Heydər Əliyev adına Bakı neft emalı zavodunda katalitik-riforminq qurğusunun işə salınmasının 30 illiyi qeyd olunmuşdur

Dekabrın 18-də Heydər Əliyev adına Bakı neft emalı zavodunda (BNEZ) yüksək oktanlı benzin komponenti istehsal edən katalitik-riforminq qurğusunun işə salınmasının 30 illiyi ilə əlaqədar tədbir keçirilmişdir. Tədbirdə Azərbaycan Respublikası Dövlət Neft Şirkətinin (ARDNŞ) əməkdaşları, veteran neftçilər iştirak etmişlər.

Əvvəlcə tədbirin iştirakçıları Azərbaycan xalqının ümummilli lideri Heydər Əliyevin müəssisənin həyətindəki büstü önünə əklil qoymuş, tər çiçəklər düzmüşlər.

Sonra onlar katalitik-riforminq, eləcə də digər qurğularla yaxından tanış olmuşlar. Məlumat verilmişdir ki, katalitik-riforminq qurğusu ABŞ-ın "UOP" şirkətinin texnologiyası əsasında inşa edilmişdir. Qurğunun layihəsi Fransanın "Litvin" şirkəti tərəfindən hazırlanmışdır.

Tədbirdə ulu öndər Heydər Əliyevin xatirəsi bir dəqiqəlik sükutla yad edilmişdir.

Sonra respublikamızın neft sənayesində, eləcə də zavodun iqtisadi potensialının yüksəlməsində böyük rolu olan katalitik-riforminq qurğusunun tarixi ilə bağlı film nümayiş olunmuşdur.

Zavodun direktoru Elman İsmayılov məlumat vermişdir ki, katalitik-riforminq qurğusunun yaradılmasında ulu öndər Heydər Əliyevin xüsusi səyi olmuşdur. Ötən əsrin 70-80-ci illərində məhz ulu öndərimizin təşəbbüsü ilə müəssisəmizdə istehsalın əsaslı surətdə təkmilləşdirilməsi istiqamətində yeni texnoloji qurğuların inşası həyata keçirilmişdir. 1980-ci ildə istifadəyə verilən katalitik-riforminq qurğusu keçmiş sovetlər məkanında ilk dəfə məhz Azərbaycanda tikilmişdir. Dekabr ayının 14-də işə salınan qurğudan iki gün sonra ilk məhsul alınmışdır. Qurğunun işə salınması nəinki respublikamızda, o cümlədən keçmiş sovetlər ittifaqının neft sənayesində əlamətdar hadisə kimi qiymətləndirilmişdir. Katalitik-riforminq qurğusundan əlavə, neftin ilkin emalı üzrə ELOU-AVT-6, tədrici kokslaşma, katalitik-krekinq qurğuları da istifadəyə verilmişdir. Bu qurğular neft emalı prosesində beynəlxalq standartlara cavab verən çeşidli məhsulların istehsalına imkan yaratmışdır. Məhz buna görə müstəqil Azərbaycan Respublikası bütün dünyada aparıcı neft ölkələrindən biri kimi tanınır və bu sahənin inkişafına önəmli töhfələrini verir.

Sonra ARDNŞ-in birinci vitse-prezidenti, akademik Xoşbəxt Yusifzadə, şirkətin emal üzrə vitse-prezidenti David Məmmədov, ötən əsrin 70-ci illərində Heydər Əliyevin rəhbərliyi altında neft-kimya sənayesi naziri işləmiş Kamil Akimov və digərləri BNEZ-də həyata keçirilən layihələrin ölkə iqtisadiyyatı üçün mühüm əhəmiyyətini diqqətə çatdırmış, ulu öndər Heydər Əliyevin neft sənayesinə böyük qayğısı sayəsində neft emalı zavodlarında quraşdırılmış qurğuların respublikamızın inkişafına töhfələrini diqqətə çatdırmışlar. Bildirilmişdir ki, məhz ulu öndər Heydər Əliyevin uzaqgörən və düşünülmüş siyasəti, həmçinin keçən əsrin 70-80-ci illərində ölkənin neft sənayesində atılmış mühüm addımlar Azərbaycanın bu günü üçün düşünülmüşdür.

Sonda zavodun bir qrup işçisinə əldə olunmuş yüksək istehsalat göstəricilərinə və qurğunun 30 illiyi ilə əlaqədar ARDNŞ-in fəxri fərmanları təqdim edilmişdir.

AzərTAc

Azərbaycan.- 2010.- 19 dekabr.- S. 2.