Qədim Ellada həm də müasirliyin simvoludur
Yunanıstana bir həftəlik səfərdən sonra azərbaycanlı
jurnalistlər məhz bu qənaətə gəldilər
Ölkəmizin
kütləvi informasiya vasitələrinin bir qrup nümayəndəsi
Bakı ilə Xanya şəhəri arasında birbaşa
aviasiya reysinin açılışı ərəfəsində
iyunun 9-dan 16-dək Yunanıstanda səfərdə olub.
Bu sətirlərin müəllifinin də daxil olduğu media
qrupu ilə ölkə parlamentində, Mədəniyyət və
Turizm Nazirliyində, Azərbaycanın Yunanıstandakı səfirliyində
keçirilən görüşlərdə dövlətlərarası
münasibətlərə, ölkələrimiz
arasındakı əməkdaşlığa geniş spektrdə
işıq salındı. Yunanıstan-Azərbaycan parlamentlərarası
dostluq qrupunun rəhbəri xanım Antania Altoniu,
Yunanıstanın turizm üzrə baş katibi Georgi Pousalos,
Azərbaycanın bu ölkədəki fövqəladə və
səlahiyyətli səfiri Rəhman Mustafayev ilə
görüşlər zamanı qədim Ellada
torpağının güclü turizm potensialı olduğu,
Azərbaycanla Yunanıstan arasında genişmiqyaslı
iqtisadi mədəni əlaqələr çərçivəsində
turizmə də geniş yer ayrılması zərurəti diqqətə
çatdırıldı.
Afinanın
yaraşıqlı, zəngin ənənəsi olan otellərində,
əsrarəngiz Krit adasında səmimi və istiqanlı
Yunanıstan sakinləri və rəsmiləri ilə rəngarəng
mövzulu söhbətlərimiz oldu. Turizm kompleksində
insanı valeh edən, heyrətə salan təbii gözəlliklərlə,
əsl qonaqpərvərlik nümunəsi ilə
qarşılaşdıq. Afinanın hər
guşəsi, küçəsi,
bağı-bağçası çoxəsrlik tarixə malik
Yunanıstanın zəngin turizm ənənələrinə
malik olduğundan xəbər verir. Akropolda, Grand Bretagne,
Crowwn Plaza və digər otellərdə keçirilən
görüşlərdə Azərbaycan jurnalistlərinə
Yunanıstanın tarixi keçmişi, mədəniyyəti,
turizm və otelçilik sənayesinin inkişafı ilə
bağlı ətraflı məlumat verildi. Bildirildi
ki, Yunanıstan turizm bazarında müalicəvi, biznes, istirahət
turizm növləri daha çox inkişaf etmişdir. Bu da ölkəmizin müvafiq şirkətlərində
böyük maraq doğurur. 2005-ci il
aprelin 7-də Azərbaycan Respublikası hökuməti ilə
Yunanıstan Respublikası hökuməti arasında turizm sahəsində
əməkdaşlıq haqqında saziş
imzalanmışdır. Həmin sazişə əsasən
ölkələrimiz arasında turizm əlaqələrinin
genişləndirilməsi məqsədilə Azərbaycan Mədəniyyət
və Turizm Nazirliyinin Yunanıstanın ölkəmizdəki səfirliyi
ilə birgə əməkdaşlığı sayəsində
2008-ci il noyabrın 23-dən dekabrın 1-dək
Mədəniyyət və Turizm Nazirliyi, turizm şirkətləri
və KİV nümayəndələrindən ibarət heyətin
Yunanıstana infoturu təşkil edilmişdir.
Bu gün
Yunanıstan turistlərin daha çox ziyarət etdiyi ölkələrdən
biridir. Dünyanın nüfuzlu turizm dərgilərindən
olan "Lonely Planet" Yunanıstanı 2010-cu ilin ən
çox tələb olunan turizm məntəqəsi
siyahısına daxil edib. Son onillikdə bu
ölkəyə gələn ziyarətçilərin sayı
müntəzəm olaraq artmaqdadır. 2004-cü
ildə Olimpiya oyunlarının keçirildiyi dövrdə qədim
Elladaya 14 milyon 200 min turist gəlmişdi. Məftunedici
gözəlliyi, zəngin tarixi ilə tanınan Krit adası
dünyanın ən çox ziyarət olunan turizm məntəqələrindəndir.
Bu il mayın 24-də
"Hyatt Regensy" otelində keçirilən mətbuat
konfransında Yunanıstanın Bakıdakı səfiri cənab
İoannis Metaskas bildirmişdi ki, ölkəsi
özünün mülayim iqlimi, gözəl Aralıq dənizi
sahili əraziləri, klassik arxeoloji və tarixi yerləri ilə
bütün dünyada məşhurdur. Gözəl
və sakit adalar, əsl yunan qonaqpərvərliyi ölkəyə
turist axınını artıran amillərdəndir. "2009-cu ilin oktyabr ayından Yunanıstan barədə
beynəlxalq mediada neqativ açıqlamalar yer alır. Bu isə reallığı əks etdirmir. Bilirsiniz ki, 2007-ci ildən başlayan iqtsiadi
böhran 2008-ci ildə pik həddinə çatdı. Bu maliyyə böhranı üçün məsuliyyət
daşımayan Yunanıstan həm o zaman, həm də indi
açıq iqtisadiyyata malik olmaqla yanaşı, dövrün
tələbinə uyğun tamamilə inteqrasiya olunmuş bir
sistemə malikdir. Bu gün Yunanıstanda
ümumi vəziyyət sabitdir və ölkə
dünyanın hər yerindən gələn qonaqlarını
gülərüzlə, bol süfrə ilə
qarşılamağa hazırdır".
Azərbaycanlı turistlərin
yay mövsümü ərzində Kritə nəzərdə
tutulan səfəri, Bakıdan Xanya şəhərinə yeni
aviareysin açılışı ilə bağlı pilot
layihənin iyul ayında reallaşdırılacağına
inamını bildirən Yunanıstanın ölkəmizdəki
səfirliyinin iqtisadiyyat və ticarət üzrə konsulu Olqa
Mezeridou-Qauova bildirdi ki, bu layihə çərçivəsində
ilk dəfə olaraq səfirliyimizə gəlmədən viza
almaq, həftədə bir dəfə təyyarə ilə
Krit adasına səfər etmək mümkün olacaq. Bu, Azərbaycanla Yunanıstan arasında
qarşılıqlı inam və hörmətin təzahürüdür.
Əgər builki pilot layihəmiz uğurlu olarsa, gələn il bu layihə daha sərfəli şərtlərlə
davam etdiriləcək: "Yunanıstan öz təkrarsız
gözəlliyini təqdim etməklə həm də
etibarlı təhlükəsizliyə təminat verir. Turizm eyni zamanda, biznes sahəsində də bir
çox imkanları üzə çıxarır".
Afinadan Krit
adasınadək olan yeddi saatlıq dəniz yolunun
yorğunluğu elə ilk saatlardanca canımızdan
çıxdı. Köhnə tanışım
"Kalamaki-Travel" şirkətinin rəhbəri Miltiadis
Despotakis bizi əziz adamları kimi qarşıladı, Bakıdakı
dostlarını soruşdu, mədəniyyət və turizm
naziri Əbülfəs Qarayevlə aralarındakı xoş
münasibəti xatırlatdı. O ümidvar olduğunu
bildirdi ki, rəsmi Bakı Azərbaycanla Yunanıstan
arasında turizm əlaqələrinin intensivləşməsinə,
Bakıdan Xanyaya birbaşa hava reysinin açılmasına
yardımçı olacaq:
- Zaman dəyişdikcə
turizmin mahiyyəti də dəyişir. İnsanlar
indi hansısa şəhərin yüksək komfortlu,
yaraşıqlı otellərində yalnız kalorili yeməklərdən
dadıb bütün günü yatmaq, yaxud televizora baxmaq istəmirlər.
Bunun üçün xərc çəkib
dünyanın hansısa şəhərinə uçmaq
lazım deyil, elə evdə də bu cür vaxt keçirmək
mümkündür. Turizm fəlsəfəsi indi
başqa məqamları önə çəkir - daha
çox öyrənmək, getdiyin ölkənin geopolitik
mövqeyi, xalqın adət-ənənəsi, mədəniyyəti,
tarixi keçmişi, məişəti, mətbəxi,
insanların davranışı, təbiətə, heyvanlara
münasibəti, gələcəyə baxışı barədə
daha çox və ətraflı məlumat toplamaq. Ona görə də qonaqlarımızı eyni oteldə
qalmağa, darıxmağa, nədənsə bezməyə
qoymuruq, tez-tez yerlərini dəyişirik. Bu,
sadəcə yerdəyişmə deyil, müşahidə zənginliyinə,
gözlərin dincəlməsinə, ruhun təzələnməsinə
xidmət edən münasibətdir.
Krit adasında
keçirdiyimiz üç gün ərzində Xanyanın,
Refinnonun və İraklionun dəbdəbəli, eyni zamanda, sadə,
saatlarla fikirləşsən belə, cüzi irad tutmağa səbəb
tapmadığın otellərində Yunanıstanın şərəfli
keçmişi, bugünü və gələcəyi barədə
kifayət qədər məlumat topladıq, yunanların sadəliyini,
qonaq qarşılayıb yola salmaq mədəniyyətini şərtləndirən
məqamları rahatca izləyə bildik. Miltiadis
Despotakis xalqlarımızı birləşdirən ümumi dəyərlərin
zənginləşməsi yolunun qarşılıqlı səfərlərdən,
turist marşrutlarından keçdiyini bildirdi. Gözümüz üstə yeriniz var. Azərbaycana
və azərbaycanlılara hörmətimiz tükənməzdir.
Turist kimi, qonaq kimi gələnlərə yurdumuzu tanımaqda,
dincəlməkdə, öz gücünü bərpa etməkdə
hər cür köməyə hazırıq - dedi. Almerida
Beach Kyan Aktı otelinin sahibəsi xanım Toula Paradakı isə
Azərbaycandan gələn ilk turistləri qiymətlə
bağlı xüsusi sürprizlər gözlədiyini dedi.
Yalnız
Yunanıstanda deyil, bütün dünyada öz cazibədarlığı,
iqlimi, relyefi və digər təbii-coğrafi
üstünlükləri ilə məşhur olan Krit
adasında keçirdiyimiz günlər yəqin ki,
yaddaşımızda uzun müddət yaşayacaq. Egey dənizinin
dupduru suyu, sahilin narın qumu, zeytun, əncir, söyüd,
çinar ağaclarının boy-boya verdiyi yaşıl
yamaclar, otellərdəki yüksək səviyyəli servis,
daim gülərüz yunanların xoş qılığı
bu yerlərə dönə-dönə gəlməyə
stimul verir. Homerin və Esxilin, Sofoklun və
Platonun, Demosfenin vətəni qədim Yunanıstan
özünün çoxəsrlik mədəniyyəti, incəsənəti
və memarlığı, fəlsəfəsi və təhsili
üzərində yeni ideya və texnologiyaların və
perspektivlərin mayasını cücərtməkdə olduqca
ustadır. Mərmər, zeytun və şərabla
uzağa getməyin mümkünsüzlüyünü
yaxşı dərk edən yunanlar təbii şəraitin
yaratdığı şansdan yüz faizlik istifadəyə
üstünlük verirlər. Turizm sənayesinin
prioritet olduğu hər addımda təsdiqlənir. Ölkəyə ildə 11 milyon turist gəlir.
Bu isə Yunanıstanın büdcəsinə 4
milyard dollar əlavə gəlir gətirir.
Afina hava limanından yola
düşərkən müşayiətçimiz, milliyyətcə
rus olan Roman Matveyeviç dedi ki, 14 ildir Yunanıstandayam. Bu ölkəyə, yunan dostlarıma elə öyrəşmişəm
ki, heç doğulub boya-başa çatdığım
Ukraynaya dönmək barədə fikirləşmirəm də.
Doğrudur, hər adam vətəndən
uzaqlarda ömrü boyu yaşaya bilmir. Amma hər halda, gəlmək,
gəzmək, öyrənmək mümkündür və hər
bir adam sakini olduğu Yer kürəsinin
maraqlı guşələrinə baş çəkmək
şansını əldən verməməlidir. Güman edirəm ki, sizin, necə deyərlər, bu
"kəşfiyyat xarakterli" gəlişinizdən sonra
imkanı və həvəsi olan azərbaycanlılar turizm
şirkətlərinə müraciət edəcək, öz
istirahətlərini məhz Yunanıstanda, əsrarəngiz
Krit adasında keçirməyə üstünlük verəcəklər.
Akif CABBARLI,
Bakı-Afina-Xanya-Bakı
Azərbaycan.- 2010.- 20 iyun.- S. 3.