Bakı Dövlət Universitetində akademik Şəfaət Mehdiyevin 100 illik yubileyinə həsr olunmuş respublika elmi konfransı keçirilir

Dekabrın 21-də Bakı Dövlət Universitetində (BDU) geologiya-mineralogiya elmləri doktoru, professor, Dövlət mükafatı laureatı, əməkdar elm xadimi, akademik Şəfaət Mehdiyevin 100 illik yubileyinə həsr olunmuş "Geologiyanın aktual problemləri" mövzusunda respublika elmi konfransı öz işinə başlamışdır.

AzərTAc xəbər verir ki, konfransdan əvvəl BDU-da Ş.Mehdiyevin adını daşıyan auditoriyanın və barelyefin açılışı olmuşdur.

Tədbirdə təhsil naziri Misir Mərdanov, Azərbaycan Milli Elmlər Akademiyasının (AMEA) prezidenti akademik Mahmud Kərimov, Milli Aviasiya Akademiyasının rektoru akademik Arif Paşayev, xarici işlər nazirinin müavini, Azərbaycan Diplomatik Akademiyasının rektoru professor Hafiz Paşayev, M.V.Lomonosov adına Moskva Dövlət Universiteti Bakı filialının rektoru professor Nərgiz Paşayeva, Milli Məclisin deputatları, tanınmış alimlər və tələbələr iştirak etmişlər.

Konfransda BDU-nun rektoru, Milli Məclisin deputatı akademik Abel Məhərrəmov çıxış edərək Azərbaycan Prezidentinin böyük alimin 100 illik yubileyinin keçirilməsi haqqında sərəncamının əhəmiyyətini vurğulamışdır. Bildirmişdir ki, dövlətimizin başçısının müvafiq sərəncamı bütövlükdə Azərbaycan elminə, elm xadimlərinə göstərilən qayğının göstəricisidir.

Şəfaət Mehdiyev ensiklopedik biliyə və geniş erudisiyaya malik alim, görkəmli neftçi-geoloq olmaqla yanaşı, eyni zamanda peşəkar jurnalist, yazıçı və ictimai-siyasi xadim idi.

Akademik Şəfaət Mehdiyevin 1958-1965-ci illərdə BDU-nun rektoru olduğunu diqqətə çatdıran A.Məhərrəmov vurğulamışdır ki, belə şəxsiyyətlərin, böyük elm və təhsil təşkilatçılarının fədakarlığı nəticəsində universitet özünün bugünkü yüksək səviyyəsinə gəlib çatmışdır. Neçə-neçə dövlət xadimi, elm, mədəniyyət, ədəbiyyat, hüquq və başqa sahələrin nümayəndələri məhz onun rektorluğu dövründə universitetdə təhsil almışlar. Onların hər biri ustad alim, nüfuzlu ziyalı, tanınmış pedaqoq, ən əsası isə millətini sevən Şəfaət Mehdiyevi bu gün də xoş xatirələrlə anır.

Görkəmli alimin xatirəsi birdəqiqəlik sükutla yad edilmişdir.

Konfransda BDU-nun kafedra müdiri, AMEA-nın müxbir üzvü Vasif Babazadənin "Görkəmli geoloq alim" və geologiya fakültəsinin dekanı Adil Xasayevin "Unudulmaz müəllim və ictimai xadim" mövzularında məruzələri dinlənilmişdir.

Bildirilmişdir ki, Şəfaət Mehdiyev 1910-cu ildə İranın Sarab qəzasının Şalqun kəndində anadan olmuşdur. Dörd yaşında atasını itirdikdən sonra ailəsi ilə birlikdə Bakıya köçmüşdür. 1930-cu ilin aprelində o, Azərbaycan Sənaye İnstitutunun (hazırkı ADNA) geoloji-kəşfiyyat fakültəsinə daxil olmuş və 1934-cü ildə oranı bitirərək neft və qaz yataqlarının kəşfiyyatı üzrə dağ mühəndisi ixtisasına yiyələnmişdir.

Hələ tələbə ikən o, "Azneftkəşfiyyat" Trestində geoloq, sonra Mərdəkan mədənində kəşfiyyat sahəsinin geoloqu vəzifələrində işləmiş, daha sonra isə Mərdəkan-Türkan kəşfiyyat qrupunun böyük geoloqu olmuşdur.

Şəfaət Mehdiyev 1932-1936-cı illərdə Sənaye İnstitutunun "Neft kadrları uğrunda" adlı çoxtirajlı, daha sonra "Gənc işçi" qəzetlərinin, "Gənc bolşevik" məcmuəsinin, "Azərbaycan idmançısı", "Qala neftçisi" qəzetlərinin redaktoru işləmişdir. 1936-cı ildən Pirsaat neft mədənində, 1937-1938-ci illərdə Neftçala neft mədənində geoloq kimi çalışmış, daha sonra Azərbaycan Elmi-Tədqiqat Neftçıxarma İnstitutunda baş geoloq, direktor müavini vəzifələrinə irəli çəkilmiş, eyni zamanda, aspiranturaya daxil olmuşdur. O, 1941-1945-ci illər müharibəsinin ilk günlərindən hərbi xidmətə çağırılmış və Qara dəniz qrupunda, Zaqafqaziya və dördüncü Ukrayna cəbhələrində zabit kimi vuruşmuşdur. 1944-cü ilin martında mühəndis-geoloq kimi arxa cəbhəyə göndərilmişdir. Ş.Mehdiyev yenidən aspiranturaya bərpa olunmuş, 1945-ci ilin əvvəllərində doktorluq dissertasiyalarını müdafiə etmişdir.

Diqqətə çatdırılmışdır ki, Şəfaət Mehdiyev tərəfindən Abşeron yarımadasının neft yataqlarının istilik rejimi məsələləri dəqiq surətdə tədqiq olunmuş və qiymətli əsərlər hazırlanmışdır.

Neftin mənşəyi problemi ilə dərindən məşğul olan Şəfaət Mehdiyev hələ 1966-cı ildə neftin dərinlik-biogen genezisi hipotezini irəli sürmüş, sonrakı tədqiqatları ilə onu nəzəriyyə səviyyəsinə çatdırmışdır. Sonralar bu fikir dünyanın bir çox alimləri tərəfindən qəbul edilmişdir.

Vurğulanmışdır ki, akademik Şəfaət Mehdiyev 400-ə qədər elmi əsərin, 20-dən artıq monoqrafiyanın, Azərbaycanın geoloji və tektonik xəritələrinin, neft və qaz yataqları xəritələrinin redaktoru və tərtibçisi olmuşdur. O, "Azərbaycanın geologiyası" adlı çoxcildli nəşrində ayrı-ayrı fəsillərin və bölmələrin tərtibində və redaktə işində böyük əmək sərf etmişdir.

Alim 1965-ci ildən ömrünün sonunadək AMEA-nın Geologiya İnstitutunda neftin və qazın geologiyası şöbəsinin rəhbəri və Azərbaycan Dövlət Neft Akademiyasında Neft və qaz yataqlarının geologiyası və kəşfiyyatı kafedrasının müdiri olmuşdur.

Bildirilmişdir ki, ümummilli lider Heydər Əliyev Şəfaət Mehdiyevi istedadlı alim olmaqla yanaşı, Azərbaycan xalqına xas zəngin mənəvi keyfiyyətlərin daşıyıcısı kimi dəyərləndirərək demişdir: "Akademik Şəfaət Mehdiyev böyük alim, böyük ziyalı, böyük şəxsiyyət olmaqla yanaşı, yaxşı kişi idi".

Tədbirdə təhsil naziri Misir Mərdanov, AMEA-nın Geologiya İnstitutunun direktoru akademik Akif Əlizadə, Bakı Dövlət Universitetinin kafedra müdiri Abuzər Xələfov, BDU-nun coğrafiya fakültəsinin dekanı Müseyib Müseyibov alimlə bağlı unudulmaz xatirələrini bölüşmüşlər.

Azərbaycanda geologiya elminin formalaşması və inkişafında misilsiz xidmətləri olmuş Şəfaət Mehdiyev geniş elmi biliyə, yüksək təşkilatçılıq bacarığına malik bir alim kimi bu gün də böyük hörmət və ehtiramla yad edilir. Onun xeyirxahlığı, insanpərvərliyi, sadəliyi, vətənpərvərliyi - bir sözlə, insana xas olan gözəl xüsusiyyətləri bu böyük şəxsiyyətlə təmasda olanların xatirəsinə əbədi həkk olunmuşdur.

Konfransda doktorantların və gənc tədqiqatçıların XV respublika elmi konfransının ən yaxşı elmi məruzə müəlliflərinə və Ş.Mehdiyevin 100 illik yubileyi münasibətilə alimin elmi irsinin öyrənilməsi ilə bağlı tələbələr arasında keçirilmiş müsabiqənin qaliblərinə fəxri fərmanlar və pul mükafatı təqdim edilmişdir. Həmçinin tədbirdə tələbələr tərəfindən böyük alimin şeirləri səsləndirilmişdir.

Azərbaycan Respublikasının Prezidenti yanında Ali Attestasiya Komissiyasının sədri akademik Arif Mehdiyev atasının xatirəsinə göstərilən hörmət və ehtirama görə Prezident İlham Əliyevə, tədbirin təşkilatçılarına və iştirakçılarına ailələri adından minnətdarlığını bildirmişdir.

Sonra konfrans işini bölmə iclaslarında davam etdirmişdir. Konfrans dekabrın 22-də başa çatacaqdır.

Azərbaycan.- 2010.-22 dekabr.- S. 6.