Milli Azərbaycan Tarixi Muzeyinin zəngin eksponatları Mavritaniya Prezidentində böyük maraq doğurmuşdur

Ölkəmizdə rəsmi səfərdə olan Mavritaniya İslam Respublikasının Prezidenti Məhəmməd Uld Əbdüləziz və xanımı iyulun 16-da Azərbaycan Milli Elmlər Akademiyasının Milli Azərbaycan Tarixi Muzeyində olmuşlar.

Ali qonağa muzeyin tarixi barədə ətraflı məlumat verilmişdir.

Bildirilmişdir ki, Bakının ən gözəl memarlıq abidələrindən olan bu bina 1895-1897-ci illərdə tikilmiş və Azərbaycan milyonçusu, mesenat Hacı Zeynalabdin Tağıyevin mülkü olmuşdur. 1920-ci ildə binada yaradılmış muzeydə qədim dövrdən başlayaraq Azərbaycan tarixinin bütün mərhələlərinə dair 300 mindən çox eksponat toplanmışdır.

Azərbaycanın ərazisində mövcud olmuş Atropatena, Albaniya, Şirvanşahlar, Ağqoyunlular, Səfəvilər dövlətləri dövrünə aid maddi mədəniyyət nümunələri ölkəmizin qədim dövlətçilik ənənələrindən xəbər verir.

Orta əsrlərdə məişətdə işlənən əşyalar Prezident Məhəmməd Uld Əbdüləzizin xüsusi marağına səbəb olmuşdur. Məlumat verilmişdir ki, 150-dən çox işçinin çalışdığı muzey həm də Milli Elmlər Akademiyasının strukturunda elmi tədqiqat və mədəni-maarif müəssisəsi funksiyasını yerinə yetirir.

Xüsusi olaraq ali qonağın diqqətinə çatdırılmışdır ki, muzeyin binası Azərbaycan Prezidenti İlham Əliyevin göstərişi ilə əsaslı təmir olunmuşdur.

Mavritaniya dövlətinin başçısı Hacı Zeynalabdin Tağıyevin xatirə muzeyinin eksponatlarına da maraqla tamaşa etmişdir. Buradakı məişət əşyaları və tarixi sənədlər onda zəngin təəssürat yaratmışdır.

Prezident Məhəmməd Uld Əbdüləziz muzeyin fəxri qonaqlar kitabına ürək sözlərini yazmışdır.

Muzeyin direktoru, akademik Nailə Vəlixanlı ali qonağa xatirə hədiyyələri təqdim etmişdir.

AzərTAc

Azərbaycan.- 2010.- 17 iyul.- S. 3.