Azərbaycanla Türkiyə arasında strateji tərəfdaşlıq və qarşılıqlı yardım haqqında Müqavilə təsdiq edildi

Milli Məclisin dekabrın 21-də keçirilən növbəti plenar iclası parlament rəhbərliyinin və deputatların Avropa Parlamentinin (AP) Ermənistan üzrə məruzəçisi, Polşadan olan deputat Tomaş Porebanın Dağlıq Qarabağa qanunsuz səfər etməsinə kəskin münasibət bildirmələri ilə başladı. Milli Məclisin Sədri Oqtay Əsədov bildirdi ki, AP-nin Azərbaycanın ərazi bütövlüyünü dəstəkləməsinə, Dağlıq Qarabağ problemi ilə bağlı qətnamə qəbul etməsinə baxmayaraq, onun üzvü T.Poreba razılaşdırılmadan Ermənistandan Dağlıq Qarabağa səfər etmiş, Dağlıq Qarabağ üzrə heç bir səlahiyyəti olmadan oradakı separatçı rejimin nümayəndələri ilə görüşlər keçirmişdir.

Bu məsələ ilə bağlı Azərbaycan Milli Məclisinin Sədri kimi Avropa Parlamentinin Sədri Yeji Buzekə etiraz məktubu göndərəcəyini bildirən Oqtay Əsədov dedi: "Hamı bilməlidir ki, Dağlıq Qarabağ Azərbaycanın ərazisidir və heç bir kəsin, ələlxüsus beynəlxalq təşkilatların Azərbaycanın hüquqlarını pozmağa ixtiyarı yoxdur".

Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirdi ki, bu ilin may ayında AP-nin Dağlıq Qarabağla bağlı qəbul etdiyi qətnamədə birmənalı göstərilmişdir ki, Azərbaycan torpaqları işğal altındadır, AP, Avropa İttifaqı (Aİ) Azərbaycanın ərazi bütövlüyünü tanıyır və Dağlıq Qarabağ probleminin tezliklə beynəlxalq prinsiplər çərçivəsində həll olunmasının tərəfdarıdır. Çox təəssüflər olsun ki, T.Pareba təmsil etdiyi qurumun tapşırığını yerinə yetirmək əvəzinə Azərbaycanın ərazi bütövlüyünü pozaraq Ermənistandan Dağlıq Qarabağa gedib və orada separatçı rejimin nümayəndələri ilə görüşlər keçirib. Onun bu əməli nəinki Azərbaycanın ərazi bütövlüyünün pozulması kimi, eləcə də Avropanın özünün siyasətinə zidd hərəkət kimi qiymətləndirilməlidir.

Səməd Seyidovun sözlərinə görə, Milli Məclisin Beynəlxalq münasibətlər və parlamentlərarası əlaqələr komitəsi məktublar göndərərək T.Porebanın hərəkətinin pislənilməsini Aİ-dan və AP-dən tələb edəcək. Ona görə ki bu hərəkət Azərbaycanın ərazi bütövlüyü ilə bağlı məsələləri pozmaqla yanaşı, Avropanın siyasətinə də ziddir.

Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirdi ki, Azərbaycan AP-da təmsil olunmasa da, Aİ ilə müxtəlif proqramlar, o cümlədən "Şərq tərəfdaşlığı" proqramı çərçivəsində əməkdaşlığımız mövcuddur. AP-nin 60 üzvü və 6 müstəqil dövlətin, o cümlədən Azərbaycan Milli Məclisinin deputatlarının iştirakı ilə "Şərq Tərəfdaşlığı"na qoşulan ölkələrin Parlament Assambleyasının (Evronest) yaradılması nəzərdə tutulur. Əli Hüseynlinin sözlərinə görə, AP-də təmsil olunan deputatlar daha çox sərbəstliyə malikdirlər. Buna baxmayaraq, hər bir parlament üzvü təmsil etdiyi qurumun qəbul etdiyi qərarlara hörmətlə yanaşmalıdır.

Çox ciddi təzyiqlərə baxmayaraq, bu ilin may ayında AP-də Cənubi Qafqazla bağlı obyektiv qətnamə qəbul olundu. Obyektivlik ondan ibarətdir ki, bu sənəddə Dağlıq Qarabağda separatçılığın mövcud olması, Dağlıq Qarabağ və onun ətrafında olan digər Azərbaycan rayonlarının Ermənistan silahlı qüvvələri tərəfindən işğal edilməsi dəqiq göstərilir. AP-nin rəhbərliyi, müvafiq qurumları, eləcə də Evronestin yaradılmasında məsul olan şəxslər də məhz AP-nin qəbul etdiyi qərarlarda əks olunmuş prinsiplər əsasında məruzəçilərin fəaliyyət göstərməsini tənzimləməlidirlər. Amma T.Poreba tərəfindən AP-nin özünün qəbul etdiyi qərarın prinsipləri pozulmuşdur. Bununla bağlı həm AP-nin rəhbərliyinə, həm də müvafiq komitələrinə obyektivliyi xarakterizə edən məlumatları göndərəcəklərini deyən Əli Hüseynli onu da bildirdi ki, eyni zamanda rəsmi qaydada Aİ-nin Azərbaycandakı nümayəndəliyinə və Polşanın ölkəmizdəki səfirliyinə də öz mövqeyimizi çatdırmalıyıq.

Deputat Fazil Mustafanın sözlərinə görə, AP deputatının Dağlıq Qarabağa səfər etməsinə sərt mövqe nümayiş etdirilməli, onun Azərbaycandan üzr istəməsi tələb olunmalıdır.

Deputat Əli Əhmədov bu məsələ ilə bağlı iki təklif irəli sürdü. Təkliflərdən biri AP-nə göndəriləcək məktubda Dağlıq Qarabağ probleminə dair AP-nin sədrinin özünün də mövqeyi ilə bağlı münasibətin ortaya qoyulmasıdır. Çünki o, bir müddət bundan əvvəl keçmiş SSRİ ərazisindəki həll olunmamış münaqişələrə münasibət bildirərkən Dağlıq Qarabağ probleminin çox şübhəli formada, ədalətsiz şəkildə həll olunmasını məqsədəuyğun hesab etmişdi.

Əli Əhmədovun digər təklifi Dağlıq Qarabağa səfər etmək qaydalarının müəyyənləşdirilməsi ilə bağlı oldu. Onun sözlərinə görə, parlament bu məsələ ilə bağlı hansısa formada iş aparmalıdır. Bununla bağlı Azərbaycanın işğal edilmiş əraziləri haqqında qanun da qəbul oluna bilər. Həmin qanunda işğal olunmuş Azərbaycan ərazilərinə beynəlxalq təşkilatların nümayəndələrinin hansı formada və qaydalar əsasında səfər etməsi öz əksini tapa bilər. Bundan sonra bu qaydaları pozaraq həmin ərazilərə gələn insanlara qarşı Azərbaycan hökumətinin sanksiyalar tətbiq etməsi üçün hüquqi baza yaradılar.

Milli Məclisin Sədri Oqtay Əsədov bildirdi ki, Azərbaycan hökuməti həmişə bu məsələyə sərt reaksiya verir.

Milli Məclisin Sədr müavini Bahar Muradova AP nümayəndəsinin Dağlıq Qarabağa səfər etməsinə münasibət bildirdi və qeyd etdi ki, bütün beynəlxalq təşkilatlara bununla bağlı müraciətlər edilməli və Azərbaycanın hüquqlarının pozulmasına yönəlmiş bütün cəhdlərin qarşısı alınmalıdır.

Deputatlardan Qüdrət Həsənquliyev, Qənirə Paşayeva, Musa Quliyev və Məlahət İbrahimqızı da çıxışlarında deputatlar tərəfindən səslənən fikirləri və təklifləri dəstəklədilər.

Sonra gündəlikdəki məsələlərin müzakirəsi başladı. İlk olaraq "Azərbaycan Respublikası Ali Məhkəməsi hakiminin təyin edilməsi haqqında" məsələ müzakirəyə təqdim olundu. Deputatlar Nəsirov İnqilab Maşallah oğlunun Ali Məhkəmənin hakimi təyin olunmasına müsbət münasibət bildirdilər.

İclasda "Normativ hüquqi aktlar haqqında" Azərbaycan Respublikasının Konstitusiya Qanununun ikinci səsverməsi keçirildi və təsdiq olundu.

Bundan sonra Azərbaycan Respublikası Prezidentinin qanunvericilik təşəbbüsü qaydasında parlamentə təqdim etdiyi "Azərbaycan Respublikasının İnsan hüquqları üzrə müvəkkili (ombudsman) haqqında" Azərbaycan Respublikasının Konstitusiya Qanununa dəyişikliklər və əlavələr edilməsi barədə" qanun layihəsi müzakirəyə təqdim olundu. Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirdi ki, Azərbaycan Respublikası Birləşmiş Millətlər Təşkilatının "İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiya"sının Fakültativ Protokoluna qoşulmuşdur. Fakültativ Protokolda əsas müddəalardan biri ona qoşulan ölkələrdə işgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə milli preventiv mexanizmin yaradılmasıdır. Azərbaycan Prezidenti cənab İlham Əliyevin 2009-cu ilin yanvarında imzaladığı sərəncamla ölkəmizdə "İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiya"nın Fakültativ Protokolunda nəzərdə tutulmuş milli preventiv mexanizmin funksiyalarını yerinə yetirən təsisat qismində Azərbaycan Respublikasının insan hüquqları üzrə müvəkkili (ombudsman) müəyyən edilmişdir. Qanun layihəsində təklif olunan əlavə və dəyişikliklərdən biri bu səlahiyyətin ombudsmana verilməsidir.

Layihəyə əsasən Konstitusiya Qanununa təklif olunan digər əlavə və dəyişiklik "İnformasiya əldə etmək haqqında" Azərbaycan Respublikasının Qanununda nəzərdə tutulmuş informasiya məsələləri üzrə müvəkkilin səlahiyyətlərinin insan hüquqları üzrə müvəkkilə (ombudsmana) verilməsidir.

Müzakirələr zamanı Milli Məclisin İnsan hüquqları komitəsinin sədri Rəbiyyət Aslanova bildirdi ki, ölkəmizdə 2001-ci ildə yaradılan Ombudsman təsisatı ötən illərdə inkişaf yolu keçib. Bu gün ombudsmanın səlahiyyətlərinin artırılması, bununla bağlı Konstitusiya Qanununa əlavələrin və dəyişikliklərin edilməsi dövrün tələblərinə cavab verir. Rəbiyyət Aslanova onu da bildirdi ki, əlavələr və dəyişikliklər insan hüquqlarının qorunmasına xidmət edir.

Milli Məclis Sədrinin müavini Bahar Muradova da Konstitusiya Qanununa təklif olunan əlavələri və dəyişiklikləri yüksək qiymətləndirdi. Onun sözlərinə görə, bütün bunlar ölkəmizdə insan hüquqlarının effektiv qorunmasına xidmət edəcəkdir.

Deputatlardan Zahid Oruc, Siyavuş Novruzov, Elmira Axundova və İqbal Ağazadə bu məsələyə münasibətlərini bildirdilər. Müzakirələrdən sonra qanun layihəsi təsdiq olundu.

Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov "Türkdilli Ölkələrin Dövlət Başçılarının X Zirvə Toplantısının Bəyannaməsinin təsdiq edilməsi haqqında" qanun layihəsi barədə məlumat verdi. Qeyd edildi ki, Bəyannamə 2010-cu il sentyabr ayının 16-da İstanbulda imzalanıb. Azərbaycan, Qazaxıstan, Qırğızıstan, Türkiyə və Türkmənistanın dövlət başçılarının imzaladıqları Bəyannamədə tərəflər türkdilli dövlətlər arasında ortaq tarix, mədəniyyət, mənsubiyyət və dilə əsaslanan qarşılıqlı maraqları, münasibətləri və həmrəyliyi inkişaf etdirmək niyyətlərini ifadə ediblər. Bəyannamədə, həmçinin türkdilli ölkələr üçün həssas olan məsələlərin regional və beynəlxalq təşkilatların gündəliyində daha intensiv yer tutması məqsədi ilə beynəlxalq təşkilatlarda birgə mövqenin nümayiş etdirilməsinin əhəmiyyətinə diqqət yetirilir. Tərəflər sərhədlərin zorla dəyişdirilməsinin yolverilməz olmasına dair öz mövqelərini də Bəyannamədə bir daha təsdiq ediblər.

Deputatlar Bəyannaməni təsdiq etdilər.

Səməd Seyidov "Azərbaycan Respublikası və Türkiyə Respublikası arasında strateji tərəfdaşlıq və qarşılıqlı yardım haqqında" Müqavilənin təsdiq edilməsinə dair qanun layihəsi barədə də məlumat verdi. 2010-cu il avqust ayının 16-da Bakıda imzalanmış Müqavilənin ikinci maddəsinə əsasən tərəflərdən biri üçüncü dövlət və ya bir qrup dövlət tərəfindən silahlı basqın və ya hərbi təcavüzə məruz qaldıqda, tərəflər BMT Nizamnaməsinin 51-ci maddəsi ilə tanınan fərdi və ya kollektiv özünümüdafiə hüququnun həyata keçirilməsi üçün hərbi imkan və qüdrətlərindən istifadə etmək də daxil olmaqla, mövcud imkanları çərçivəsində bütün zəruri tədbirlərin görülməsi məqsədilə bir-birinə qarşılıqlı yardım göstərəcəkləri barədə razılığa gəliblər. Tərəflər bu maddədə qeyd olunan müdafiə və qarşılıqlı yardımın həyata keçirilməsi çərçivəsində birgə hərbi əməliyyatlar aparılması məqsədilə hərbi infrastrukturlarının təkmilləşdirilməsi, silahlı qüvvələrin hərtərəfli hazırlığı, onların zəruri silahlarla və hərbi texnika ilə təmin edilməsi üçün lazımi tədbirləri görəcəklər.

Müqavilədə Azərbaycanla Türkiyə arasında iqtisadi və humanitar əməkdaşlıqla bağlı mühüm məsələlər də öz əksini tapıb. Milli Məclis Müqaviləni təsdiq etdi.

Qısa fasilədən sonra Milli Məclis işini davam etdirdi. Gündəliyin növbəti məsələsi olan "Azərbaycan Respublikası və Türkiyə Respublikası arasında Yüksək Səviyyəli Strateji Əməkdaşlıq Şurasının yaradılması haqqında" Birgə Bəyannamənin təsdiq edilməsi barədə Azərbaycan Respublikası Qanununun layihəsi haqqında Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verdi. Bildirdi ki, bu, Azərbaycan və Türkiyə arasında yüksək səviyyəli əlaqələrin elə yüksək səviyyədə idarə edilməsinə imkan verəcək: "Bu məqsədlə Azərbaycan Respublikası və Türkiyə Respublikası arasında Yüksək Səviyyəli Strateji Əməkdaşlıq Şurasının yaradılması haqqında 2010-cu il sentyabrın 15-də İstanbulda Birgə Bəyannamə imzalanmışdır. Bu, tarixi bir sənəddir". Səsvermədən sonra layihə qəbul edildi.

Azərbaycan, Gürcüstan, Rumıniya prezidentlərinin və Macarıstanın Baş nazirinin Bakı Bəyannaməsinin təsdiq edilməsi haqqında qanun layihəsi barədə də Beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verdi: "Prezident İlham Əliyevin apardığı siyasət nəticəsində Azərbaycan dünya ölkələri arasında güclü, müstəqil və öz mövqeyi olan dövlət kimi çıxış edir. Bu siyasətin özünəməxsus müxtəlif cizgiləri mövcuddur. Sözügedən layihəyə gəlincə, belə bir sənədin gündəmə gəlməsi və parlamentdə müzakirə edilərək ratifikasiya olunması həddən artıq böyük əhəmiyyət kəsb edir". Layihə səsə qoyulduqdan sonra təsdiq edildi.

"Azərbaycan Respublikası və Rusiya Federasiyası arasında dövlət sərhədi haqqında" müqavilənin təsdiq edilməsi barədə Azərbaycan Respublikası Qanununun layihəsi haqqında da məlumatı Beynəlxalq münasibətlər və parlamentlərarası əlaqələr komitəsinin sədri Səməd Seyidov verdi. Qeyd etdi ki, bu gün Prezident İlham Əliyev tərəfindən Azərbaycanın yeni tarixi yazılır: "Özü də bu tarix əsrlər boyu Azərbaycanın müstəqilliyini təmin edəcək bir tarixdir. Sözügedən tarixi yaradan sənədlər arasında Azərbaycan Respublikası və Rusiya Federasiyası arasında dövlət sərhədi haqqında müqavilə xüsusi əhəmiyyətə malikdir. Çünki sərhəd məsələsi Azərbaycan üçün çox vacib əhəmiyyət kəsb edir". Deputat Zahid Oruc qanun layihəsini Azərbaycanın dövlətçilik tarixinin ən mühüm hadisələrindən biri kimi dəyərləndirdi. Deputat Siyavuş Novruzov bildirdi ki, hər hansı dövlətin xarici siyasətində ən mühüm məqamlardan biri qonşu ölkələrlə yaxşı münasibətlərin yaradılmasıdır. Bildirdi ki, Azərbaycan bu istiqamətdə mühüm addımlar atır və müzakirəyə təqdim olunan sənəd bunun bariz sübutudur. Deputat Aydın Mirzəzadə də vurğuladı ki, tarixi əhəmiyyətli bu layihə Azərbaycanın ərazi bütövlüyünü təsdiqləyən fundamental sənədlərdən biridir.

Layihə səsə qoyularaq qəbul olundu.

"Azərbaycan Respublikası Hökuməti və Rusiya Federasiyası Hökuməti arasında Samur transsərhəd çayının su ehtiyatlarının səmərəli istifadəsi və mühafizəsi sahəsində əməkdaşlıq haqqında" Sazişin təsdiq edilməsi barədə Azərbaycan Respublikası Qanununun layihəsi haqqında Milli Məclis Sədrinin müavini, Təbii ehtiyatlar, energetika və ekologiya komitəsinin sədri Valeh Ələsgərov məlumat verdi. Qeyd etdi ki, Azərbaycan və Rusiya Federasiyası arasında Samur transsərhəd çayının su ehtiyatlarının səmərəli istifadəsi və mühafizəsi sahəsində əməkdaşlıq edilməsi ilə bağlı olan məsələnin uzun bir tarixi var. Bu sahədə aparılan danışıqların nəticəsi olaraq 2010-cu il sentyabrın 3-də Bakıda Samur çayının mühafizəsi və ondan istifadəyə dair saziş imzalanıb.

Sazişin mahiyyəti və detalları barədə ətraflı məlumat verən Valeh Ələsgərov dedi ki, bu sənədə əsasən, çayın ekosisteminin qorunması üçün həcmi 30,5 faizə bərabər müəyyən edilən ekoloji suburaxımını çıxmaqla onun sərhəd sahəsinin başlanğıcına daxil olan su ehtiyatları tərəflər arasında bərabər nisbətdə bölünür.

Valeh Ələsgərov onu da bildirdi ki, sazişin həyata keçirilməsi məqsədilə çayın su ehtiyatlarının bölünməsi üzrə Azərbaycan-Rusiya birgə komissiyası yaradılır. Birgə komissiya hər bir tərəfin təyin etdiyi iki həmsədrin rəhbərliyi altında fəaliyyət göstərir. Bununla yanaşı, sözügedən komissiya suyun operativ bölüşdürülməsi üzrə işçi qrupu və işçi orqanları formalaşdırır, onların fəaliyyətini parietet əsasda təmin edir. Komissiyanın səlahiyyətlərinə su bölgüsü və ekoloji suburaxma həcmlərinin ongünlük qrafiklərini tərtib və təsdiq etmək, çayda suyun keyfiyyəti üzrə monitorinq proqramlarının işlənib hazırlanmasını və yerinə yetirilməsini təşkil etmək təbii və texnogen xarakterli fövqəladə vəziyyətlərin xəbərdarlıq edilməsi, onların təsirinin yüngülləşdirilməsi və ləğvi ilə əlaqədar birgə fəaliyyət qaydalarının müəyyənləşdirilməsi və digər məsələlər aiddir. Səsvermədən sonra layihə təsdiq olundu.

"Yol nişanları və siqnalları haqqında" Konvensiyanın təsdiq edilməsi barədə, "Yol nişanları və siqnalları haqqında" 1968-ci il Konvensiyasını tamamlayan Avropa Sazişinin təsdiq edilməsi barədə Azərbaycan Respublikası Qanununun layihələri və "Yol nişanları və siqnalları haqqında" 1968-ci il Konvensiyasını tamamlayan Avropa Sazişinin "Yolların nişanlanması barədə" Protokolunun təsdiq edilməsi haqqında Azərbaycan Respublikası Qanununun layihəsi barədə Milli Məclisin İqtisadi siyasət komitəsinin sədr müavini Çingiz Əsədullayev məlumat verdi. Bildirdi ki, son illər ərzində Azərbaycan dövləti tərəfindən aparılan genişmiqyaslı yol-nəqliyyat siyasəti nəticəsində ölkədə yeni yollar çəkilib: "Şimal, cənub, şərq, qərb istiqamətlərində böyük nəqliyyat daşımaları həyata keçirilir. Azərbaycanın yolları Avropa standartlarına uyğunlaşdırılır. Yol nişanlarının, siqnallarının yeni inşa edilən yollarda beynəlxalq miqyasda qəbul olunanlarla eyniliyinin təmin edilməsi məqsədilə beynəlxalq müqavilələr təsdiq olunmaq üçün Milli Məclisə göndərilib". Səsvermədən sonra hər üç qanun layihəsi qəbul olundu.

Gündəliyin digər məsələsi olan Azərbaycan Respublikasının 2001-ci il 29 iyun tarixli 168-IIQ nömrəli Qanunu ilə təsdiq edilmiş "Azərbaycan Respublikasının daxili işlər orqanlarında xidmətkeçmə haqqında Əsasnamə"yə əlavə edilməsi barədə Azərbaycan Respublikası Qanununun layihəsi haqqında parlamentin Hüquq siyasəti və dövlət quruculuğu komitəsinin sədri Əli Hüseynli məlumat verərək bildirdi ik, təklif olunan əlavə daha düzgün və daha dəqiq kadr siyasətinin həyata keçirilməsi baxımından vacibdir. Səsvermədən sonra qanun qəbul olundu. Azərbaycan Respublikasının Cinayət-Prosessual Məcəlləsində dəyişiklik edilməsi haqqında və Azərbaycan Respublikasının İnzibati Xətalar Məcəlləsində dəyişikliklər edilməsi haqqında qanun layihələri barədə də Hüquq siyasəti və dövlət quruculuğu komitəsinin sədri Əli Hüseynli məlumat verdi. Aparılan müzakirələrdən sonra hər iki layihə qəbul olundu.

Azərbaycan Respublikasının Şabran rayonunun Təzəkənd kəndinin Dəvəçi kəndi adlandırılması haqqında Azərbaycan Respublikası Qanununun layihəsi barədə Parlamentin Regional məsələlər komitəsinin sədri Arif Rəhimzadə məlumat verdi. Bildirdi ki, bundan əvvəl Dəvəçi rayonuna Şabran adı verilib: "Hələ bu barədə məsələ müzakirə olunarkən Toponimiya komissiyasınada və Milli Məclisdə belə bir fikir səslənmişdi ki, Dəvəçi adı da tarixi toponimdir. Ona görə bu adı da yaşatmaq lazımdır. Müzakirəyə təqdim olunan qanun layihəsində Şabran rayonunun Təzəkənd kəndinə və bu kəndin inzibati dairəsinə Dəvəçi adının verilməsi nəzərdə tutulur". Layihə səsə qoyularaq qəbul olundu.

"İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" Azərbaycan Respublikası Qanununun tətbiqi ilə əlaqədar Azərbaycan Respublikasının Əmək Məcəlləsinə və "Sığorta fəaliyyəti haqqında" Azərbaycan Respublikasının Qanununa əlavələr və dəyişikliklər edilməsi barədə Azərbaycan Respublikası Qanununun layihəsi, eləcə də "İnsanın immunçatışmazlığı virusunun törətdiyi xəstəliklə mübarizə haqqında" Azərbaycan Respublikası Qanununun tətbiqi ilə əlaqədar Azərbaycan Respublikasının bəzi qanunvericilik aktlarına dəyişikliklər və əlavələr edilməsi və "İnsanın immunçatışmazlığı virusunun törətdiyi xəstəliyin (AİDS) yayılmasının qarşısının alınması haqqında" Azərbaycan Respublikası Qanununun qüvvədən düşmüş hesab edilməsi barədə Azərbaycan Respublikası Qanununun layihəsi haqqında Milli Məclisin Sosial siyasət komitəsinin sədri Hadi Rəcəbli məlumat verdi. Hər iki layihə səsvermədən sonra qəbul edildi.

"Təhsil haqqında" Azərbaycan Respublikası Qanununun tətbiqi ilə əlaqədar Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə Azərbaycan Respublikası Qanununun layihəsi haqqında Milli Məclis Sədrinin birinci müavini, Təhlükəsizlik və müdafiə komitəsinin sədri Ziyafət Əsgərov məlumat verdi. Qeyd etdi ki, ölkədə "Təhsil haqqında" yeni qanunun qəbulundan sonra onun tətbiqi ilə əlaqədar təxminən 40-a yaxın qanunvericilik aktına əlavələr və dəyişikliklər edilir. Bunlar əsasən redaktə xarakteri daşıyır və əsas etibarı ilə "tədris müəssisələri" sözləri "təhsil müəssisələri" sözləri ilə əvəz olunur. Səsvermədən sonra layihə qəbul olundu və bununla Milli Məclis işini yekunlaşdırdı.

Azərbaycan.- 2010.- 22 dekabr.- S. 1, 2.