Azərbaycan Respublikası Dövlət Neft Fondunun iclası keçirilmişdir

Baş nazir Artur Rasizadə növbəti dəfə Fondun Müşahidə Şurasının sədri seçilmişdir

İyulun 9-da Azərbaycan Respublikası Dövlət Neft Fondunun (ARDNF) Müşahidə Şurasının növbəti iclası keçirilmişdir.

Fonddan AzərTAc-a bildirmişlər ki, Azərbaycanın Baş naziri, ARDNF Müşahidə Şurasının sədri Artur Rasizadənin sədrliyi ilə keçən iclasda fondun 2009-cu ildə fəaliyyəti haqqında illik hesabatı, maliyyə fəaliyyətinin auditinin nəticələri, qurumun 2009-cu il büdcəsinin icrası, 2010-cu il büdcəsində dəyişikliklərin edilməsi məsələlərinə baxılmışdır.

Müşahidə Şurası ARDNF-in icraçı direktorunun fondun 2009-cu ildə fəaliyyəti haqqında təqdim etdiyi illik hesabatına, habelə qurumun ötən il maliyyə fəaliyyəti haqqında müstəqil auditorun ("Deloyt ənd Tuş" şirkətinin) hesabatına baxaraq onları məqbul hesab etmiş və 2009-cu il büdcəsinin icrası layihəsinin təsdiq olunması üçün Azərbaycan Respublikası Prezidentinə təqdim etmək barədə qərar qəbul etmişdir.

Müşahidə Şurası fondun 2010-cu il büdcəsinə təqdim edilmiş dəyişiklikləri məqbul hesab etmiş və həmin dəyişikliklərin təsdiq olunması üçün Azərbaycan Respublikası Prezidentinə təqdim olunmasını qərara almışdır.

Baş nazir A.Rasizadə 2010-cu il üzrə Azərbaycan Respublikası Dövlət Neft Fondunun Müşahidə Şurasının sədri seçilmişdir.

Azərbaycan.- 2010.- 10 iyul.- S. 1.