Bakıda transmilli şirkətlərdə iş və münasibətlərin tənzimlənməsinə həsr olunmuş konfrans keçirilir

Azərbaycan Həmkarlar İttifaqları Konfederasiyasından (AHİK) verilən məlumata görə, Kimya Sənayesi, Dağ-Mədən, Energetika və Müxtəlif Peşə İşçiləri Həmkarlar İttifaqlarının Beynəlxalq Federasiyasının (İCEM) təşkilatçılığı və Fridrix Ebert Fondunun dəstəyi ilə fevralın 22-də Bakıda Xəzəryanı ölkələrin neft və qaz sənayesi işçiləri həmkarlar ittifaqları üçün ikigünlük konfrans öz işinə başlamışdır.

Konfransı giriş sözü ilə açan AHİK sədrinin müavini Aqil Dadaşov qurumun sədri, Milli Məclisin deputatı Səttar Mehbalıyevin təbrikini iştirakçılara çatdırmışdır. Bildirmişdir ki, həmkarlar ittifaqlarının yaradılmasında transmilli şirkətlər də bizə kömək etməlidir. Bütün dünyada olduğu kimi, Azərbaycanda da transmilli kampaniyalar tərəfindən yerli işçilərin hüquqları pozulur. Onlar xaricdən gələn işçilərdən ən azı 3-4 dəfə az əməkhaqqı alırlar. Bu da əmək qanunları məcəlləsinə kobud müdaxilənin nəticəsidir. Həmin şirkətlər məcəllənin tələblərini yerinə yetirmir və bu təşkilatlarda həmkarlar təşkilatı olmadığından biz onların işinə nüfuz edə bilmirik. Şübhəsiz ki, bu məsələlərin həllində konfransın böyük əhəmiyyəti ola bilər.

İştirakçılar İCEM-in fəaliyyətinə münasibətlərini bildirmiş, bu beynəlxalq qurumun həyata keçirəcəyi tədbirlərin daha da təkmilləşdirilməsi sahəsində təklif və tövsiyələrini vermişlər.

Konfransın işində Azərbaycan və Rusiya yanacaq-energetika kompleksi işçiləri həmkarlar ittifaqlarının rəhbərləri, İCEM-in enerji sənayesi sektorunun prezidenti Lars Mire, Beynəlxalq Neft, Qaz Sənayesi və Neftqaz Kompleksi İşçiləri Həmkarlar İttifaqları Konfederasiyasının prezidenti Məlik Mirzəyev, Fridrix Ebert Fondunun respublikadakı nümayəndəliyinin təmsilçisi Rəşad Hüseynli və digərləri iştirak edirlər.

AzərTAc

Azərbaycan.- 2010.-23 fevral.- S. 4.