Prezident İlham Əliyevin uğurlu siyasəti və xalqın iqtidara sarsılmaz etimadı Azərbaycanın əldə etdiyi nailiyyətlərin əsasıdır

Əli Əhmədov: "Son 17 ildə bütün seçkilərin şəriksiz qalibi olmuş YAP-ın indi başlıca hədəfi qarşıdakı parlament seçkilərində daha böyük siyasi zəfər qazanmaqdır"

2009-cu il Azərbaycanın müasir tarixinə növbəti inkişaf mərhələsi kimi daxil oldu. Ötən il demokratikləşmə istiqamətində görülən işlər, həmçinin Konstitusiya islahatları ilə əlaqədar keçirilən referendum və növbəti bələdiyyə seçkiləri siyasi sahədəki böyük uğurlardır. Beynəlxalq maliyyə və iqtisadi böhranın davam etməsinə baxmayaraq, 2009-cu ildə Azərbaycan iqtisadiyyatı da 9,3 faizlik artıma nail oldu. Nəzərdə tutulan bütün iqtisadi və sosial layihələrin icrası davam etdirildi. Bütövlükdə, ötən ilin siyasi, sosial-iqtisadi və digər sahələr üzrə xoş mənzərəsi Azərbaycan xalqının 2010-cu ilə nikbin notlar üzərində qədəm qoymağını şərtləndirdi.

Yeni Azərbaycan Partiyasının sədr müavini, icra katibi, Milli Məclisin deputatı Əli Əhmədovla müsahibəmiz də ötən ilin yekunları barədədir:

- Əli müəllim, istərdik öncə respublikamızın ötənilki siyasi-ictimai və iqtisadi yekunları ilə bağlı qənaətlərinizi bölüşəsiniz.

- 2009-cu il də, əvvəlki illər kimi, Azərbaycanın inkişaf tarixinə şərəfli dövr kimi daxil oldu. Bununla belə, ötən il bütün dünyada təlatümlü maliyyə və iqtisadi böhranın hələ də davam etməsi dövrü kimi yadda qaldı. Güclü iqtisadiyyata malik ölkələr belə sarsıntılı böhranın ağır nəticələrini yaşamalı oldular. Təbii ki, Azərbaycan dünyadan ayrı deyil. Respublikamız dünya maliyyə və iqtisadi sisteminə inteqrasiya olunub və bu proses indi də davam etməkdə, dərinləşməkdədir. Azərbaycanı dünyadan təcrid olunmuş kimi təsəvvür etmək mümkün deyil. Dünyada baş verən proseslər bu və ya digər dərəcədə bizə də təsir göstərir. Bu mənada 2009-cu il bütün dünyada, o cümlədən ölkəmizdə bir sıra həqiqətləri ortaya çıxaran sınaq dövrü oldu. Lakin xüsusi vurğulamağa ehtiyac duyulan məqamlardan biri budur ki, dünyanın ən güclü iqtisadiyyatlarını lərzəyə gətirən qlobal böhran Azərbaycan iqtisadiyyatına və maliyyə sisteminə, digər ölkələrlə müqayisədə, çox cüzi təsir göstərə bildi. Güclü iqisadiyyatları olan ölkələr bu sınaqdan o qədər də uğurla çıxa bilmədikləri halda, gənc iqtisadiyyatı olan Azərbaycan ili bütün sahələrdə böyük nailiyyətlərlə başa vurmağa nail ola bildi. Ötən il böhranlı beynəlxalq şərait zəminində Azərbaycan iqtisadiyyatı 9-10 faizlik inkişaf nümunəsi göstərə bildi.

Azərbaycanın bütün dünyanı cənginə alan maliyyə və iqtisadi böhrandan ən az zərər çəkən ölkə olması beynəlxalq ictimaiyyət tərəfindən etiraf olunmaqdadır. Ona görə 2009-cu ilin yekunlarından danışarkən birinci növbədə Azərbaycanın iqtisadiyyatının və maliyyə sisteminin etibarlı və dayanıqlı bünövrə üzərində dayanmasının bir daha sübut olunduğunu xüsusi qeyd etmək lazımdır. Bu, həm də Azərbaycan hakimiyyətinin həyata keçirdiyi siyasi xəttin və respublikamızın seçdiyi yolun düzgünlüyünü təsdiq edən reallıq baxımından mühüm məqamdır.

İqtisadi uğurlar və beynəlxalq böhrandan ən az zərərlə çıxmaqla yanaşı, ötən il bütün sahələr üzrə islahatlar ardıcıl davam etdirildi. Heç bir sosial-iqtisadi layihə yarımçıq qalmadı. Həmçinin ictimai həyatın yenilənməsi, bölgələrdə aparılan abadlıq və quruculuq işləri də uğurla davam etdirildi. Bunlar 2009-cu ildə həm ictimai-siyasi sabitliyi, həm də xoş əhvali-ruhiyyənin əsasını təşkil edən məqamlardır.

2009-cu il həm də respublikamızın demokratik inkişaf istiqamətində əhəmiyyətli addımların atılması ilə səciyyələnir. Bunu referendum və bələdiyyə seçkilərinin timsalında şərh etmək olar. Azərbaycan müasir tarixində bir ilin içərisində iki mühüm siyasi aksiyanı uğurla həyata keçirdi. Bu, ötən ilin siyasi aurasını həm müəyyənləşdirən, həm də təsvir edən çox maraqlı məqamdır.

2009-cu ilin yekunlarından danışarkən ən başlıca məsələlərdən biri olan Ermənistan-Azərbaycan, Dağlıq Qarabağ münaqişəsinin nizama salınması ilə bağlı mənzərənin də göz önünə gətirilməsi mütləq tələb olunur. 2009-cu il danışıqlar və nizamlama prosesinin intensivləşməsi ilə yadda qaldı. Azərbaycan və Ermənistan prezidentləri arasında bir neçə görüşün keçirilməsi, xarici işlər nazirləri səviyyəsində və müxtəlif formatlarda intensiv məsləhətləşmələrin aparılması danışıqlar prosesinin əhəmiyyətli dərəcədə sürətlənməsindən xəbər verir. Münaqişənin nizama salınmasını 2009-cu ildə təmin etmək mümkün olmasa da, bu intensivlik Azərbaycanın mövqelərinin beynəlxalq aləmə və danışıqlar prosesində vasitəçilik rolunu yerinə yetirən tərəflərə daha yaxşı çatdırılması baxımından əhəmiyyətli rol oynayıb.

Təbii ki, danışıqlar prosesində bizim üçün qaneedici məqam problemin ədalətli şəkildə həllinə nail olmaqdır. Bununla yanaşı, danışıqlar prosesində bir sıra yeni məqamları, xüsusilə də Rusiya tərəfinin vasitəçilik təşəbbüslərinin artmasını xüsusi qeyd etmək lazımdır. Eyni zamanda, 2009-cu ildə danışıqların gedişinin intensivləşməsi fonunda Azərbaycan həqiqətlərinin dərk olunması və bu həqiqətlərin danışıqlarda nəzərə alınması nizamasalınma prosesinin qeyd olunmalı tərəflərindəndir. 2009-cu ilin ictimai-siyasi prosesləri fonunda Dağlıq Qarabağ probleminin həlli istiqamətində fəallığın artması 2010-cu ilin nizamasalma prosesinin ədalətli şəkildə yoluna qoyulmasında əhəmiyyətli mərhələ olacağına ümidi artırır.

Ötən il bir daha təsdiq olundu ki, Prezident İlham Əliyevin uğurlu siyasəti və xalqın iqtidara sarsılmaz etimadı Azərbaycanın əldə etdiyi nailiyyətlərin əsasıdır.

- Ötən il Konstitusiya islahatları ilə bağlı keçirilən referendumun təbliğat-təşviqat kampaniyasında YAP xüsusi fəallığı ilə seçildi. Sizcə, Əsas Qanuna edilən əlavə və dəyişikliklər ictimai-siyasi həyatımızda hansı proseslərə rəvac verəcək?

- 2009-cu ilin mart ayında keçirilən ümumxalq səsverməsinin nəticələri təkmilləşən və inkişaf edən Azərbaycanın siyasi sisteminə cəmiyyətimizin yeni baxışını ortaya qoydu. Dünya sürətlə dəyişməkdədir. 2008-2009-cu illərin maliyyə-iqtisadi böhranı bu vaxta qədər hərtərəfli olaraq təqdir edilən dünya iqtisadi sisteminin və o cümlədən bazar iqtisadiyyatı sisteminin ciddi şəkildə təkmilləşməyə ehtiyacı olduğunu ortaya qoydu. Eyni zamanda, 2000-ci ilin əvvəllərindən başlayaraq bir sıra ölkələrdə geniş vüsət almış ayrı-ayrı "rəngli inqilablar" və "demokratiya" dalğası da nəticə etibarilə qarşısına qoyduğu məqsədə nail olmadığından yenə də demokratiya və ayrı-ayrı milli siyasi sistemlərin üstünlükləri məsələsi aydın şəkildə gündəmə gəlib. Hazırda dünyanın bu məsələlərə baxışlarında ciddi dəyişikliklər ortaya qoyulub. "Rəngli inqilablar"ın baş verdiyi ölkələrdə əhali onun nəticələrindən məyus olduğunu gizlətmir. Bəzi yerlərdə artıq bu nəticələrin tamamilə aradan qaldırılması istiqamətində, sözün həqiqi mənasında, xalq hərəkatları başlayıb. Beləliklə, həm iqtisadi sistemə, həm siyasi sistemə baxışların əhəmiyyətli dərəcədə dəyişdiyi bir zamanda hər bir millətin özü üçün müəyyənləşdirdiyi iqtisadi və siyasi sisteminin özünümühafizə elementlərinin güclənməsi ön plana çıxmaqdadır. Dünyada baş verən proseslər nə qədər təsir etsə də, hər bir ölkə özünün yaratdığı və xalqının milli maraqlarına maksimum uyğun gələn iqtisadi və siyasi sistemi qorumağa məhkumdur. Əks halda, milli inkişafın, ümumi dövlət maraqlarının qorunmasının təmin edilməsi həddən artıq çətin olar.

Bu mənada Azərbaycanın müəyyənləşmiş iqtisadi modeli fonunda, eyni zamanda siyasi modelinin də aydın parametrlərinin müəyyənləşdirilməsi və onun həyata tətbiq edilməsi ehtiyacı qabarıq şəkildə özünü büruzə verirdi. Referendumun müəyyənləşdirdiyi məsələlərlə əlaqədar ictimai ehtiyacın meydana çıxması da ilk növbədə bununla əlaqədardır.

Bəzi hallarda bizi tənqid edərək buna digər mənalar verməyə çalışanlar daha əhəmiyyətli məqamları ya unudurlar, ya da görməməyə çalışırlar. Bizim düşüncəmiz üçün maraqlı olan bundan ibarətdir ki, ictimai sistemlə iqtisadi sistemin əsas məqsədi milli maraqların təmin olunmasına yönəlməlidir. Milli maraqların təmin olunmasına yönələn, insan haqlarının daha etibarlı şəkildə qorunması məqsədini güdən formaların tətbiq edilməsi təqdir olunmalıdır. Ötən il referenduma çıxarılan məsələlər bir yandan Azərbaycanın Konstitusiya sisteminin və konstitusion quruluşunun təkmilləşdirilməsi kimi təbii bir prosesi nəzərdə tuturdusa, digər tərəfdən, yuxarıda qeyd etdiyim məqamları özündə ehtiva edən Azərbaycanın siyasi sisteminin daha etibarlı dayaqlar üzərində qərar tutması kimi məqsədləri qarşısına qoymuşdu. Azərbaycan vətəndaşları bunu aydın şəkildə dərk etdilər, sözün həqiqi mənasında, ölkəmizin inkişafına xidmət edən belə bir referendumun keçirilməsini birmənalı şəkildə dəstəklədilər. Vətəndaşlarımız ümumxalq səsverməsində verdikləri səslərlə, cəmiyyətin daxilindən gələn ehtiyaclara uyğun şəkildə təqdim edilən dəyişiklikləri dəstəkləməklə Azərbaycanın siyasi sisteminin daha etibarlı bünövrə üzərinə qoyulmasına müsbət münasibətlərini ifadə etdilər. Biz bunu yüksək qiymətləndiririk.

Referendumdan 11 ayın ötməsinə baxmayaraq, artıq bu qısa zaman kəsiyi ümumxalq səsverməsinə çıxarılan ideyaların düzgünlüyünü birmənalı şəkildə təsdiq edib. Mən bunun həm Azərbaycan iqtisadiyyatının beynəlxalq böhranın ağır sınaqlarından uğurla keçməsində, həm də siyasi sabitliyimizin çoxdayanıqlı bünövrə üzərində qərar tutmasında ifadə olunduğunu qeyd etmək istəyirəm. Referendumun baş tutması ilə Azərbaycan özünün siyasi təkmilləşməsi prosesində yeni bir mərhələni arxada qoymuş oldu. Həm də Azərbaycanın siyasi həyatının çox əhəmiyyətli məqamlarından birini təşkil etməklə 2009-cu ilin siyasi salnaməsinə daxil oldu.

Yeni Azərbaycan Partiyası bu prosesdə yaxından iştirak etdi. Əslində, cəmiyyətimiz referendum ideyasının YAP tərəfindən irəli sürüldüyünün fərqindədir. Ona görə referendumun nəticələri bu ideyanı irəli sürmüş YAP-a ictimai münasibəti ortaya qoyan reallıq kimi də qiymətləndirilə bilər. YAP-ın referendumda iştirakı və ümumxalq səsverməsinin nəticəsi fonunda partiyamızın fəaliyyətinin dəyərləndirilməsi kifayət qədər ürəkaçandır.

Qeyd etmək istərdim ki, YAP-ın böyük potensialı referendumun uğurla keçirilməsində və nəticələrin əldə olunmasında ən vacib amillərdən biri kimi qiymətləndirilə bilər. Malik olduğumuz bütün resurslar bu siyasi kampaniyanın uğurla həyata keçirilməsinə cəlb edildi. Səsverməyə çıxarılan məsələlərin vətəndaşlarımız tərəfindən başa düşülməsi üçün böyük təşviqat kampaniyası aparıldı. Bu, referendumda uğurlu nəticələrin əldə olunmasında az rol oynamadı.

- YAP bələdiyyə seçkilərində də qarşıya qoyduğu hədəflərə çatdı. 2004-cü ilin göstəriciləri ilə müqayisədə partiyanın budəfəki nəticələrindən razı qalmaq olarmı?

- Hər hansı partiya üçün bir ilin içərisində iki böyük siyasi kampaniyanı təşkil etmək və uğurla başa çatdırmaq o qədər də asan deyil. Bu kontekstdən məmnunluq hissi ilə qeyd etmək istəyirəm ki, YAP 2009-cu ildə həm referendum, həm də bələdiyyə seçkiləri kimi böyük enerji, vaxt tələb edən siyasi kampaniyaların öhdəsindən uğurla gələ bildi.

Hər bir seçki kampaniyasınin rəsmi hissəsi iki ay yarım davam edir. Amma YAP, öz ənənəsinə uyğun olaraq, seçki kampaniyasına Mərkəzi Seçki Komissiyası tərəfindən rəsmi start verilməzdən əvvəl başlayır. Beləliklə, bu kampaniya iki ay yarımdan da artıq dövrü əhatə edir. Azərbaycanın Konstitusiyasına bir sıra dəyişikliklər edilməsi ilə əlaqədar fikirlərimi səsləndirdik. Eynilə ötən ilin dekabrında baş tutan bələdiyyə seçkiləri də böyük seçki kampaniyasının keçirilməsini tələb edirdi. Artıq seçki arxada qalıb. Nəticələr bəlli olduğundan məmnunluq hissi ilə vurğulamaq olar ki, bələdiyyə seçkiləri kampaniyası istədiyimiz şəkildə həyata keçirildi. Faktlara nəzər salsaq, sözlərimin həqiqət olduğunu görmək olar. Hazırda seçki nəticəsində formalaşan bələdiyyələrdə üzvlərin təxminən 67 faizi YAP təmsilçiləridir. Bu nəticənin əldə olunması, təbii ki, asan deyil. YAP bələdiyyə seçkilərində partiya kimi iştirak edən yeganə siyasi təşkilat idi. Qanunvericiliyə görə, bu və ya digər seçki kampaniyasında və konkret olaraq bələdiyyə seçkiləri kampaniyasında partiya kimi iştirak etməkdən ötrü respublika üzrə mövcud olan dairələrin yarısından çoxunda namizədlərin irəli sürülməsi şərtdir. 2009-cu ilin bələdiyyə seçkilərində bütün dairələr üzrə bələdiyyələrə 16 minə yaxın namizəd irəli sürülməli idi. Demək, təxminən 10 minə yaxın bələdiyyə üzvlüyünə namizəd irəli sürmək tələb olunurdu ki, ən azı, partiya şəklində seçki kampaniyasında iştirak etmək hüququnu qazanmaq mümkün olsun. YAP-dan savayı, Azərbaycanda mövcud olan heç bir partiya bu şərti yerinə yetirə bilmədiyindən siyasi təşkilat kimi bələdiyyə kampaniyasına qoşula bilmədi. Yalnız YAP Azərbaycanın bütün dairələri, bütün bələdiyyələr üzrə 16 minə yaxın namizəd irəli sürdü. Beləliklə, birinci mərhələdə, namizədlərin irəli sürülməsi mərhələsində YAP bu seçkilərə hazırlıq və iştirak etmək baxımından özünün digər partiyalardan, sözün yaxşı mənasında, nə qədər fərqləndiyini sübuta yetirə bildi. İkinci mərhələdə isə, təbii ki, biz irəli sürdüyümüz namizədlərin təşviqat kampaniyasının uğurla aparılmasının öhdəsindən gəlməli idik. Əvvəldə qeyd etdiyim kimi, nəticələr YAP-ın seçki kampaniyasının təşviqat hissəsinin kifayət qədər səmərəli olduğunu göstərir.

Mən bir məqamı xüsusi qeyd etmək istəyirəm. YAP təkcə özünün malik olduğu resurslar baxımından digər partiyalardan fərqlənmir. Həm də özünün fəallığı, bu və ya digər ictimai məsələlərə münasibətindəki yeni məqamları ilə fərqlənir. Məsələn, 2009-cu ilin bələdiyyə seçkilərindən əvvəl apardığımız təhlillər nəticəsində məlum oldu ki, 2004-cü ildə seçilmiş bələdiyyələrdə gənclər və qadınlar bu demoqrafik qrupların cəmiyyətdə malik olduğu potensialdan əhəmiyyətli dərəcədə aşağı səviyyədə təmsil olunurlar. Qadınların bələdiyyələrdə təxminən 4 faiz, gənclərin isə 2,5-3 faiz civarında nümayəndələri vardı. Ona görə də həm qadınların, həm də gənclərin bələdiyyələrdə təmsilçilik səviyyəsinin artırılması bizim 2009-cu ildə bələdiyyə seçkiləri kampaniyasının çox əhəmiyyətli məqamlarından biri idi. İrəli sürdüyümüz namizədlərin içərisində gənclərin çəkisi təxminən 30 faiz idi. Bir o qədər də qadın namizədlər var idi. Apardığımız təşviqat kampaniyasının da çox vacib tərəflərinlən biri ondan ibarət idi ki, namizədliyini irəli sürdüyümüz gənclər və qadınlar bələdiyyələrdə təmsil olunsunlar. Hesab edirəm ki, biz buna nail olduq. Hazırda 2009-cu il seçkilərinin nəticələrində formalaşmış bələdiyyələrdə qadınlar təxminən 30 faiz təmsil olunurlar. Bələdiyyə üzvlərinin təxminən 30 faizi də gənclərdir. Qadınların yeni bələdiyyələrdə təmsilçilik dərəcəsi 7-8 dəfə, gənclərin sayı isə 10 dəfədən çox yüksəlib. Bu, bütövlükdə 2009-cu ilin bələdiyyə seçkilərinin əvvəlki seçkilərdən fərqli tərəflərindən biridir.

YAP bələdiyyə seçkilərinin nəticələrini yerli özünüidarə prinsiplərinin və yerli demokratiyanın inkişaf etdirilməsi, seçki praktikasının təkmilləşdirilməsi nöqteyinəzərindən və ümumiyyətlə, geniş planda yanaşanda da Azərbaycanda demokratiyanın inkişafı və irəliyə getməsi baxımından əhəmiyyətli hadisə hesab edir və yüksək qiymətləndirir.

- Seçkidən sonra bir neçə nəfər partiyadan xaric olundu. İstərdik bu məsələyə bir daha aydınlıq gətirəsiniz...

- YAP hər bir siyasi aksiyaya, xüsusilə də seçki kampaniyalarına təbii nəzərlərlə baxır. Bələdiyyə seçkiləri minlərlə insanın namizəd kimi iştirak etdiyi böyük siyasi kampaniyadır. Bu kampaniyada iştirak edən bütün namizədlərin, maraqlı tərəflərin hamısının birağızdan kampaniyanın gedişi barədə yalnız müsbət fikirlər səsləndirməsini bəlkə o qədər də təbii saymaq mümkün olmazdı. YAP 16 minə yaxın namizəd irəli sürmüşdü. Bundan savayı, YAP-ın bir neçə yüz üzvü fərdi qaydada namizədliyini vermişdi. Prinsip etibarilə YAP bələdiyyə seçkilərində partiya şəklində iştirak etdiyindən üzvlərin fərdi qaydada namizədliklərini verməsini məqbul hesab etmirik. Bu barədə seçki kampaniyasının başlanmasından əvvəl yerli təşkilatlarımız vasitəsilə YAP üzvləri arasında izahat işləri aparmışdıq. Məsləhət görmüşdük ki, YAP rəsmi şəkildə namizədlərinin siyahısını təsdiq edənə qədər seçki kampaniyasında iştirak etmək iddiasında olan üzvlərimiz bu barədə fikirlərini bildirsinlər və məsələ yerli təşkilatlarda müzakirə olunsun, layiqli hesab olunan namizədlər irəli sürülsünlər. Partiya namizədlərinin siyahısını təsdiq etdikdən sonra isə seçki kampaniyasının uğurla aparılmasını təmin etmək məqsədilə digər üzvlər fərdi qaydada namizədliklərini irəli sürməsinlər. Çünki YAP üzvləri fərdi qaydada seçkilərə qatılmaqla faktiki olaraq partiya tərəfindən irəli sürülən namizədlərin rəqiblərinə çevrilirlər.

Bu mənada bəzi üzvlərimizin fərdi qaydada namizədliklərini irəli sürmələri YAP-ın nizamnaməsinə zidd olmaqla yanaşı, partiyanın seçkidə iştirak etməsi məntiqinə ziddir. Çünki hər bir partiya və yaxud namizəd seçki prosesinə qoşularkən rəqibləri ilə mübarizə aparır. YAP partiya şəklində seçkidə iştirak etdiyindən bizim irəli sürdüyümüz namizədlər vahid halda digər namizədlərlə rəqibə çevrilirlər. İndi siz təsəvvür edin, bizim rəqiblərimiz sırasında eyni zamanda YAP üzvləri olublar. Hesab edirəm ki, bu, tamamilə anormal bir şeydir. Digər tərəfdən, seçki məntiqindən tamamilə aydındır ki, partiyanın hər bir üzvü təmsil etdiyi siyasi təşkilatın seçkidə qalib gəlməsi üçün çalışmalıdır. Belə olan halda fərdi şəkildə namizədliyini irəli sürənlər nəinki partiya tərəfindən irəli sürülən namizədlərin qalib gəlməsi üçün hər hansı səy göstərmirlər, əksinə, onlara rəqib olurlar.

Beləliklə də partiyanın malik olduğu resursları, xüsusilə seçicilərin səslərini parçalayır, təşkilatın qələbəsini çətinləşdirir, bəzi hallarda isə bunu qeyri-mümkün edir, həmin bələdiyyələr üzrə irəli sürdüyü namizədlərin qalib gəlməsində əngələ çevrilirlər.

Partiyaya üzvlük könüllüdür. Heç kimi partiyada zorla saxlamırlar. Partiyaya üzv olan hər bir insan da özünün siyasi baxışları ilə partiyanın siyasi maraqlarını əlaqələndirməlidir. Bu, partiyanın ümumi prinsiplərindən irəli gələn tələbdir. Əgər kimsə özünün maraqlarını daxil olduğu partiyanın maraqlarından üstün tutursa, seçki kampaniyası zamanı partiyanın seçki maraqlarına qarşı çıxaraq fərdi qaydada öz namizədliyini irəli sürür və beləliklə də partiyanın rəsmi namizədlərinin şanslarını azaldırlarsa, demək, onlar öz hərəkətləri ilə özlərini partiyadan kənarda qoymuş olurlar. Bunu başqa cür qiymətləndirmək, başqa rəng vermək qeyri-mümkündür.

Buna görə də biz bələdiyyə seçkilərində fərdi qaydada namizədliyini irəli sürən üzvlərə YAP-ın münasibətini aydın şəkidə bildirmişik. YAP-ın irəli sürdüyü 16 minə yaxın namizədlə yanaşı, cəmi bir neçə yüz YAP üzvü fərdi qaydada namizədliyini irəli sürmüşdü. Onların da böyük əksəriyyəti yerlərdə keçirilən görüşlərdən, aparılan izahat və maarifləndirmə işlərindən sonra partiya maraqlarının ziddinə getdiklərini başa düşdülər və namizədliklərini geri götürdülər. Yalnız bir neçə nəfər YAP üzvü oldu ki, onlar inadkarlıq edərək namizədliklərini geri götürmədilər. Beləliklə, biz digər partiyalar tərəfindən irəli sürülən namizədlərlə mübarizə aparmaqla yanaşı, eyni zamanda fərdi qaydada namizədliyini irəli sürən YAP üzvləri ilə mübarizə aparmaq məcburiyyətində qaldıq. Namizədliyini fərdi qaydada sürmüş bir neçə YAP üzvü hətta seçkinin nəticələrinə də etiraz aksiyası keçirməyə cəhd göstərdi.

Bildiyiniz kimi, seçki günü bəzi yerlərdə pozuntular olmuşdu. Mərkəzi Seçki Komissiyası bunlara özünün obyektiv qiymətini verdi, seçkinin nəticələri ləğv edildi. Bəzi yerlərdə isə narazılıqlar real həqiqətlər üzərində dayanmamışdı və bu, namizədliyini irəli sürmüş insanlara izah edildi. Xüsusi vurğulamaq istəyirəm ki, bu, bir və ya iki YAP üzvünün etdiyi hərəkətlər idi. YAP-ın 500 min üzvünün içərisindən bir və ya iki nəfərin bu cür hərəkət etməsi partiyamızın nə daxili birliyinə, nə də partiya üzvlərinin monolitliyinə kölgə salmaq iqtidarındadır.

- Bu yaxınlarda YAP-ın sıralarına 500 mininci üzv qəbul edildi. 500 min üzvü bir sırada birləşdirmək YAP üçün nə deməkdir?

- YAP Azərbaycanın siyasi həyatına bir çox yeniliklər bəxş edə bilib. Azərbaycanın müasir tarixində ölkənin paytaxtında deyil, Naxçıvanda yaranan yeganə siyasi təşkilat olan YAP təsis olunmasından cəmi bir neçə ay sonra hakimiyyətə gəlib. Sonrakı mərhələlərdə də Azərbaycanın siyasi həyatına çoxlu yenilik gətirən YAP Azərbaycan tarixində heç bir siyasi təşkilatın nail ola bilmədiyi yüksəklikləri əldə edə bilib. Azərbaycan tarixində indiyə qədər 500 min üzvü olan siyasi təşkilat olmayıb. Azərbaycanda təkpartiyalılıq dövründə belə hakimiyyətdə olan partiya bu qədər insanı öz sıralarında birləşdirə bilməyib. YAP yeganə partiyadır ki, onun sıralarında 500 min üzv birləşib. Bu, xüsusi qeyd olunmağa layiq bir reallıqdır.

500 min rəqəminə sadəcə statistika nöqteyi-nəzərindən baxmaq düzgün olmazdı. Buna daha çox insanların YAP-a, partiyamızın yaradıcısı ulu öndər Heydər Əliyevin zəngin siyasi irsinə, YAP-ın sədri, ölkə Prezidenti İlham Əliyevin həyata keçirdiyi siyasətə münasibəti, Azərbaycandakı ictimai-siyasi duruma verdikləri qiymət nöqteyi-nəzərindən yanaşılması düzgün olardı.

500 min üzv nə deməkdir? 500 min insanın bir partiyada birləşməsi onların bu partiyanın prinsiplərini qəbul etməsi deməkdir. Azərbaycanda hər on seçicidən birinin YAP üzvü olması deməkdir. YAP üzvlərinin həm də fəal surətdə ölkəmizdə həyata keçirilən ictimai-siyasi proseslərdə iştirak etdiklərini nəzərə alsaq, bu, partiya sədrinin, ölkə Prezidentinin həyata keçirdiyi siyasətin dəstəklənməsi və həmin siyasətin həyata keçirilməsində fəal iştirak etmək istəklərinin ortaya qoyulması deməkdir. Ona görə də YAP sıralarında 500 min nəfərin birləşməsi Azərbaycanın siyasi tarixinin ən əlamətdar hadisələrindən biridir. Biz bu rəqəmə hər şeydən əvvəl bu kontekstdən baxırıq.

Amma YAP-ın gücü təkcə partiya üzvlərinin sayının çoxluğunda deyil. Bu, daha çox YAP-ın daxili birliyində, qəbul etdiyi prinsiplərin və siyasətin insanlar tərəfindən dəstəklənməsindədir. Ən əsası, bu, YAP-ın Heydər Əliyevin siyasəti ilə silahlanmasında, YAP rəhbərliyində Azərbaycan Prezidenti İlham Əliyevin dayanmasında özünün təsdiqini tapır. Beləliklə, YAP Azərbaycanın ictimai-siyasi həyatının ən çox sadə insanların təmsil olunan partiyası ilə yanaşı, həm də ən möhtəşəm, ən güclü, ən perspektivli bir partiyası imicini əldə edən siyasi təşkilatdır. İnsanlar YAP-ı dəstəkləyirlər. Bu, bizim üçün çox böyük etimaddır. Eyni zamanda, belə bir dəstəyin nümayiş etdirilməsi YAP-ı özünü daha məsuliyyətli hiss etməyə vadar edir. İnsanların dəstəyi, partiyaya etimad göstərməsi, öz siyasi talelərini bu partiya ilə bağlaması YAP-ı məsuliyyətli olmağa çağırır! 500 min nəfər insanın taleyini bu partiya ilə bağlaması böyük bir məsuliyyət yüküdür! Məmnunluq hissi ilə qeyd etmək istəyirəm ki, YAP həmişə bu məsuliyyəti dərk edərək ona göstərilən etimadı doğrultmağa çalışır və həmişə buna nail olur. Bu, bizi sevindirir, eyni zamanda, gələcəklə bağlı planlarımızın miqyasını artırır və gücümüzü daha da çoxaldır.

- YAP Milli Məclisdə ən çox deputatla təmsil olunan partiyadır. Bu il həm də üçüncü çağırış Milli Məclisin səlahiyyət müddəti başa çatır. YAP üzvü olan deputatların bu çağırışda parlamentdəki fəaliyyətini necə qiymətləndirmək olar?

- YAP-ın parlamentdəki deputat korpusunun fəaliyyətini çox yüksək qiymətləndirmək üçün kifayət qədər əsas var. Bu kontekstdə bütövlükdə üçüncü çağırış Azərbaycan parlamentinin səmərəli fəaliyyət göstərdiyini qeyd etmək istərdim. Bu gün Azərbaycan genişmiqyaslı iqtisadi-sosial islahatlar həyata keçirir. Təbii ki, bu islahatların reallaşması bir tərəfdən Azərbaycan Prezidentinin müəyyənləşdirdiyi siyasətlə əlaqədardır. Bu siyasətdə Azərbaycanın islahatlar konsepsiyası özünün əksini tapıb. Digər tərəfdən, həyata keçirilən hər bir islahat ictimai münasibətlərin hüquqi bazasının təkmilləşdirilməsi kimi əhəmiyyətli vəzifəni ortaya qoyur. Azərbaycan parlamenti bu islahatların təmin edilməsi kontekstində çox əhəmiyyətli fəaliyyət göstərir və onların hüquqi təminatı baxımından zəruri qanunlar, digər hüquqi-normativ aktların qəbul olunmasını təmin edə bilir. Bu müddət ərzində çoxlu sayda yeni qanun qəbul olunub. Bununla əlaqədar Azərbaycanın islahatlar strategiyası daha uğurla həyata keçirilib, qarşıya qoyulan məqsədlərə nail olunub. Bütün bunlar Azərbaycanın qanunverici orqanı olan Milli Məclisin fəaliyyətinin səmərəlilik əmsalını təmin edir.

Azərbaycan parlamentində çoxluq YAP-a mənsubdur. 64 deputat YAP-ın üzvüdür. Təbii ki, bütövlükdə Azərbaycan parlamentinin fəaliyyəti səmərəli olubsa, bu, əhəmiyyətli dərəcədə parlamentin çoxluğunu təşkil edən deputat korpusunun fəaliyyətinin səmərəliliyindən xəbər verir. Güman edirəm ki, Azərbaycan ictimaiyyəti də parlamentin səmərəli fəaliyyətinin təmin edilməsində YAP-ın deputat korpusunun kifayət qədər yüksək fəallıq nümayiş etdirdiyini görür və bizim fikirlərimizlə əsas etibarilə razılaşır.

- Bu il keçiriləcək parlament seçkiləri üçün YAP-ın seçki strategiyasının konturları məlumdurmu?

- Əvvəla onu qeyd etmək lazımdır ki, biz təzəcə bələdiyyə seçkilərini başa çatdırmışıq, təhlilini aparmışıq, uğurlarımızın əsas fundamental prinsipləri haqqında düşünmüşük. Eyni zamanda, əgər bu və ya digər çatışmazlıqlar və nöqsanlar olubsa, onlar da təhlil edilib. İndi isə qarşıda növbəti parlament seçkiləri dayanır. Seçki noyabr ayında olacaq. Faktiki olaraq növbəti parlament seçkilərinə doqquz ay qalır. Kifayət qədər böyük zaman kəsiyi qarşıda dayanır və indi konkret şəkildə aydın parametrlər içərisində parlament seçkiləri haqqında danışmaq düzgün olmazdı. Ümumi hədəflər məlumdur. YAP-ın qarşıdan gələn parlament seçkilərində qarşısında qoyduğu hədəf ondan ibarətdir ki, indi parlamentdə təmsil olunduğumuz saydan daha artıq sayda partiya üzvü 2010-cu ildə keçiriləcək parlament seçkilərinin nəticəsində Azərbaycanın qanunverici orqanında təmsil olunmaq imkanı əldə etsin. Yəni, son 17 ildə bütün seçkilərin şəriksiz qalibi olmuş YAP-ın indi başlıca hədəfi qarşıdakı parlament seçkilərində daha böyük siyasi zəfər qazanmaqdır. Buna nail olmaqdan ötrü nə tələb olunursa, hansı yeniliklər ortaya çıxarmaq lazımdırsa, hansı konseptual məqamlar tələb olunacaqsa, təbii ki, YAP olaraq biz bütün bunların hamısını tətbiq etməyə səy göstərəcəyik.

Bizim seçki düşüncəmizin mərkəzində duran reallıq bundan ibarətdir ki, hər bir seçkinin taleyini vətəndaş həll edir. Ona görə də qarşıdan gələn parlament seçkilərində uğur qazanmağımızdan ötrü ən başlıca amil ondan ibarətdir ki, Azərbaycan vətəndaşları bizim irəli sürəcəyimiz namizədlərə səs vermək istəsinlər. Ölkəmizdə həyata keçirilən siyasət və onun uğurları, güman edirəm ki, bundan ötrü etibarlı təməl yaradıb. Eyni zamanda, bizim irəli sürəcəyimiz namizədlərin insanlar tərəfindən rəğbət obyekti olması əhəmiyyətli fakt kimi tərəfimizdən dərk edilir. Aparacağımız seçki kampaniyası, tətbiq edəcəyimiz seçki texnologiyaları da bütövlükdə qarşımıza qoyduğumuz məqsədlərə nail olmağımız üçün çox əhəmiyyətli rol oynayacaq. Ümumi kontekstdə yanaşıldıqda mən qarşımıza qoyduğumuz hədəflər barədə dedim. Konkretliklər barədə isə danışmaq indi hələ tezdir. İnanıram ki, YAP-ın malik olduğu böyük potensial növbəti seçki sınağından uğurla çıxmağımızı təmin edə biləcək.

Müsahibəni hazırladı: Rəşad CƏFƏRLİ

Azərbaycan.- 2010.-16 fevral.- S. 3.