Gözəl təbiəti, zəngin tarixi və təbii imkanları olan Qəbələ tezliklə beynəlxalq turizm mərkəzinə çevriləcəkdir

Ümummilli lider Heydər Əliyevin abidəsini ziyarət

Azərbaycan Respublikasının Prezidenti İlham Əliyev fevralın 27-də Qəbələ rayonuna gəlmişdir.

Regionların sosial-iqtisadi inkişafı Dövlət Proqramı Qəbələ rayonunda da hərtərəfli inkişafa təkan vermişdir. İstər rayon mərkəzi, istərsə də kənd və qəsəbələr müasir görkəm alır. Son illərdə Qəbələ rayonunun da iqtisadiyyatı sürətlə inkişaf edir. Rayonda 2009-cu ildə ümumi məhsul buraxılışı 2003-cü illə müqayisədə 2,1 dəfə, sənaye məhsulu istehsalı 21 dəfə, kənd təsərrüfatı məhsulları isə 2 dəfə artmışdır. Həmin dövrdə əsas kapitala yönəldilən investisiyaların məbləği 32 dəfə artaraq 23 milyon manatı keçmişdir. Rayonda istehsal edilən sənaye məhsullarının 25 faizi xaricə ixrac olunur. 2003-2009-cu illərdə rayondakı 451 müəssisədə 6483-ü daimi olmaqla, 8271 yeni iş yeri yaradılmışdır. Qəbələ rayonunun zəngin turizm potensialının reallaşdırılması üçün dövlət başçısının tapşırığına əsasən kompleks tədbirlər həyata keçirilir.

Ölkəmizin hər yerində olduğu kimi, Qəbələdə də təhsilin müasirləşdirilməsi, məktəblərin maddi-texniki bazasının gücləndirilməsi istiqamətində genişmiqyaslı tədbirlər görülür. Heydər Əliyev Fondunun təhsilin inkişafına göstərdiyi diqqət və qayğı bu rayonda da hiss olunur. Fondun təşəbbüsü ilə Qəbələnin Kiçik Əmili kəndində 280 şagird yeri olan orta məktəb binası inşa edilmişdir. Müasir avadanlıq və əyani vəsaitlə təmin edilmiş binada 11 sinif otağı, idman zalı, kompüter otağı vardır. Rayonda təhsil sektorunun inkişafına göstərilən diqqətin nəticəsində Yenikənd kənd orta məktəbi üçün də təzə bina tikilmişdir. Hər cür şəraiti olan binada 20 sinif otağı, 6 kabinet, kitabxana, kompüter otağı, idman və akt zalları vardır.

Prezident İlham Əliyev əvvəlcə ulu öndər Heydər Əliyevin rayon mərkəzində ucaldılmış abidəsini ziyarət edərək gül dəstəsi qoydu.

AzərTAc

Azərbaycan.- 2010.- 28 fevral.- S. 1.