Azərbaycanla Avropa Parlamenti arasında əlaqələr intensiv inkişaf edir

Avropaya inteqrasiya Azərbaycanın xarici siyasətinin əsas istiqamətlərindən biridir. Müstəqilliyini bərpa etdikdən sonra Azərbaycan bütün beynəlxalq təşkilatlar, o cümlədən Avropa İttifaqı və Avropa Parlamenti ilə sıx əməkdaşlıq edir. Bu sözləri Milli Məclisin Sədri Oqtay Əsədov ölkəmizdə səfərdə olan Avropa Parlamentinin Xarici əlaqələr komitəsi sədrinin müavini Fiorello Provera ilə iyunun 9-da keçirdiyi görüşündə səsləndirdi.

Oqtay Əsədov qonağı Azərbaycanın yaxın dostu kimi Bakıda salamlamaqdan məmnun olduğunu bildirərək dedi ki, Azərbaycan ilə Avropa Parlamenti arasında çox yaxşı münasibətlər var, Milli Məclisdə yaradılmış komissiya neçə illərdir ki, Avropa İttifaqı və Parlamenti ilə səmərəli əməkdaşlıq edir. İkitərəfli əməkdaşlığımız Şərq Tərəfdaşlığı Proqramı çərçivəsində də uğurla davam edir. Bu əməkdaşlıq çoxtərəfli də ola bilər, lakin Ermənistanın Azərbaycan torpaqlarını işğal etməsi buna imkan vermir. Dağlıq Qarabağ münaqişəsi ilə bağlı Avropa Parlamentində qəbul olunmuş sənəd Ermənistanın işğalçı olduğunu bir daha sübut etdi.

Milli Məclisin Sədri həmin sənədin mətninin hazırlanmasında və qəbulunda fəal roluna görə qonağa minnətdarlıq edərək bildirdi ki, bu cür sənədlərin qəbulu təkcə Azərbaycanın haqlı mövqeyinin müdafiəsi deyil, həm də beynəlxalq hüquq normalarının və dövlətlərin ərazi bütövlüyü prinsipinin müdafiəsi baxımından olduqca vacibir.

Oqtay Əsədov İtaliyaya səfərini və keçirdiyi görüşləri məmnunluqla xatırladaraq Azərbaycan-İtaliya parlamentlərarası dostluq qrupunun fəaliyyətini yüksək qiymətləndirdi. Bildirdi ki, dostluq qrupları arasında əlaqələrin inkişafı digər sahələrdə mövcud olan münasibətlərimizin daha da möhkəmləndirilməsinə xidmət edir.

Azərbaycana səfər etməsindən şərəf duyduğunu vurğulayan Avropa Parlamentinin Xarici əlaqələr komitəsi sədrinin müavini Fiorello Provera isə öz növbəsində ölkəmizdə dövlətin, parlamentin və dinin vəhdət təşkil etməsinin çox böyük və mühüm əhəmiyyət kəsb etdiyini dedi. Qonaq qeyd etdi ki, bu amil, eləcə də Azərbaycanda dini dözümlülük, hamının bərabər hüquqlara malik olması demokratiyanın yüksək inkişafından xəbər verir. Azərbaycan bununla digər ölkələr üçün nümunə olmalıdır.

Görüşdə qarşılıqlı maraq doğuran digər məsələlər ətrafında da fikir mübadiləsi aparıldı.

Anar RASİMOĞLU

Azərbaycan.- 2010.- 10 iyun- S. 2.