İstanbulda İƏT ölkələri xarici işlər nazirlərinin toplantısı keçirilmişdir

İstanbuldakı "Çırağan" sarayında İqtisadi Əməkdaşlıq Təşkilatına (İƏT) üzv ölkələrin dövlət başçılarının XI Sammiti ərəfəsində xarici işlər nazirlərinin 19-cu toplantısı keçirilmişdir. Azərbaycanın xarici işlər naziri Elmar Məmmədyarov toplantıda iştirak etmişdir.

Toplantıda İƏT Nazirlər Şurasında sədrlik İrandan Türkiyəyə keçmişdir.

Türkiyənin xarici işlər naziri Əhməd Davudoğlu çıxışında bildirmişdir ki, xarici siyasət idarələrinin başçıları regional və qlobal məsələlələri müzakirə edəcəklər. İƏT ölkələrinin 400 milyon əhalisi var və 8 milyon kvadratkilometr ərazini əhatə edir. Bu məkanda sabitlik və tərəqqinin təmin olunması əsas məqsədlərdən biridir. İqtisadi əlaqələrin möhkəmlənməsi üçün yeni layihələrin həyata keçirilməsinə də ehtiyac vardır. Dövlət başçılarının zirvə görüşündə İƏT Ticarət Sazişinin imzalanması gözlənilir.

İranın xarici işlər naziri Əli Əkbər Salihi, Əfqanıstanın xarici işlər naziri Zalmay Rəsul, Pakistanın xarici işlər naziri Şah Mahmud Qureyşi, Qazaxıstan xarici işlər nazirinin müavini Kayrat Sarıbay da toplantıda iştirak etmişlər.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2010.-23 dekabr.- S. 2.