giriş-çıxışını təmin edir.

Azərbaycan Prezidenti İlham Əliyev noyabrın 8-də Bakı dairəvi avtomobil yolunun açılışında iştirak edərkən demişdir:

- Sizi bu gözəl yolun açılışı ilə əlaqədar təbrik edirəm. Bu yolun Bakının nəqliyyat sistemində xüsusi yeri vardır. Çünki bu yol şəhərin tıxaclardan azad olunmasında xüsusi məna daşıyacaqdır. Əvvəlki dövrlərdə cənub istiqamətindən şimal istiqamətinə və əks tərəfə getmək üçün gərək Bakı ərazisindən keçəydin. Həm məsafə çox böyük idi, həm də ki, tıxaclar vaxt aparırdı. Dairəvi yolun tikintisi bu məsələnin həlli üçün əsas məsələdir. Böyük zövqlə çox gözəl, rahat, keyfiyyətli altızolaqlı, bir neçə qovşağı olan yol tikilibdir.

Əminəm ki, bu yol şəhər nəqliyyatı üçün çox böyük əhəmiyyət daşıyacaqdır. İndi şəhərdə müxtəlif yerlərdə yeni yollar tikilir. Əvvəlki dövrdə tikilmiş yollar genişləndirilir, bərpa olunur, yüksək səviyyədə təmir edilir. Bununla bərabər, yeni yolların açılması şəhər nəqliyyatı üçün çox vacibdir. Bax bu yol, demək olar ki, şəhərin ən böyük damarıdır".

Bakını müasirliyə qovuşduran yol tikinti-quruculuq işləri davam etdirilir. Ölkə başçısının sərəncamına əsasən, şəhərin mərkəzində, birbaşa Bulvara çıxışı olacaq yeni yeraltı keçidin tikintisinə başlanılıb. Bülbül prospektində yerləşən və başlanğıcını Üzeyir Hacıbəyli küçəsindən götürən keçid Milli Parkadək davam edəcəkdir. Uzunluğu 300 metrə çatan bu keçidin hər yol kəsişməsində dörd, yəni 12 çıxışı nəzərdə tutulub.

"Gənclik" metrostansiyası ("Qələbə" meydanı) yaxınlığında tikintisi davam etdirilən yeraltı kompleksə 5-7 tunelin inşası daxildir. "Qələbə" meydanında üçmərtəbəli yeraltı avtomobil dayanacağı və iki yeraltı keçid də inşa olunur.

Rəhman SALMANLI,

Azərbaycan.-2010.-17 dekabr.-S.6.