"AsiaTimes": "Azərbaycan Mərkəzi Asiyada energetik geoiqtisadi inkişafın növbəti mərhələsini nəzarəti altına alaraq, regionda mühüm bir məharət nümayiş etdirir"

Pekində ingilisdilli nüfuzlu "AsiaTimes" nəşrində "Avrasiyada yeni enerji mərkəzləri yaranır" sərlövhəsi altında Azərbaycanın enerji siyasətindən bəhs edən məqalə dərc olunmuşdur.

Məqalədə bildirilir ki, Azərbaycan regionun geosiyasi iqtisadiyyatın inkişafında liderdir. Güclü enerji ehtiyatlarına malik Azərbaycan bir çox enerji layihələri sayəsində Avropaya qaz nəqlində lider ölkəyə çevrilə bilər. İndi Azərbaycanda əsas diqqət ixrac marşrutlarına yönəldilmişdir. Bu tendensiya 2009-cu ilin sonları ilə müqayisədə hazırda ön plana çəkilmişdir.

Rəsmi Bakı Rusiya və Türkiyə ilə enerji ticarətini davam etdirərək, Bolqarıstan və Rumıniyaya təbii qaz tədarükü üzrə yeni imkanları öyrənməklə, eyni zamanda, potensial ixrac tərəfdaşlarının əhatə dairəsini şaxələndirir. Məqalədə Azərbaycanın "Nabukko" və ya "Cənub axını"nı seçəcəyinə dair yekun qərarını gələcəkdə verəcəyi və bu zaman ölkə maraqlarının nəzərə alınacağı vurğulanır. Yazıda qeyd olunur ki, Azərbaycan Mərkəzi Asiyada energetik geoiqtisadi inkişafın növbəti mərhələsini nəzarəti altına alaraq, regionda mühüm bir məharət nümayiş etdirir.

AzərTAc

Azərbaycan.- 2010.-25 dekabr.- S. 5.