Məhəmməd məscidində aparılmış muzey-konservasiya işlərinin yekunlarına həsr olunmuş seminar keçiriləcəkdir

Dekabrın 24-də "İçərişəhər" Dövlət Tarix-Memarlıq Qoruğu İdarəsinin təşkilatçılığı ilə dünya əhəmiyyətli memarlıq abidəsi olan Məhəmməd məscidində aparılmış muzey-konservasiya işlərinin başa çatmasına həsr olunmuş elmi-praktiki seminar keçiriləcəkdir.

Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsindən AzərTAc-a bildirmişlər ki, seminarda mütəxəssislər görülmüş muzey-konservasiya işləri barədə ətraflı məlumat verəcək, bu təcrübənin öyrənilməsi və gələcəkdə İçərişəhərdə tətbiq edilməsinə dair müzakirələr aparılacaqdır.

Məsciddə muzey-konservasiya işlərinə Almaniyanın "Remmers" və Avstriyanın "Atelier Erich Pummer" şirkətləri tərəfindən bu ilin mart ayından etibarən başlanılmışdır. Bir neçə mərhələni özündə ehtiva edən mürəkkəb texnoloji prosesin gedişində təqribən 500 millimetrlik səth örtüyü xüsusi avadanlıq və materiallarla bərpa edildikdən sonra konservasiya olunmuşdur. Bərpa zamanı vakuum yolu ilə bərkidilmə üsulundan istifadə edilmişdir. Bunun nəticəsində havasızlıq şəraitində daşlar bərkidilmiş, beləliklə, abidənin tarixiliyinə və mövcud quruluşuna zərər yetirilməmişdir.

Bu cür muzey-konservasiya işləri Azərbaycanda ilk dəfə olaraq həyata keçirilir və dünya standartlarına cavab verir.

Azərbaycan.- 2010.- 22 dekabr.- S. 6.