Azərbaycan Ordusu işğal altında olan ərazilərimizi azad etməyə hər an qadirdir

Azərbaycanın iqtisadi imkanları artdıqca hərbi potensialı da güclənir. Məhz sürətli iqtisadi inkişafın nəticəsidir ki, büdcədən ayrılan hərbi xərclər təxminən 20 dəfə artıb. Xatırlatmaq yerinə düşərdi ki, Azərbaycanın müdafiə məqsədilə ayırdığı xərclərin miqdarı Ermənistanın bütün dövlət büdcəsindən artıqdır. 2010-cu il üçün ölkəmizin ümumi hərbi xərcləri 2 milyard 150 milyon dollara çatıb ki, bu da qeyd edildiyi kimi, Ermənistanın dövlət büdcəsindən çoxdur. Gələn il isə bu məbləğ 3 milyard 100 milyon dollara bərabər olacaq.

Bununla yanaşı, Azərbaycan Silahlı Qüvvələrinin hərbi hazırlığı və döyüş qabiliyyəti də yüksək səviyyəyə çatdırılıb. Bu gün ölkəmizin dayanıqlı müdafiə, ordunun təkmil vahid idarəetmə sistemi mövcuddur. Silahlı Qüvvələrdə nəzarət və rabitə sahəsində avtomatlaşdırma işləri davam etdirilir. Azərbaycanda hərbi sənayenin sürətli inkişafı Silahlı Qüvvələrin müasir hərbi potensialının formalaşmasına əsaslı zəmin yaradır. Ümumiyyətlə, iqtisadi inkişafa müvafiq olaraq hərbi xərclərin artırılması ordumuzun maddi-texniki təminatının, o cümlədən silah-sursatla təchizatının daha modern hala gəlməsinə imkan verir. Hazırda Azərbaycan Silahlı Qüvvələri həm yerli istehsal, həm də xaricdən alınan texnika hesabına öz döyüş qabiliyyətini artırır. Qeyd edilənlərin nəticəsidir ki, bu gün ölkəmiz Cənubi Qafqazın ən güclü ordusuna malikdir.

Ancaq bütün bunlara baxmayaraq, ümidlər tükənmədiyindən ölkəmiz Dağlıq Qarabağ münaqişəsinin hələ də sülh yolu ilə həllinin tərəfdarıdır. Azərbaycanın haqlı və ədalətli mövqeyini sistemli şəkildə bütün dünyaya bəyan edən, ölkəmizin humanizm və sülhpərvərlik prinsiplərinə daim sədaqətli olduğunu bildirən Prezident İlham Əliyev dəfələrlə bildirib ki, Azərbaycanın ərazi bütövlüyü heç zaman müzakirə mövzusu ola bilməz və bu yöndə heç bir kompromis mümkün deyil: "Bizim ən böyük kompromisimiz ondan ibarətdir ki, 20 ilə yaxındır torpaqlarımız işğal altında qaldığı halda, Azərbaycan hələ də sülh prosesinə sadiqdir".

Ölkə rəhbərinin bu mövqeyini sülhsevər xalqımız bəyənir. Lakin "son variant kimi, torpaqlarımızın azadlığı uğrunda müharibə variantı heç vaxt istisna edilmir" bəyanatına da özünü səfərbər görür.

Etiraf etmək lazımdır ki, Azərbaycan xalqı ilə Silahlı Qüvvələrin qəlbi indiki qədər birgə döyünməyib. Şübhəsiz, bu amil dövlətin ordu quruculuğuna yüksək qayğısı ilə yanaşı, Silahlı Qüvvələrin Ali Baş Komandanı İlham Əliyevin qətiyyətli sərkərdə xarakteri, dönməz mövqeyi və fədakar fəaliyyəti ilə bağlıdır.

Bu gün hərbi xərcləri Ermənistanın bütün xərclərindən üstün olan Azərbaycan güclü dövlət qurması, iqtisadi imkanlarını kifayət qədər genişləndirməsi və bölgədə aparıcı mövqe tutması sayəsində dünya arenasında söz sahibi kimi çıxış edə bilir. Elə bunun nəticəsidir ki, beynəlxalq aləmin Ermənistan-Azərbaycan, Dağlıq Qarabağ münaqişəsinin ədalətli həllinə həssaslığı xeyli artıb. Bu münaqişənin bölgədə gedən proseslərə ciddi mənfi təsiri, Azərbaycanın iştirakı olmadan hər hansı regional təşəbbüsün gerçəkləşməsinin mümkünsüzlüyü amili artıq beynəlxalq arenada dilemma kimi qarşıya çıxır. Bütün beynəlxalq hüquq normalarına dəqiq və yüksək ehtiramla əməl edən Azərbaycan torpaqlarının işğaldan azad edilməsi, ərazi bütövlüyünün bərpa olunması iddiasında güzəştsiz dərəcədə israrlıdır. Ermənistan isə zəbt etdiyi torpaqları işğalda saxlamaqda, bütün həqiqətləri qulaqardına vurmaqda və beləliklə, münaqişənin həlli istiqamətindəki danışıqlardan dolayısı ilə yayınmaqda davam edir. Onun bu "inadı"nın arxasında hansı amillər dayanır? Prezident İlham Əliyev çıxışlarının birində bu məsələlərə yetərincə toxunub: "Ermənistandan köçüb gedənlərin sayı artır. Bu gün - 2010-cu ildə vəziyyət belədir. Yəni biz bilirik ki, hətta təmas xəttində, o təmas xəttini qorumaq üçün Ermənistan ordusunda canlı qüvvə çatışmır. Bu yaxınlarda o ölkədə elan edilmiş bəzi tədbirlər onu göstərir ki, onlar hansı çətin vəziyyətdədirlər. Yəni onlar səfərbərliyə cəlb ediləcək insanların yaş həddini artırırlar. Orada canlı qüvvə Azərbaycanda olan insani potensialla müqayisə oluna bilməz. Bu, vacib məsələdir ki, üstünlük bizim tərəfimizdədir. Digər bütün başqa sahələrdə də üstünlük bizim tərəfimizdədir".

Əsl həqiqət belədir. Bu həqiqəti - Ermənistanla Azərbaycan arasında istər iqtisadi sahədə, istər ordu quruculuğu sahəsində, istərsə də digər sahələrdə olan fərqin daha da böyüməsini dərk etməmək və ya dərk etmək iqtidarında olmamaq artıq Ermənistan kimi ələbaxım bir ölkənin öz problemidir. Həqiqətlə məkrin, hiylənin arasındakı uçurumu görə bilməyən, sığınmaq, pənah gətirmək üçün aclığın, səfalətin və rəzalətin əlindən qaçıb Azərbaycana üz tutan erməni hərbçilərinin təəssübünü belə çəkməyən Ermənistan münaqişənin həlli istiqamətindəki danışıqlardan yayındıqca, məğlubiyyət girdabına daha çox yuvarlanır. Çünki həqiqətin bir üzü var və bu həqiqət Azərbaycan üçün birmənalıdır. Prezident İlham Əliyevin təbirincə desək: "Azərbaycan müharibə şəraitindədir. Müharibə bitməyib, müharibənin birinci mərhələsi başa çatıbdır. Biz elə etməliyik ki, istənilən anda torpaqlarımızı hərbi yolla azad edə bilək".

İstənilən anda Azərbaycan Silahlı Qüvvələrinin zəfər yürüşlərinə başlaması üçün bütün birləşmələrin zirehli texnikaları üzərində modernləşdirmə işlərindən tutmuş, atəşin və döyüşün müasir tipli idarəetmə sistemlərinin quraşdırılması da daxil olmaqla çox gərəkli tədbirlər həyata keçirilib. Görülən işlərin ümumi miqyasını təsəvvür etmək üçün təkcə bir faktı xatırlatmaq yetərli sayıla bilər: Azərbaycan Ordusu maksimal uzaqlıqda yerləşən düşmən hədəflərini hava şəraitindən asılı olmayaraq, gecə və gündüz məhv etmək imkanına malikdir. Başqa sözlə, yeni silah sistemlərinin alınıb quraşdırılması sayəsində Silahlı Qüvvələrimiz Ermənistan ərazisinin istənilən nöqtəsində hansı vəziyyətdə olmasından asılı olmayaraq, hər bir hədəfi məhv etməyə qadirdir.

Döyüş hazırlığı ilə əlaqədar əhəmiyyətli tədbirlərdən biri də Azərbaycan Silahlı Qüvvələri, Dövlət Sərhəd Xidməti və Daxili Qoşunların hərbi hissə və bölmələrinin birgə əməliyyat-taktiki təlimi ilə bağlıdır. Belə təlimlərdə hərbi qüvvələrimiz yüksək peşəkarlıq və döyüş məharəti nümayiş etdirmişlər. Məsələn, cari ilin iyunun 24-də keçirilən təlimə cəlb olunan bütün şəxsi heyət əvvəlkilər kimi, yenə də yüksək döyüş hazırlığı nümayiş etdirdi.

Öz ordularındakı acınacaqlı və dözülməz vəziyyətə görə Azərbaycan tərəfə keçməyə üstünlük verən erməni əsgərlərinin qaçışı Ermənistanın bugünkü reallığı, sabahkı faciəsidir. Bu həqiqəti Ermənistan ictimaiyyəti də artıq dərk edir. Ermənistan rəhbərliyi isə hələ də müxtəlif yollarla, hətta öz ölkəsində müxtəlif terror əməliyyatları törətməklə danışıqlar prosesini ləngidir. Azərbaycanın daim konstruktivlik nümayiş etdirdiyini, məsələnin sülh yolu ilə həllində israrlı olduğunu, bölgədə sülhün yaranmasına çalışdığını vurğulayan Prezident İlham Əliyev demişdir: "Baxmayaraq ki, Ermənistanın qeyri-səmimi davranışı artıq özünü açıq şəkildə büruzə verir, biz danışıqlar prosesinə hələ ki müsbət yanaşırıq. Hələ ki Ermənistan tərəfindən cavab gözləyirik. Son təkliflər qəbul olunarsa, onda sülh sazişi üzərində iş başlana bilər. Əgər təkliflər qəbul olunmazsa onda, ümumiyyətlə, danışıqlar prosesinə yenidən baxılmalıdır və əlbəttə ki, Azərbaycan yaranacaq vəziyyətə adekvat mövqe nümayiş etdirəcəkdir".

Azərbaycan.- 2010.-18 dekabr.- S. 1.