Yubiley qeyd olundu

Azərbaycan teatr sənəti tarixində özünəməxsus yeri olan Səməd Vurğun adına Azərbaycan Dövlət Rus Dram Teatrının 90 illik yubileyi təntənə ilə qeyd olundu. Teatrın baş rejissoru Aleksandr Şarovski qonaqları səmimi salamlayaraq mədəniyyət ocağına ünvanlanan diqqət və qayğıya görə dövlət başçısına minnətdarlığını bildirdi.

Mədəniyyət və turizm naziri Əbülfəs Qarayev 90 yaşı tamam olan teatrın kollektivini alqışlayaraq ölkə Prezidenti İlham Əliyevin yaradıcı heyətə ünvanlanmış təbrik məktubunu oxudu. Nazir ölkə başçısının Rus Dram Teatrının bir qrup əməkdaşına fəxri adların verilməsi haqqında imzaladığı sərəncamı da tədbir iştirakçılarının nəzərinə çatdırdı.

Tədbirdə Teatr Xadimləri İttifaqının sədri Azər Paşa Nemət, Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvitkoyl çıxış etdilər. Ölkəmizin Rusiyadakı səfiri xalq artisti Polad Bülbüloğlu Rusiya Federasiyasının mədəniyyət naziri Aleksey Avdeyevin Rus Dram Teatrının kollektivinə ünvanladığı təbrik məktubunu oxudu.

Azərbaycan.- 2010.- 23 dekabr.- S. 7.