Qanunvericilik ekoloji problemlərin həllinə imkan verir

Ekologi problemlərin həlli, bu sahədə görülməsi vacib olan məsələlərin vaxtında aradan qaldırılması insanların sağlamlığının təminatı, sağlıq durumlarının qorunması üçün zəruri olan əsas şərtlərdən biridir.

Son bir neçə ildə dünyada ən yüksək inkişaf dinamikasını təmin etmiş Azərbaycanda iqtisadi, sosial sahələrdə əldə edilən uğurlar ölkəmizdə ekoloji problemlərin də aradan qaldırılmasını təmin edir. Dinamik inkişafa malik respublikamızda vətəndaşların, həmçinin gələcək nəslin sağlamlığının qorunması dövlətimiz qarşısındakı ali məqsəd və vəzifələrdəndir.

Ölkəmizdə ekoloji məsələlərin həllini diqqət mərkəzində saxlayan dövlət başçısı İlham Əliyev bu sahədə görülən işlərə daim nəzarət edir, aidiyyəti orqanlara qarşıda duran vəzifələrin öhdəsindən layiqincə gəlmələri üçün tapşırıqlar verir. Fevralın 18-də Prezident İlham Əliyevin yanında ekoloji problemlərə həsr olunmuş müşavirədə dövlət başçısı qarşıdan gələn illərdə həlli vacib olan məsələlərə toxunmuş, müvafiq qurumlara tapşırıq və tövsiyələrini vermişdir. Ekoloji vəziyyətin yaxşılaşdırılması istiqamətində işlərin bundan sonra da həyata keçirilməsi vacibliyinə toxunan dövlət başçısı görüləcək tədbirlərin Azərbaycan vətəndaşlarının sağlamlığını daha da möhkəmləndirəcəyini qeyd etmişdir. Prezident İlham Əliyev ekologiya sahəsindəki problemlərin həlli istiqamətində həyata keçirilən tədbirlərdən söz açaraq prosesin gələcəkdə də davam etdirilməsi zəruriliyinə toxunmuşdur: "Bu il Azərbaycanda "Ekologiya ili" elan edilib. Biz bütün il ərzində və ondan sonrakı illərdə ekoloji məsələlərin həllinə böyük diqqət göstərməliyik. Artıq uzun illərdir ki, Azərbaycanda bu istiqamətdə işlər görülür. Bir müddət bundan əvvəl geniş ekoloji proqram qəbul edilmişdir. Proqram çoxşaxəlidir, çox müfəssəl proqramdır. Proqramda həllini gözləyən, vacib olan bütün məsələlər öz əksini tapıb, eyni zamanda, konkret icra mexanizmləri də müəyyən edilibdir. Maliyyə resursları haqqında orada kifayət qədər istiqamətlər vardır. Bir sözlə, biz ekoloji vəziyyətin sağlamlaşdırılması istiqamətində daha ciddi addımlar atmalıyıq".

Azərbaycanda ekoloji vəziyyətin yaxşılaşdırılması məqsədilə həyata keçirilən tədbirlər yalnız yaşıllaşdırma, ağacəkmə kampaniyaları, ətraf mühitin qorunması, şəhər və qəsəbələrdə kanalizasiya sistemlərinin yenilənməsi, sanitariya tədbirlərinin görülməsi, yaşayış məskənlərinə təmiz içməli suyun nəqli, atmosferin çirkləndirilməsinin qarşısının alınması ilə bağlı deyil, həm də bu sahədə görülən işlərin hüquqi bazasının təkmilləşdirilməsi ilə davam etdirilir. Bu məqsədlə ölkəmizin qanunverici orqanı olan Milli Məclisdə ekologiya sahəsi ilə bağlı müvafiq qanunlar daha da təkmilləşdirilir, müasir tələblərə uyğunlaşdırılaraq əlavələr və düzəlişlər edilir. Milli Məclis sədrinin müavini parlamentin Təbii ehtiyatlar, energetika və ekologiya komitəsinin sədri, Valeh Ələsgərov Azərbaycanda ekoloji problemlərin həllinə, ekoloji tarazlığın bərpa ediməsinə, ətraf mühitin qorunmasına dövlət qayğısının ildən-ilə artmasının bu sahədəki məsələlərin qısa zamanda və uğurla həllinə əlverişli şərait yaratdığını bildirdi: "Azərbaycanda sosial, siyasi, iqtisadi və digər sahələr o qədər güclü inkişaf edir ki, bu gün ölkəmizdə ekoloji məsələlərə dövlət səviyyəsində xüsusi diqqət yetirilir. Bu səbəbdən də ölkəmizdə ekoloji problemlər həllini tapır.

Milli Məclisin sədr müavini, Təbii ehtiyatlar, energetika və ekologiya komitəsinin sədri bildirdi ki, ekoloji tarazlığın təmin edilməsi, ətraf mühitin qorunması istiqamətində Azərbaycan parlamenti də üzərinə düşən vəzifələrin öhdəsindən layiqincə gəlir: "Ekoloji məsələlərin həlli istiqamətində Milli Məclisin də üzərinə qanunvericilik fəaliyyəti ilə bağlı müəyyən vəzifələr düşür. Bütün ekoloji problemlərin həllini təmin etmək üçün qanunvericilikdə lazım olan şərait yaradılıb. Şübhəsiz ki, zaman keçdikcə yeni şərait, münasibətlər formalaşır və hər dövrə uyğun tələblər meydana çıxır. Bu səbəbdən də gələcəkdə lazım gəldikcə qanunvericilikdə də dövrün tələblərinə uyğun müəyyən təkmilləşdirilmələr aparılacaqdır".

Anar RASİMOĞLU

Azərbaycan.- 2010.- 21 fevral.- S. 3.