Türkiyənin Baş naziri bir daha ATƏT-in Minsk qrupunu səylərini gücləndirməyə çağırmışdır

Türkiyə Cənubi Qafqazda Sabitlik və Əməkdaşlıq Platforması çərçivəsində fəaliyyəti davam etdirməklə yanaşı, mədəni və tarixi əlaqələri olan Azərbaycanla münasibətləri inkişaf etdirmək, habelə qarşılıqlı etimadı sarsıtmadan bölgənin "açar" ölkələrindən biri kimi gördüyümüz Azərbaycanın Ermənistan ilə problemlərini də tez bir zamanda həll etmək üçün çox ciddi səylər göstərir.

Bu fikri Türkiyənin Baş naziri Rəcəb Tayyib Ərdoğan Beynəlxalq Strateji Araşdırmalar Mərkəzinin Ankarada keçirilən toplantısındakı çıxışında bildirmişdir.

Baş nazir əlavə etmişdir ki, bu məsələdə ATƏT-in Minsk qrupunun üzərinə götürdüyü vəzifəni yerinə yetirməsi lazımdır. Rusiya, Fransa və ABŞ problemin həllində səylərini artırmalıdır.

Rəcəb Tayyib Ərdoğan bir daha Ermənistan Konstitusiya Məhkəməsinin məlum qərarının bu ölkə ilə imzalanmış protokollara zərbə vurduğunu, Türkiyənin öhdəliklərinə sadiq olduğunu və eyni sədaqəti rəsmi Yerevandan da gözlədiklərini demişdir.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2010.- 4 fevral.- S. 1.