Xocalı soyqırımını törədən cinayətkarların və onların havadarlarının məsuliyyətə cəlb olunması Polis Akademiyasının hər bir əməkdaşının və müdaviminin tələbidir

Xocalı soyqırımının 18-ci ildönümü ilə əlaqədar Daxili İşlər Nazirliyinin Polis Akademiyasında silsilə anım tədbirləri keçirilmişdir. Akademiyanın zabit-müdavim heyəti "Xocalının harayı" abidəsini ziyarət etmiş, soyqırımı qurbanlarının abidəsi önünə tər çiçəklər düzmüşlər.

Polis Akademiyasının klubunda, ümumi kitabxanasında və kursların yataqxanalarında Xocalı faciəsini əks etdirən foto-stendlər qurulmuş, müdavimlərə qanlı qırğının səbəbləri və onu törədən cinayətkarlar barədə mühazirələr oxunmuş, Xocalı soyqırımı qurbanlarının xatirəsi bir dəqiqəlik sükutla yad edilmişdir.

Tədbirlərdə vurğulanmışdır ki, respublikamızın azadlığı və müstəqilliyi uğrunda şəhid olan Azərbaycan oğul və qızlarının şücaət və qəhrəmanlıqları Polis Akademiyasının şəxsi heyəti üçün Vətənə sevgi və ehtiramın bariz nümunəsi olaraq yaddaşlarda əbədi yaşayacaqdır. Bu faciələri törədən erməni cinayətkarlarının və onların havadarlarının məsuliyyətə cəlb olunması, torpaqlarımızın düşmən tapdağından azad edilməsi Polis Akademiyasınının hər bir əməkdaşının və müdaviminin tələb və istəyidir. Çıxış edənlər əmin olduqlarını bildirmişlər ki, tezliklə işğal altında olan torpaqlarımız azad ediləcək, şəhidlərimizin, o cümlədən 20 Yanvar və Xocalı qurbanlarının günahsız tökülən qanı yerdə qalmayacaq, bu qırğınların təşkilatçıları və icraçıları mütləq xalqımız və bəşəriyyət qarşısında cavab verəcəklər.

AzərTAc

Azərbaycan.- 2010.- 17 fevral.- S. 1.