Azərbaycanın Moskvadakı səfirliyində Dünya Azərbaycanlılarının Həmrəylik Günü münasibətilə qəbul təşkil edilmişdir

Dekabrın 25-də Azərbaycanın Moskvadakı səfirliyində hər il dekabrın 31-də qeyd edilən Dünya Azərbaycanlılarının Həmrəylik Gününə həsr edilmiş təntənəli qəbul olmuşdur.

Tədbirin əvvəlində Azərbaycan Respublikasının Prezidenti İlham Əliyevin Dünya Azərbaycanlılarının Həmrəylik Günü münasibətilə Azərbaycan xalqına müraciətinin mətni oxunmuşdur.

Sonra Azərbaycanın Rusiyadakı səfiri Polad Bülbüloğlu tədbir iştirakçılarını salamlayaraq görüşə toplaşanları həmvətənlərimizin birləşməsi və yaşadıqları ölkədə mövqelərinin möhkəmlənməsi sahəsində ölkəmizin dövlət siyasəti haqqında ətraflı məlumatlandırmışdır. P.Bülbüloğlu xüsusi qeyd etmişdir ki, Azərbaycanın ümummilli lideri Heydər Əliyevin təşəbbüsü ilə dekabrın 31-i Dünya Azərbaycanlılarının Həmrəylik Günü elan edilmişdir və həmvətənlərimiz bu tarixi mühüm bayramlardan biri kimi qeyd edirlər. Səfirin sözlərinə görə, həmvətənlər arasında əlaqələrin inkişafı, bütün dünyada diaspor təşkilatlarının yaradılmasına kömək, həmvətənlərimizin tarixi Vətənlə əlaqələrinin güclənməsi Azərbaycan siyasətinin əsas tərkib hissəsidir.

"Azərbaycan dövləti həmvətənlərimizin birləşməsinə və onların dünyada mövqelərinin möhkəmlənməsinə çox böyük əhəmiyyət verir və Azərbaycan diasporunun ciddi ictimai qüvvəyə çevrilməsi üçün hər yerdə genişmiqyaslı iş davam edir", - deyən səfir P.Bülbüloğlu daha sonra əlavə etmişdir: "Əsası ulu öndər Heydər Əliyev tərəfindən qoyulmuş azərbaycançılıq fəlsəfəsi bu gün fəal şəkildə həyata keçirilir və Azərbaycan Prezidenti İlham Əliyev Azərbaycan diasporunun birləşdirilməsi üzrə milli siyasəti uğurla davam etdirir". O xüsusi vurğulamışdır ki, dövlətimiz ümumi vəzifəmizin birgə səylərlə həyata keçirilməsi üçün Rusiyada Azərbaycan diasporunun möhkəmlənməsinə və təşkilatlanmasına böyük əhəmiyyət verir.

Azərbaycanın Rusiyadakı səfiri bir məqamı da xüsusi qeyd etmişdir ki, həmvətənlərimizin birləşmək və həmrəy olmaq arzusu güclənir, milli identiklik və milli mənlik şüuru möhkəmlənir. Onun fikrincə, diasporun qarşısında duran əsas vəzifələrdən biri ölkəmizin bütün istiqamətlərdə qazandığı uğurları təbliğ etmək, onun müsbət imicini təmin etmək, ölkəmizə qarşı böhtan siyasətinə müqavimət göstərmək üçün fəal, güclü mövqe tutmaqdır.

Polad Bülbüloğlu ümummilli vəzifələrə aid məsələlərə və onların həyata keçirilməsi yollarına da toxunmuşdur. Diplomat xüsusi vurğulamışdır ki, ölkəmizin beynəlxalq səviyyədə nüfuzu günbəgün artır, bu gün Azərbaycan bütün göstəricilər üzrə regional liderdir. Onun sözlərinə görə, Azərbaycanın qazandığı uğurlarda bütün həmvətənlərimizin, o cümlədən Rusiyada yaşayan soydaşlarımızın payı vardır və bu ölkədə yaşayan azərbaycanlıların xalqımız üçün bütün mühüm məsələlərdə həmrəylik və yekdillik nümayiş etdirməsi çox vacibdir.

Azərbaycan diasporunun regional təşkilatlarının nümayəndələri öz çıxışlarında ölkə rəhbərliyinin vətənin hüdudlarından kənarda yaşayan azərbaycanlılara diqqətinə görə təşəkkürlərini bildirmişlər. Xüsusi qeyd edilmişdir ki, hər bir diasporun gücü onun vəhdətindədir.

Rusiyada Azərbaycan diasporunun ən yaxşı nümayəndələri Azərbaycan-Rusiya münasibətlərinin möhkəmlənməsinə verdikləri töhfəyə görə respublikamızın Rusiyadakı səfirliyinin fəxri fərmanları ilə təltif edilmişlər.

Rusiya Dövlət Linqvistika Universitetinin Azərbaycan dilini öyrənən və həmin gecədə Azərbaycan dilində ədəbi kompozisiya ilə çıxış etmiş 7 tələbəsi də təltif edilmişdir.

Mərasim başa çatdıqdan sonra təntənəli qəbul olmuşdur.

Tədbirdə Rusiyanın 55 şəhər və regionunun Azərbaycan diasporunun rəhbərləri və fəal üzvləri iştirak etmişdir.

Asya HACIZADƏ,

AzərTAc-ın xüsusi müxbiri

Moskva

Azərbaycan.- 2010.- 28 dekabr.- S. 6.